ޝަހީމަށް "މުނާފިގަ"ށް ގޮވުމުން ޝަޒްރާގެ މައްސަލަ އެމްއެންޔޫ އަށް

އެއްވެސް ހައްގަކާ ނުލައި "މުނާފިގަ"ށް ގޮވާ އެކިއެކި ދޮގު ތުހުމަތުތައް ކޮށްފައިވާތީ ޑރ. ޝަޒްރާ އިބްރާހިމްގެ މައްސަލަ މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) އަށް ހުށައަޅުއްވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ޝަޒްރާ އަކީ އެމްއެންޔޫގެ ލެކްޗަރާ އެކެވެ. އޭނާ އާންމުންގެ ސަމާލު ކަމަށް އައީ ފަލަސްތީނުގައި އިޒްރޭލުން ހިންގާ ގަތުލު އާންމާއި ގުޅިގެން އިޒްރޭލަށް ފަންޑުކުރާ ވިޔަފާރިތައް ބޮއިކޮޓް ކުރުމަށް ގޮވާލާ ހިންގި އިހުތިޖާޖުންނެވެ. އެ އިހުތިޖާޖުގައި އޭނާއާ ދީނީ އިލްމުވެރިޔާ ޑރ. މުހައްމަދު އިޔާޒްގެ އަނބިކަނބަލުން އައިޝަތު ޝާދިޔާ ވަނީ ރާއްޖޭގައި ހުންނަ ސައުދީ އެމްބަސީ ކައިރީގައި ސިލްސިލާ އިހުތިޖާޖުތަކެއް ކޮށްފަ އެވެ.

އެ އިހުތިޖާޖުތައް ނުހުއްޓުމުން އެންމެ ފަހުން އެ ދެ މީހުން ވަނީ ހައްޔަރު ކޮށްފަ އެވެ. އެ މީހުން ހައްޔަރު ކުރީ ސައުދީގެ އެންގުމަށް ކަމަށް ވެސް ތުހުމަތު ކޮށްފައިވެ އެވެ. އަދި އެ ދެ މީހުން ވަނީ މިނިސްޓަރު ޝަހީމަށް ވެސް ގިނަ ތުހުމަތުތަކެއް ކޮށްފަ އެވެ.

ފަލަސްތީނާ ދެކޮޅަށް އިޒްރޭލުން ޖަރީމާ ހިންގަނީ އެމެރިކާގެ ފުރިހަމަ މަދަދާ ތާއީދު ލިބިގެންނެވެ. އެކަން އެހެން އޮއްވާ ފަލަސްތީނުގެ ހައްގުގައި ވަރަށް މަސައްކަތް ކުރާ ކަމަށް ބުނާ މި ސަރުކާރުގައި އެމްއެންޔޫ އިން ވަނީ އެމެރިކާ މީހުންނަށް ދައުވަތު ދީ ދިވެހީންނަށް ޓެރަރިޒަމް ކިޔަވައިދީފަ އެވެ. އަދި އެމެރިކާގެ ސަފީރު، ހޫގޯ ޔޮން އާ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ބައްދަލު ކުރައްވާފަ އެވެ. އެކަމަށް ވަރަށް ބޮޑަށް ފާޑުކިޔުން އެބަ އޮތެވެ.

ޝަޒްރާ ވަނީ ޝަހީމަށް ފާޑުވިދާޅުވެ ޕޯސްޓެއް ކުރައްވާފަ އެވެ. އެ ޕޯސްޓާއި ގުޅިގެން ޝަހީމް ވަނީ އަންހެން މީހާއަށް ތުހުމަތުތަކެއް ކުރައްވާ އޭނާގެ މައްސަލަ އެމްއެންޔޫއަށް ހުށައަޅުއްވާނެ ކަމަށް ވިދާޅުވެފަ އެވެ. ވިދާޅުވީ ޝަޒްރާ އަކީ ހޫތީންގެ ޑޮކިއުމަންޓްތައް ތަރުޖަމާކޮށް ގޭގެއަށް އަޅާ އަންހެނެއް ކަމަށެވެ.

"މި އަންހެން މީހާ [ޑރ. ޝަޒްރާ] ގެ މައްސަލަ ރަސްމީކޮށް އެމްއެންޔޫއަށް ހުށައަޅާނަން،" އެ މައްސަލަ މިއަދު ހުށައަޅާނެ ކަމަށް ވިދާޅުވެ ޝަހީމް ލިޔުއްވާގައިވެ އެވެ.

އޭނާ ވިދާޅުވި ގޮތުގައި ޝަޒްރާ ގެންދަވަނީ އެއްވެސް ހައްގަކާ ނުލައި އޭނާއަށް "މުނާފިގަ"ށް ގޮވާ އެކި ދޮގު ވާހަކަތައް ޕޯސްޓް ކުރަމުންނެވެ.