ޓީޖީއެސްޓީއާމެދު ޓޮމް | ކުރު މުއްދަތެއް ދިނުމުން އާމްދަނީ އިތުރުނުވޭ، އިތުރު މުހުލަތު ދޭންޖެހޭ

ސަރުކާރުގެ ފަރާތުން ޓީޖީއެސްޓީ ބޮޑުކުރުމަށް ހުށަހަޅާފައިވާ ބިލުގައި އަންނަ ޖޫން މަހުން ފެށިގެން ޓީޖީއެސްޓީ ބޮޑުކުރަން އޮތް އޮތުން ނޮވެންބަރު މަހުން ފެށިގެން ބޮޑުކުރާ ގޮތަށް ބަދަލުކުރުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހްމަދު ތާރިގު (ޓޮމް) ހުށަހަޅުއްވައިފި އެވެ. 

ސަރުކާރުން މަޖިލީހަށް ހުށަހަޅާފައިވާ ހަތަރު ބިލެއް ދިރާސާކުރުމަށް މިއަދު ބޭއްވި މުޅި މަޖިލީހުގެ ކޮމިޓީގައި ވާހަކަދައްކަވަމުން ޓޮމް ވިދާޅުވީ އިރުއިރުކޮޅާ މަޖިލީހުން ޓެކްސް ބޮޑުކުރަމުން އަންނަ ކަމަށެވެ. އެގޮތުން މީގެ ދޮޅު އަހަރެއްހައި ކުރިން ޓީޖީއެސްޓީ އެއިރުގެ މަޖިލީހުން ބޮޑުކުރި ކަމަަށެވެ. 

އިތުރަށް ތާރިގު ވިދާޅުވީ އެކެއް ޖޫނުން ފަށައިގެން ޓެކްސް ބޮޑުކުރާނަމަ އެއީ ވިޔަފާރިތަކަށް އެކަމަށް ތައްޔާރުވާން ވަރަށް ކުރު މުއްދަތެއް ކަމަށެވެ. އާންމުކޮށް ރިސޯޓުތަކުން ވިޔަފާރިތަކާއެކު ކޮންޓްރެކްޓުުތައް ހަދާފައި ހުންނަނީ 31 އޮކްޓޯބަރުން ޖެހިގެން އަންނަ އަހަރުގެ 31 އޮކްްޓޯބަރަށްކަން ފާހަގަކުރައްވައި ޓޮމް ވިދާޅުވީ އެ މުއްދަތުގެ ދެމެދުގައި ޓެކްސް ބޮޑުވުމަކީ ވިޔަފާރިވެރިންނަށް ވަރަށް ބޮޑަށް ދަތިވާނެ ކަމެއް ކަމަށެވެ. 

"އާންމުކޮށް ރިސޯޓުތަކުން އޮޕަރޭޓަރުންނާ ކޮންޓްރެކްޓުތައް ހަދާފައި ހުންނަނީ އަހަރަކުން އަހަރަކަށް. އެ ދޭތެރެ މެދުން ކޮންޓްރެކްޓުތަކަށް ޓެކްސް ބޮޑުވީމާ އެވިޔަފާރިވެރިންނަށް ވަރަށް ބޮޑަށް އުދަގޫވާނެ،" ޓޮމް ވިދާޅުވި އެވެ. 

އިތުރަށް ޓޮމް ފާހަގަކުރެއްވީ 2022 ވަނަަ އަހަރު އެއިރުގެ މަޖިލީހުން ޓީޖީއެސްޓީ ބޮޑުކުރުމުންވެސް ވިޔަފާރިތަކަށް ދަތިތައް ކުރިމަތިވި ކަމަަށެވެ. އެގޮތުން 2022 ވަނަ އަހަރުގެ ނޮވެންބަރު މަހުގެ ތެރޭގައި ޓީޖީއެސްޓީ ރޭޓު 12 އިންސައްތައިން 16 އިންސައްތައަށް ރައީސް އިބްރާހީމް މުހައްމަދު ސޯލިހުގެ ސަރުކާރުގައި ބަދަލުކުރުމުން 2023 ވަނަ އަހަރުގެ ޖަނަވަރީ ފެބްރުއަރީ މަހުގެ ޓެކްސްތައް ޑިސެންބަރުގައި ވިޔަފާރިތަކުން ޑިކްލެއާކުރިކަމަށް ޓޮމް ވިދާޅުވި އެވެ. 

