އިސްލާހު؛ ފުރަތަމަ ވޭޕްކުރުމަށް ބޭނުންކުރާ ތަކެތީގެ ޑިއުޓީ ބޮޑުކުރުން، ދެން މުޅީން މަނާކުރުން

ރާއްޖެއަށް ވޭޕް އެތެރެކުރުން މަނާ ކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވު ނިންމެވުން ތަންފީޒުކުރުމަށްޓަކާ ގާނޫނުތަކަށް ގެންނަންޖެހޭ އިސްލާހުތައް ގެނައުމުގެ މަސައްކަތް ފަށައިފި އެވެ.

އެޓާނީ ޖެެނެރަލްގެ އޮފީހުން މިހާރު ވަނީ ވޭޕް ކުރުމަށް ބޭނުން ކުރާ އާލާތްތަކާއި އިލެކްޓްރިކް ސިނގިރޭޓުން ނަގާ އިމްޕޯޓު ޑިއުޓީ ބޮޑު ކުރަން ބިލެއް ހުށައަޅާފަ އެވެ. އެ ބިލް ހުށައެޅިއިރު ރައީސް ނިންމަވާފައި ވަނީ ރާއްޖެއަށް ވޭޕް އެތެރެކުރުން މަނާ ކުރާށެވެ.

އެކަމާއި ގުޅިގެން ސުވާލު އުފެދި އާންމުންގެ ފާޑުކިޔުން ވަނީ އަމާޒުވެފަ އެވެ. އެކަން ހިނގާ ގޮތް އެޓާނީ ޖެނެރަލް އަހްމަދު އުޝާމް މިރޭ ވަނީ ސާފުކޮށް ދެއްވާފަ އެވެ. އުޝާމް ވިދާޅުވި ގޮތުގައި މިއީ ދެ މަރުހަލާ އެއްގެ ދެ މަސައްކަތެވެ.

މިހާރު މަޖިލީހަށް ހުށައަޅާފައި ވަނީ ވޭޕް ކުރުމަށް ބޭނުން ކުރާ އާލާތްތަކާއި އިލެކްޓްރިކް ސިނގިރޭޓުން ނަގާ އިމްޕޯޓު ޑިއުޓީ ބޮޑު ކުރަން ބިލެކެވެ. އެއީ ނޮވެންބަރު އެކަކުން 15 އަށް އެތެރެކުރާ ތަކެތީގެ ޑިއުޓީ ބޮޑުކުރުމަށެވެ.

ބިލްގައި ވަނީ އިލެކްޓްރޯނިކް ސިނގިރެޓަށް / ދުންފަތުގެ އިސްތިއުމާލު ކުރުމަށް ބޭނުން ކުރާ އެނޫން ވެސް އާލާތްތަކަށް އަޅާ ފްލޭވާ އާއި ކެމިކަލުން ނަގާ ޑިއުޓީ 50 ޕަސެންޓަށް / މިލިލީޓަރަކަށް އަށް ރުފިޔާ ބޮޑު ކުރުމަށެވެ. އަދި ހީޓެޑް ޓޮބެކޯ ޕްރޮޑަކްޓްސް / ރޯ ކުރުމަކާ ނުލައި ހޫނުކޮށްގެން ބޭނުންކުރެވޭ ގޮތައް އުފައްދާފައި ހުންނަ ދުންގަތުގެ އުފެއްދުންތަލުން ނަގާ އިމްޕޯޓު ޑިއުޓީ 50 ޕަސެންޓަށް / މިލިލީޓަރަކަށް އަށް ރުފިޔާ ބޮޑު ކުރުމަށެވެ.

އުޝާމް ވިދާޅުވީ ރައީސުލްޖުމްހޫރިއްޔާ ނިންމަވާފައިވަނީ ނޮވެމްބަރު އެކެއް، 2024 އިން ފެށިގެން ދުންފަތުގެ ޑިއުޓީ ބޮޑުކުރުމަށް އަދި ނޮވެމްބަރު 15، 2024 އިން ފެށިގެން ވޭޕު ކުރުމަށް ބޭނުންކުރާ ތަކެތި އެތެރެކުރުން މަނާކުރުމަށެވެ.

"ގާނޫނަށް ހުށަހަޅާފައިވާ އިސްލާހަކީ އެކެއް ނޮވެމްބާ އިން ފެށިގެން 15 ނޮވެމްބާ 2024 މި މުއްދަތުގެ ތެރޭގައި އެތެރެކުރާ ވޭޕްކުރުމަށް ބޭނުންކުރާ ތަކެތީގެ ޑިއުޓީ ބޮޑުކުރުމަށް ހުށަހަޅާފައިވާ އިސްލާހެއް،" އިސްލާހު އޮތްގޮތް ސާފު ކޮށްދެއްވާ އުޝާމް ވިދާޅުވި އެވެ.