ދިހަ އަހަރުން ރިސޯޓު ހެދުމަށް 59 ބިން | އޮޕަރޭޝަނަށް ގެނެވުނީ ނުވަ ރަށް

ރިސޯޓު ތަރައްގީކުރުމަށް ފާއިތުވި ދިހަ އަހަރު ދުވަހުގެ ތެރޭގައި 59 ރަށާއި ފަޅު ދޫކޮށްފައިވާއިރު އޭގެ ތެރެއިން އޮޕަރޭޝަނަށް ގެނެވުނީ އެންމެ ނުވަ ރަށްކަން ޓޫރިޒަމް މިނިސްޓްރީގެ ތަފާސްހިސާބުތަކުން ހާމަވެއްޖެ އެވެ. 

މައުލޫމާތު ހޯދައި ލިބިގަތުމުގެ ހައްގުގެ ދަށުން "މިރާ"އިން އެދިގެން ޓޫރިޒަމް މިނިސްޓްރީންވަނީ 2013 ވަނަ އަހަރުން ފެށިގެން މި އަހަރުގެ އޯގަސްޓު މަހުގެ ނިޔަލަށް ރިސޯޓު ތަރައްގީކުރުމަށް ދޫކޮށްފައި ރަށްތަކާއި ފަޅުތަކުގެ ތަފުސީލު ހިއްސާކޮށްފަ އެވެ. 

މިނިސްޓްރީގެ ހިސާބުތަކަށް ބަލާއިރު އެ މުއްދަތުގައި އދއަތޮޅުން ދެ ރަށެއް ރިސޯޓު ތަރައްގީކުރުމަށް ދޫކުރި އެވެ. އެއީ އދ.ބޮޑުކާށިހުރާއާއި އދ.ހުރުއެޅި އެވެ. އެ ދެ ރަށުގެ ތެރެއިން ހުރުއެޅި މިހާރު އޮޕަރޭޝަނަށް ގެނެވިފައިވެ އެވެ. 

ބ.އަތޮޅުން ދެ ރަށެއް ޓޫރިޒަމް ތަރައްގީކުރަން ދޫކޮށްފައިވެ އެވެ. ބ.ފަރެސް އަދި ހިބަޅިދޫ ރިސޯޓު ތަރައްގީކުރަން ދޫކޮށްފައިވާއިރު އެ ދެ ރަށުން މިހާތަނަށް އޮޕަރޭޝަނަށް ގެނެވިފައިވަނީ ބ.ފަރެސް އެކަނި ކަމަށް ހިސާބުތަކން ދައްކަ އެވެ. 

ދ.އަތޮޅާއި ފ.އަތޮޅުން ހަ ރަށަކާއި ދެ ފަޅު ރިސޯޓު ތަރައްގީކުރަން އެ މުއްދަތުގައި ދޫކުރި ނަމަވެސް އެއިން އެއްވެސް ތަނެއް އޮޕަރޭޝަނަށް ގެނެވިފައިނުވާކަމަށް ޓޫރިޒަމްގެ ހިސާބުތަކުން ދައްކަ އެވެ. ހުވަދު އަތޮޅުން ހަތަރު ރަށެއް ރިސޯތު ހެދުމަށް ދޫކުރި ނަމަވެސް އެއްވެސް ރަށެއް އޮޕަރޭޓުކުރަން ފެށިފައިނުވެ އެވެ. 

ހއ.އަލިދުއްފަރުފޮނޮޅާއި، ވެލިފިނޮޅާއި، ބެރިމަނދޫ އަދިބ ހދ.އިން ދިއްޕަރުފުއްޓާއި، ކުޑަމުރައިދޫ ރިސޯޓު ހަދަން ދޫކުރިއިރު އެ ރަށްތަކުގެ ތެރެއިން އޮޕަރޭޓުކުރެވެނީ ދިއްޕަރުފުށި އެކަންޏެވެ. 

މާލެ ސަރަހައްދުން ދޫކުރި ކަގި އަދި ކޮއްދިއްޕަރުގައި މިހާރު ރިސޯޓު އޮޕަރޭޓުކުރާއިރު ދޫކުރި ތަންތަނުން އެއް ފަޅާއި އެއް ރަށް އޮޕަރޭޝަނަށް ނުގެނެވެ އެވެ. ލ.އަތޮޅުން ދެ ރަށް ރިސޯޓު ހެދުމަށް ދޫކުރި އެވެ. ނަމަަވެސް އެއްވެސް ރަށެއް އޮޕަރޭޝަނަށް ނުގެނެވެ އެވެ. 

ޅ.އަތޮޅުން ހަތަރު ރަށެއް ރިސޯތު ތަރައްގީކުރަން ދޫކޮށްފައިވެ އެވެ. ނަމަވެސް އެއްވެސް ރަށެއް އޮޕަރޭޝަނަށް ގެނެވިފައިނުވެ އެވެ. މ.އަތޮޅުން ދޫކުރި ތިން ރަށުގެ ތެރެއިން މަޑިފުށީގައި ރިސޯޓު އޮޕަރޭޓު ކުރަމުންދެ އެވެ. 

ނ.އަތޮޅުން ހަ ރަށް ރިސޯޓު ހެދުމަށް ދޫކުރި ނަމަވެސް އެއިން އެއްވެސް ރަށެއް އޮޕަރޭޓުނުކުރެ އެވެ. އަދި ރ.އަތޮޅުން ދޫކުރި އަށް ރަށުގެ ތެރެއިން ދެ ރަށް އޮޕަރޭޝަނަށް އައިސްފައިވެ އެވެ. އެއީ ކަޑިފުށި އަދި ފަސްމީދޫ އެވެ. 

ތ.އަތޮޅުން އަށް ރަށެއްގައި ރިސޯޓު ތަރައްގީކުރަން ދޫކޮށްފައިވެ އެވެ. އެއިން އެއްވެސް ރަށެއް މިހާތަނަށް އޮޕަރޭޝަނަށް ގެނެވިފައިނުވެ އެވެ. 

އިއްޔެ ރައްޔިތުންގެ މަޖިލީހުގައި ވާހަކަދައްކަވަމުން ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެފައިވަނީ ފަތުރުވެރިކަަމުގެ ބޭނުމަށް ތަރައްގީކުރަން ދޫކޮށްފައިވާ ރަށްތަކާއި ބިންތަކުގެ ތެރެއިން ތަރައްގީކުރުން މަޑުޖެހިފައިވާ 58 ރަށެއް ދަފުތަރު ކުރެވިފައިވާ ކަމަށެވެ. 

އަދި އޭގެ ތެރެއިން އެއްވެސް މިންވަރަކަށް މަސައްކަތް ނުހިނގާ އޮތް 22 ރަށެއް ފާހަގަކުރެއްވިފައިވާ ކަމަށްވެސް މިނިސްޓަރު ވިދާޅުވި އެވެ.