އެގޮތަށް ވިޔަފާރިތަކުން އަމަލުކުރީ ކުއްލިއަކަށް ޓެކްސް ބޮޑުކުރުމުން ކުރިއަށް އޮތް މުއްދަތަށް ހަދާފައި ހުރި އެއްބަސްވުންތަކުގެ ތެރެއަށް އެ ޓެކްސް އިތުރުނުކުރެވޭނެތީކަން ފާހަގަކުރައްވައި ޓޮމް ވިދާޅުވީ 2023 ވަނަ އަހަރުގެ ފުރަތަމަަ ކުއާޓާގައި ފަތުރުވެރިން އައި މިންވަރު އިތުރުވި ނަމަަވެސް އެ ކުއާޓާގައި ލިބުނު އާމްދަނީ 2022 ވަނަ އަހަރުގެ ފުރަތަމަ ކުއާޓާއާ އަޅާބަލާއިރު ދަށްވި ކަމަށެވެ. 

އިތުރަށް ޓޮމް ފާހަގަކުރެއްވި ގޮތުގައި އެފަދައިން އާމްދަނީ ދަށްވި ސަބަބަކީ ޕްރެޝަރު ދީގެން ޓެކްސް ބޮޑުކުރުމެވެ. އަދި މިހާރުވެސް އެގޮތަށް ޕްރެޝަރު ދީފިނަމަ ނުކުންނާނީ އެ ނަަތީޖާ ކަމަށްވެސް ތާރިގު ވިދާޅުވި އެވެ. 

"2023 ވަނަ އަހަރުގެ ޖަނަވަރީގައި މީރާއަށް ލިބުނު އާމްދަނީވަނީ ދަށް. އެކަމަކު 12 ޕަސެންޓުން 16 ޕަސެންޓަށް ބޮޑުކުރީ 2023 ގެ ޖަނަވަރީ އެކަކުން ފަށައިގެން. 2022 ގައި ހުރީ 12 ޕަސެންޓުގައި. 2023 ގެ ފުރަތަމަ ކުއާޓާގައި އައި ފަތުރުވެރިންވީ އިތުރު. އެކަމަކު މީރާއަށް ލިބުނު އާމްދަނީވީ ދަށް،" ޓޮމް ވިދާޅުވި އެވެ. 

"އެގޮތަށް އަދިވެސް ދިމާވާނެ ޕްރެޝަރެއް ދީގެން ކަމެއް ކުރާނަމަ. އަނެއްކާ  ރިސޯޓުތަކާއި ގެސްޓުހައުސްތަކުން މިހުންނަނީ އެއް އަހަރު ދުވަހަށް ކޮންޓްރެކްޓު ހަދާފައި. ރިސޯޓުތަކުން ރޭޓު ދެނީވެސް ޓެކްސްތައް ހިމަނައިގެން،" 

އިތުރަށް ޓޮމް ވިދާޅުވީ އިރުއިރުކޮޅާ ދައުލަތުން ޓެކްސް ބޮޑުކުރުމަކީ އެކަމުގެ ސަބަބުން އިންވެސްޓަރުންގެ އިތުބާރަށްވެސް އަސަރުކުރާނެ ކަމެއް ކަމަށެވެ. އެގޮތުން ރިސޯޓުތަކާއި އޮޕަރޭޓަރުންނާ ދެމެދުގައި މިހާރު ހަދާ ހުރިހާ އެއްބަސްވުމަކަށް ކުރިއަށް އޮތް ތަނުގައި ސަރުކާރުން ނުވަތަަ މަޖިލީހުން ޓެކްސްއަށް ގެންނަ ބަދަލުތައް ކޮންޓްރެކްޓަށް އަންނާނެ ކަމަށް ބުނެ މާއްދާއެއް އިތުރުކުރަންޖެހޭ ކަމުގައި ޓޮމް ވިދާޅުވި އެވެ. 

"ކޮންމެ ކޮންޓްރެކްޓެއްގައި ދިވެހިރާއްޖޭގެ ރައްޔިތުންގެ މަޖިލީހުން ނުވަތަ ސަރުކާރުން ކޮންމެ ވަގުތެއްގައިވެސް ޓެކްސް ބަދަލުކޮށްފާނޭ، އެހެންވީމާ އެ ބަދަލުތައް އަގަށް އަންނާނެ ގޮތަށޭ މިކޮންޓްރެކްޓު ހަދީ ބުނާ މާއްދާއެއް ހިމަނަންޖެހޭނެ. އެއީ އަޅުގަނޑުމެންވެސް ރައްޔިތުންގެ މަޖިލީހުން ވިސްނައިލަންޖެހޭ ކަމެއް. މާދަން ހެނދުނު ހޭލާއިރަށް ޓެކްސްތައް ބޮޑުވެދާނޭ ޖަހާފައި ކޮންޓްރެކްޓުތައް ހަދަނީ،" ތޯރިގު ވިދާޅުވި އެވެ.