އެޓޮމިކް އެޖެންސީގައި ބައިވެރިވުމަށް މަޖިލީހުން ރުހުން ދީފި

ދިވެހިރާއްޖެއިން އިންޓަނޭޝަނަލް އެޓޮމިކް އެޖެންސީ (އައިއޭއީއޭ)ގައި ދިވެހިރާއްޖެއިން ބައިވެރިވުމަށް ސަރުކާރުން އެދުމުން ރައްޔިތުންގެ މަޖިލީހަށް އެކަމަށް ރުހުން ދީފި އެވެ. 

އައިއޭއީއޭގައި ރާއްޖެއިން ބައިވެރިވުމަށް ވަޒީރުންގެ މަޖިލީހުގައި މަޝްވަރާކުރުމަށްފަހު ނިންމާފައިވެ އެވެ. އެ ނިންމުން ނިންމާފައިވާ ސަބަބެއްކަމަށް އެއިރުގެ ފޮރިން މިނިސްޓަރު އަދި މިހާރުުގެ ފިނޭންސް މިނިސްޓަރު މޫސާ ޒަމީރު ވިދާޅުވީ ކެންސަރު ބައްޔަށް ފަރުވާ ދިނުމަށް އެކަމުގެ ހާއްސަ ހޮސްޕިޓަލެއް ގާއިމުކުރުމުގެ މަސައްކަަތް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފައްޓަވާފައިވާއިރު އެ މަސައްކަތުގައި އައިއޭއީއޭގެ އެހީތެރިކަން ބޭނުންވާނެތީ ކަމަށެވެ.

"އެކަމަށްޓަކައި މިހާރު މި ޒަމާނުގެ މެޑިސިންގައި ވަރަށް ބޮޑަށް ބޭނުންވޭ އެޓޮމިކް އޭޖެންސީގެ އެހީތެރިކަން އެއީ މިކަމަށް ބޭނުންވާ ބައެއް ކަހަލަ އިކުއިޕްމެންޓް ހޯދުމާއި މީގެ ވޭސްޓް މެނޭޖްމެންޓް ކުރުމާއި މި ކަންކަމަކީ އަސްލުގައި އައިއޭއީއޭގައި މެންޑޭޓުގެ ތެރޭގައި ހިމެނިފައިވާ ކަމެއް،" ޒަމީރު ވިދާޅުވި އެވެ.

އޭގެ އިތުރަށް ދުނިޔޭގެ ހަކަތައަށް އަންނަމުންދާ ބަދަލުތަކުގެ ތެރޭގައި ދުނިޔެ އެޓޮމިކް ހަކަތައާ ދިމާއަށް މިސްރާބު ހިފުމުގެ ފުރުސަތު ބޮޑުކަން ފާހަގަކުރައްވައި އެއިރު ޒަމީރު ވިދާޅުވެފައިވަނީ އެ ބަދަލު އަންނައިރު ދިވެހިރާއްޖެއަކީ އެޓޮމިކް ހަކަތައާ ބެހޭ ބައިނަލްއަގުވާމީ އިދާރާގެ މެންބަރެއްގެ ގޮތުގައި އޮތުމަކީ މުހިއްމު ކަމެއް ކަމަށެވެ.

"އެނގިވަޑައިގަންވާނެ މިހާރު ދުނިޔެއަށް އަންނަ ބަދަލަށް ބަލާއިރުގައި އެޓޮމިކް އެނާޖީއާ ދިމާލަށް ދުނިޔެ ދިޔުމުގެ ފުރުސަތު އެބައޮތް މިހާރު މިހިރަ ރިނުއަބުލް އެނާޖީ އަދި ހައިޑްރޯކާބަން ދުނިޔޭގައި ބޭނުންކުރުން މަދުކުރުން މިކަންކަމާ ކުރިމަތިވެގެންދާނެ، އެހެންވީމަ ރާއްޖެ ވެސް މީގައި ބައިވެރިވެގެން މީގެއިން ލިބެން ހުރި ބެނެފިޓްތައް ހޯދަން ޖެހޭނެ ކަމަށް ގަބޫލުކުރެވޭތީ،" އޭނާ ވިދާޅުވި އެވެ.

އެ މައްސަލަ މަޖިލީހަށް ސަރުކާރުން ހުށަހެޅުމުން ދިރާސާކުރުމަށް ފޮނުވީ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީއަށެވެ. އެ މައްސަލާގައި ކޮމިޓީން ދިރާސާކުރުމަށް ހިމެނުމަށްފަހު ނިންމާފައިވަނީ އެކަމަށް ރުހުން ދިނުމަށެވެ. ކޮމިޓީގެ ރިޕޯޓު މިއަދު މަޖިލީހުގެ ޖަލްސާގައި އިއްވުމަށްފަހު ނެގި ވޯޓުގައި ބައިވެރިވެވަޑައިގެންނެވި 61 މެންބަރުންގެ އިއްތިފާގުން އެޓޮމިކް އެނާޖީ އެޖެންސީގައި ބައިވެރިވުމަށް ރުހުން ދިނުމަށްވަނީ ފާސްކޮށްފަ އެވެ.