އިސްރާއީލުން ހިޒްބުﷲގެ ލީޑަރު ޞަަފްޔުއްދީން އަވަހާރަކޮށްލައިފި

އިސްރާއީލުން ވައިގެ މަގުން ދިން ހަމަލާއެއްގައި ހިޒްބުﷲގެ ސެކްރެޓަރީ ޖެނެރަލް ހަސަން ނަސްރުﷲގެ މަގާމަށް ދެން ވަޑައިގަންނަވާނެ ކަމަށް ބެލެވުނު ހާޝިމް ޞަފްޔުއްދީން އަވަހާރަކޮށްލައިފިކަން އެ ޖަމާއަތުން ޔަގީންކޮށްދީފި އެވެ. 

ހިޒްބުﷲއިން ނެރުނު ބަޔާނެއްގައި ބުނެފައިވަނީ އިސްރާއީލުން ދިން އުދުވާނީ އަދި އިޖުރާމީ ހަމަލާއެއްގައި އެ ޖަމާއަތުގެ ލީޑަރު އަދި ދީނީ އިލްމުވެރިޔާ ޞަފްޔުއްދީން އަވަހާރަކޮށްލާފައިވާކަމަށާއި، އޭނާ އަވަހާރަވުމުގެ ފުން ހިތާމަ އެ ޖަމާއަތުން އިހުސާސްކުރާ ކަމަށެވެ. 

ދެކުނު ބެއިރޫތަށް މީގެ ތިން ހަފުތާ ކުރިން ދިން ހަމަލާއެއްގައި ޞަފްޔުއްދީން ޝަހީދުކޮށްލާފައިވާކަމަށް އިސްރާއީލުން ބުނީ އަންގާރަދުވަހު އެވެ. 

އިސްރާއީލުން އަންނަނީ އޮކްޓޯބަރު މަހުގެ އެއްވަނަ ދުވަހުން ފެށިގެން މުޅި ލުބުނާނަށް ވައިގެ މަގުން ވަރުގަދަ ހަމަލާތަކެއް ދެމުންނެވެ. މި ހަމަލާތަަކުގައި ހިޒްބުﷲގެ ލީޑަރު ހަސަން ނަސްރުﷲ ޝަހީދުކޮށްލާފއިވެ އެވެ. އަދި އެ ޖަމާއަތުގެ މަތީ ފަންތީގެ ވަރަށް ގިނަ ލީޑަރުން އަވަހާރަކޮށްލާފައިވެ އެވެ. 

ޣައްޒާއަށް އިސްރާއީލުން ދެމުންދާ ހަމަލާތަކާ ގުޅިގެން ހިޒްބުﷲއިން އިސްރާއީލަށް ރައްދު ހަމަލާތައް ދޭން ފެށުމާއެކު، އޮކްޓޯބަރު ހަތެއް 2023 އިން ފެށިގެން ދެފަރާތުގެ ދެމެދުގައި ބަދަލުކުރަމުން އައި ހަމަލާތައް މުޅިން އެހެން ހަރުފަތަކަށް އިސްރާއީލުން ގެންދިޔައީ މި އޮކްޓޯބަރު މަހުގެ އެއްވަނަ ދުވަހު އެވެ. 

ނިމުނު އަހަރުގެ އޮކްޓޯބަރުން ފެށިގެން އިސްރާއީލުން ދެމުންދާ ހަމަލާތަކުގައި ލުބުނާނުން 2،546 މީހަކު ޝަހީދުވެ، 11،860 މީހަކަށް އެކި މިންވަރުގެ ޒަހަމްތައް ވެފައިވެ އެވެ. 

އިސްރާއީލުން ޝަހީދުކޮށްލި ޞަފްޔުއްދީނަކީ ހިޒްބުﷲގެ އަސްކަރީ އޮޕަރޭޝަންތައް ވިލަރެސްކޮށް އިންތިޒާމުކުރާ ޖިހާދު މަޖިލީހުގެ މެންބަރެކެވެ. އަދި އެ ޖަމާއަތުގެ އިދާރީ އަދި މާލީ ހުރިހާ ކަމެއް ވިލަރެސްކުރާ ހިންގާ މަޖިލީހުގެ އިސްވެރިޔަކީވެސް ޞަފްޔުއްދީނެވެ. 

އީރާނުގެ ޤުމްއިން ދީނީ ތައުލީމު ހާސިލުކުރެއްވުމަށްފަހު 1990 ވަނަ އަހަރު ލުބުނާނަށް އެނބުރި ވަޑައިގަތުމަށްފަހު ޞަފްޔުއްދީނަކީ އެ ޖަމާއަތުގެ އިސް ފަންތީގެ އެކި މަގާމުތައް އަދާކުރައްވާފައިވާ ހިޒްބުﷲގެ ދުވަސްވީ ލީޑަރެކެވެ.