"ރައީސް ނިންމަވަނީ ފަސޭހަ ނިންމުންތަކެއް ނޫން، އެހެން ސިޔާސީ ވެރިންނާ ތަފާތު"

ރައީސް ޑރ. މުހައްމަދު މުއިއްޒު އަޅުއްވަމުން ގެންދަވާ މުހިންމު ފިޔަވަޅުތަކަކީ ފަސޭހަ ނިންމުންތަކެއް ނޫން ކަމަށާއި އެމަނުކުފާނުގެ ފަރާތްޕުޅުން ފެންނަމުން ދަނީ ސިޔާސީ ވެރިންގެ ފަރާތްޕުޅުން އެއްގޮތަކަށްވެސް ނުފެންނަ ކަންކަން ކަމަށް ފިޝަރީސް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

ރައީސް ރޭ ވަނީ އަންނަ އަހަރުގެ ދައުލަތުގެ ބަޖެޓު ހުށަހަޅާއިރު ހަރަދުތައް ކުޑަކުރުމަށް މުހިންމު ފިޔަވަޅުތަކެއް އަޅުއްވަން ނިންމަވާފައިވާކަން އިއުލާނު ކުރައްވާފަ އެވެ. އެގޮތުން، ސިޔާސީ މަގާމުތަކުގެ 10 ޕަސެންޓް ކުޑަކުރުމާއި ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް އުނިކުރުން ހިމެނެ އެވެ.

އޭގެ އިތުރުން އެމަނިކުފާނު ވެސް ނަންގަވާނީ މުސާރައިގެން 50 ޕަސެންޓް ކަމަށް ވިދާޅުވެފައިވެ އެވެ.

ރައީސްގެ މި ނިންމެވުންތަކަށް މަރުހަބާ ދަންނަވަމުން މިނިސްޓަރު ޝިޔާމް ވިދާޅުވީ ރާއްޖޭގެ މާލީ ހާލަތު ރަނގަޅުކޮށް ދިވެހީންނަށް ދިވެހީންގެ ރާއްޖެ އަނބުރާ ހޯއްދަވައިދެއްވުގެ ބުރަ އުނދަގޫ މަސައްކަތްޕުޅު ރައީސް ގެންދަވަނީ އެންމެ ފުރަތަމަ ދުވަހުން ފެށިގެން ވެސް ކުރައްވަމުން ކަމަށެވެ.

"ދިވެހި މުޖުތަމައުތެރޭގައި މޫލާފައިހުރި ޖީލުތަކަށް ދެމިގެންދާ ވަރަށް ނުބައި ގިނަ އާދަތަކެއް ހުރިކަން މިއީ އަޅުގަނޑުމެން އެންމެންވެސް ގަބޫލުކުރާ ހަގަގަތެއް. އެހެންނަމަވެސް ނެތީ ތެދުވެރި ނިޔަތަކާއެކު އެކަންކަމަށް ކުރިމަތިލައްވައިގެން ހައްލުކުރައްވާނެ ވެރިން. ރައީސް ޑރ. މުއިއްޒުގެ ފަރާތްޕުޅުން މިއަދު މިފެންނަނީ ސިޔާސީ ވެރިންގެ ފަރާތްޕުޅުން އެއްގޮތަކަށްވެސް ނުފެންނަ ކަންކަމޭ ދެންނެވިޔަސް ކުށަކަށް ނުވާނެ،" އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވި އެވެ.

ޝިޔާމް ވިދާޅުވީ ރައީސް ނިންމަވަނީ ފަސޭހަފުޅު ނިންމެވުންތަކެއް ނޫން ކަމަށާއި، ސިޔާސީ ގޮތުން މަގުބޫލް ނިންމެވުންތަކެއް ކަމަށް ގަބޫލުކުރައްވާ އެއްވެސް ސިޔާސީ ބޭފުޅަކު ވެސް ނެތް ކަމަށެވެ.

އަދި ރައީސް ނިންމަވަމުން ގެންދަވާ ބައެއް ނިންމެވުންތަކުގެ ސަބަބުން ނުފޫޒުވެރި ވިޔަފާރިވެރިންގެ ނުރުހުން ވެސް އެމަނިކުފާނަށް އަމާޒުވަމުންދާ ކަމަށް ޝިޔާމް ވިދާޅުވި އެވެ.

"އެހެން ނަމަވެސް ރައީސް މިއަދު އެ ސާބިތު ކޮށްދެއްވަނީ މީ އެކަކު ދެމީހެއްގެ ގައުމެއްނޫން ކަން. އެމަނިކުފާނު އެ ސާބިތުކޮށްދެއްވަނީ އެމަނިކުފާނަކީ ދިވެހީންގެ ވެރިއެއްކަން. އެމަނިކުފާނު އެކުރައްވާ މަސައްކަތްޕުޅަކީ އަންނަން އޮތް ޖީލުތަކަށް މިގައުމު ސަލާމަތްކޮށްދެއްވުމުގެ މުހިއްމު ބުރަ މަސައްކަތްޕުޅެއް،" ރައީސްގެ ނިންމެވުންތަކަށް ތައުރީފު ކުރައްވަމުން ޝިޔާމް ލިޔުއްވާފައިވެ އެވެ.

ރައީސްގެ ނިންމެވުންތަކަށް އިދިކޮޅު ފަރާތްތަކުން ފާޑުކީ ނަމަވެސް ސަރުކާރުގެ އިސްވެރިން ވަނީ ވަރަށް ބޮޑަށް ތައުރީފުކޮށްފަ އެވެ. ރައީސްގެ ނިންމެވުމާ ގުޅިގެން، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް ވަނީ އޭނާގެ މުސާރައިން 50 ޕަސެންޓް ނަންގަވަން ނިންމަވާފައިވާކަން ރޭ އިއުލާނުކުރައްވާފަ އެވެ.