ވަޒީފާތަކެއް ހޯދައިގެން ސަރުކާރާ ގުޅެން ރައީސް ހުށަހެޅުއްވި: ހަސަން
ރައީސުލްޖުމްހޫރިއްޔާ ޑރ.މުހައްމަދު މުއިއްޒާއެކު ސަރުކާރާ ގުޅި ވަޒީފާތަކެއް ހޯދުމަށް މަޝްވަރާނުކުރައްވާ ކަމަށާއި، ނަަމަވެސް ވަޒީފާތަކެއް ހޯދައިގެން ސަރުކާރާ ގުޅުމަށް ރައީސް މުއިއްޒު ޑިމޮކްރެޓްސްއަށް ހުށަހެޅުއްވި ކަމުގައި ހަސަން ވިދާޅުވި.
ޑިމޮކްރެޓްސް ޕާޓީން ވަޒީފާތަކެއް ސަރުކާރުގެ ތެރެއިން ހޯދައިގެން ސަރުކާރު ހިންގާ ކޯލިޝަނުގައި ބައިވެރިވުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދައުވަތު ދެއްވިކަމަށް އެ ޕާޓީގެ ރައީސް ހަސަން ލަތީފު ވިދާޅުވެއްޖެ އެވެ.
އިއްޔެ ރާއްޖެޓީވީގެ ޕްރޮގުރާމެއްގައި ވާހަކަދައްކަވަމުން ހަސަން ވިދާޅުވީ ޑިމޮކްރެޓްސްއަކީ ސަރުކާރުގެ ބައިވެރިއެއް ނޫން ކަމަށެވެ. އަދި ސަރުކާރާ ބައިވެރިނުވާނަމަ ދެން ހަރަކާތްތެރިވެވޭނީ އިދިކޮޅު ޕާޓީއެއްގެ ގޮތުގައިކަން ފާހަގަކުރައްވައި އޭނާ ވިދާޅުވީ ރާއްޖޭގެ ސިޔާސީ މަސްރަހު އޮތްގޮތުން އެ ދެމެދުގައި ސިޔާސީ ޕާޓީއަކަށް ނޯވެވޭނެ ކަމަށެވެ.
"އަޅުގަނޑު ގަބޫލުކުރާ ގޮތުގައި ޑިމޮކްރެޓްސްއަކީ އިދިކޮޅު ސިޔާސީ ޕާޓީއެއް. އަޅުގަނޑު ގަބޫލުކުރަނީ ޕޮލިޓިކަލް ސްޕެކްޓްރަމްގައި ސަރުކާއެކު އޮތް ޕާޓީއެއް ނޫނިއްޔާ ހުންނާނީ އިދިކޮޅު ސިޔާސީ ޕާޓީތައް،" ހަސަން ލަތީފު ވިދާޅުވި އެވެ.
ރިޔާސީ އިންތިހާބުގެ ކުރިން ހުރިހާ ޕާޓީތަކާ މަޝްވަރާކުރެއްވިކަމަށާއި، ރިޔާސީ އިންތިހާބުގެ ކުރިން ޑިމޮކްރެޓްސްއިން އެންމެ ބޮޑަށް މަޝްވަރާކުރީ އެއިރުގެ އިދިކޮޅު އެންމެ ޕާޓީކަމަށްވާ ޕީޕީއެމާއެކު ކަމަށާއި، ނަމަވެސް އިންޑިޔާ އައުޓް ފަދަ ބައެއް ކަންކަމުގައި އެއިރު އެ ޕާޓީގެ ލީޑަރުގެ ގޮތުގައި ހުންނެވި ރައީސް އަބްދުﷲ ޔާމީން ދޫދެއްވަން ބޭނުންފުޅުނުވުމުން އެ މަޝްވަރާތައް ހުއްޓުނީ ކަމަށްވެސް ހަސަން ވިދާޅުވި އެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒާއެކު ސަރުކާރާ ގުޅި ވަޒީފާތަކެއް ހޯދުމަށް މަޝްވަރާނުކުރައްވާ ކަމަށާއި، ނަަމަވެސް ވަޒީފާތަކެއް ހޯދައިގެން ސަރުކާރާ ގުޅުމަށް ރައީސް މުއިއްޒު ޑިމޮކްރެޓްސްއަށް ހުށަހެޅުއްވި ކަމުގައި ހަސަން ވިދާޅުވި އެވެ.
އޭނާ އިތުރަށް ވިދާޅުވީ ޑިމޮކްރެޓްސްއިން ބޭނުންވީ ވަޒީފާތަކެއް ނޫންކަމަށާއި، ނަމަވެސް އެ ޕާޓީގެ ސިޔާސަތުތައް ހިންގުމަށް ކަމަށެވެ. އަދި އެ ސިޔާސަތުތައް ހިންގުމަށް ސަރުކާރުގެ ތެރެއިން ވަޒީފާތަކެއް ހަމަޖައްސަވައިފިނަމަ ގަބޫލުނުކުރައްވާނެ ކަމަށް ވިދާޅުނުވާ ކަމަށާއި، ނަމަވެސް ކުންފުނިތަކާއި މުއައްސަސާތަކުން އެވެނި އަދަދަކަށް ވަޒީފާ ދިނުމުން ސަރުކާރާ ބައިވެރިވުމަކީ އެ ޕާޓީން ގަބޫލުކުރާ އުސޫލެއް ނޫން ކަމަށެވެ.
"ރައީސުލްޖުމްހޫރިއްޔާ އެދިވަޑައިގެންނެވި އަޅުގަނޑުމެންނަށް ވަޒީފާތަކެއް އޮފާކުރައްވާފައި ސަރުކާރުގައި ބައިވެރިވުމަށް،" ހަސަން ވިދާޅުވި އެވެ.
"އަޅުގަނޑުމެން ދެންނެވި ވާހަކައަކީ ވަޒީފާތަކެއް ނޫނޭ ބޭނުންވެގެން މިއުޅެނީ ކޮންމެހެން. ބޭނުންވެގެން މިއުޅެނީ ސިޔާސަތުތަކެއް ތަންފީޒުކުރުމޭ. ޕާޓީގެ ސިޔާސަތުތައް ތަންފީޒުކުރެވޭ ގޮތަށް ސަރުކާރުގެ ސިޔާސަތުތައް އެކުލަވައިލުން މާ ރަނގަޅޭ،"
ކޮމެންޓް
Republic of Maldives