ބުޅާ ފެސިލިޓީއަށް ވެޓަކާއި ނަރުހުންނާއި ކޯޑިނޭޓަރެއް ހޯދަނީ

މާލޭ މަގުމަތީގައި ގިނަ ވެފައިވާ ބުޅާތައް ބެލެހެއްޓުމަށް ހަދަން ފަށާފައިވާ ޕެޓް ކެއާ ފެސިލިޓީއަށް މުވައްޒަފުން ހޯދުމަށް މާލެ ސިޓީ ކައުންސިލުން އިއުލާނު ކޮށްފި އެވެ.

ބުޅާ ފެސިލިޓީ ހަދަނީ ހުޅުމާލެ ދެވަނަ ފިޔަވަހީގަ އެވެ. އެތަން އަޅަނީ 5،000 އަކަފޫޓުގެ ބިމެއްގަ އެވެ. މި ޕްރޮޖެކްޓް ހިންގަނީ އެނިމަލްވެލްފެއާ މިނިސްޓްރީ އަދި މާލެ ސިޓީ ކައުންސިލް ގުޅިގެންނެވެ.

ސިޓީ ކައުންސިލުން ވަނީ އެތަނަށް ވެޓެރިނޭރިއަން އަކާއި ދެ ވެޓެރިނަރީ ނަރުހުންނާއި ކޯޑިނޭޓަރެއް ހޯދަން އިއުލާނު ކޮށްފަ އެވެ.

ވެޓެރިނޭރިއަން ނުވަތަ ޖަނަވާރުންގެ ޑޮކްޓަރަށް ދޭން ކަނޑައަޅާފައިވާ މުސާރައަކީ 35،000 ރުފިޔާ އެވެ. ބުޅާ ފެސިލިޓީއަށް ގެންނަ ބުޅާތަކަށް ފަރުވާ ދިނުމުގެ އިތުރުން، ވެޓްރިނަރީ ހިދުމަތް ބޭނުންވާ މާލޭގެ އަވަށްތަކަށް ޒިޔާރަތްކޮށްގެން ހިދުމަތް ދިނުމަށް ވެސް ޝަރުތުތަކުގެ ތެރޭގައި ހިމަނާފައިވެ އެވެ. 

އޭގެ އިތުރުން ފާމް އެނިމަލް އާއި ޕެޓްގެ ގޮތުގައި ގެންގުޅޭ ޖަނަވާރު ނުވަތަ ދޫނިދޫފާސުއިޕަށް ޖެހޭ ބަލިތައް ދެނެގަތުމާއި، ފަރުވާ ދިނުމާއި ސާޖަރީ ހެދުމާއި މިފަދަ ޖަނަވާރުތަކުގެ ސިއްހަތާބެހޭ ގޮތުން ދިމާވާ މައްސަލަތައް ހައްލުކުރުމުގައި ދޭންޖެހޭ ލަފަޔާއި އިރުޝާދު ދިނުން ވެސް ވެޓެރިނޭރިއަންގެ ޝަރުތުތަކުގެ ތެރޭގައި ހިމަނާފައިވެ އެވެ.

ސިޓީ ކައުންސިލުން ކޮށްފައިވާ އިއުލާނުގައި، ވެޓެރިނަރީ ނަރުހުންނަށް ކަނޑައަޅާފައިވާ މުސާރައަކީ 8130 ރުފިޔާ އެވެ. އަދި ސާވިސް އެލަވަންސެއްގެ ގޮތުގައި މަސައްކަތް ކުރާ ކޮންމެ ދުވަހަކަށް 100 ރުފިޔާ އަދި އިތުރު ގަޑިއަށް މުސާރައިގެ 35 ޕަސެންޓް ކަނޑައަޅާފައިވެ އެވެ.

ބުޅާ ފެސިލިޓީގެ ކޯޑިނޭޓަރުގެ މަގާމަށް ހުށަހަޅާފައި ވަނީ 12،500 ރުފިޔާގެ މުސާރައެކެވެ، އޭގެ އިތުރުން ފޯން އެލަވަންސްގެ ގޮތުގައި 300 ރުފިޔާ އަދި އިތުރު ގަޑީގައި މުސާރައިގެ 35 ޕަސެންޓް ދެ އެވެ.

މި ތިން މަގާމަށް ވެސް އިއުލާނު ކޮށްފައި ވަނީ އެއް އަހަރު ދުވަހުގެ ކޮންޓްރެކްޓް އުސޫލުން މަސައްކަތް ކުރުމަށެވެ. މި ވަޒީފާތަކަށް ޝައުގުވެރިވާ ފަރާތްތަކުން އަންނަ އޮކްޓޯބަރު މަހުގެ 29 ވަނަ ދުވަހުގެ މެންދުރު 2:00 ގެ ކުރިން ސިޓީ ކައުންސިލަށް ހުށަހަޅަން ވަނީ އެދިފަ އެވެ.

މި ފެސިލިޓީ ހުޅުވުމުގެ ފަހުގެ ތައްޔާރީތައް ވަމުންދާ ކަމަށް ސިޓީ ކައުންސިލުން ވަނީ ބުނެފަ އެވެ.