މުޅި ރާއްޖޭގައި ފަސް މިލިއަން ގަސް | އެމްޕީއެލް އެކަނި އެއް މިލިއަން
ސީއީއޯ ވަޖީހު ވިދާޅުވީ އެމްޕީއެލްގެ އަމާޒަކީ އެއް މިލިއަން ގަސް އިންދުމެވެ. މި ހަފުތާގައި 10،000 ގަސް އިންދާނެ އެވެ.
މުޅިރާއްޖޭގައި ފަސް މިލިއަން ގަސް އިންދުމުގެ ކެމްޕޭނެއް މި އަހަރުގެ ދުނިޔޭގެ ތިމާވެށީގެ ދުވަހުގެ މުނާސަބަތާއި ގުޅުވައިގެން ރައީސް ޑރ. މުޙައްމަދު މުޢިއްޒު ވަނީ ފައްޓަވާފަ އެވެ. މި ކެމްޕޭނަށް ހިތްވަރުދިނުމުގެ ގޮތުން އެމްޕީއެލް އިން އެކަނި އެއް މިލިއަން ގަސް އިންދަން ނިންމައިފި އެވެ.
ފަސް މިލިއަން ގަސް އިންދުމަކީ ރައީސް ޑރ. މުއިއްޒުގެ ކެމްޕޭން ވައުދުގައި ހިމެނޭ ކަމެކެވެ.
ގަސް އިންދުން އެމްޕީއެލް އިން އިއްޔެ ފެށީ ތިލަފުށީގައި މާލެ ވިޔަފާރި ބަނދަރު ބަދަލު ކުރާ ސަރަހައްދުންނެވެ. ގަސް އިންދަން ފަށަން އިއްޔެ އެތަނުގައި ބޭއްވި ރަސްމިއްޔާތެއްގައި އެމްޕީއެލްގެ ސީއީއޯ / އެމްޑީ މުޙައްމަދު ވަޖީހް އިބްރާހިމް ވިދާޅުވީ ފަސް މިލިއަން ގަސް އިންދުމުގެ ޕްރޮގްރާމަކީ ރާއްޖޭގެ ތިމާވެށި އަންނަން އޮތް ޖީލުތަކަށް ހެޔޮ ގޮތުގައި ދަމަހައްޓައި ގަސްގަހާ ގެހި ރައްކާތެރިކޮށް އިތުރުކުރުމުގެ މުހިންމުކަން ދެނެގަނެ ސަރުކާރުން ފެށި މުހިންމު ޕްރޮގްރާމެއް ކަމަށެވެ.
މި މަސައްކަތުގައި އެމްޕީއެލްގެ ހުރިހާ ޑިޕާޓްމަންޓްތަކާއި ރީޖަނަލް ޕޯޓްތަކުން ބައިވެރިވާނެ ކަމަށް އޭނާ ވިދާޅުވި އެވެ. އަދި މީގެ އިތުރުން ރާއްޖޭގެ ހުރިހާ ކައުންސިލްތަކާއި، އެކި ކްލަބު ޖަމިއްޔަތަކާއި ގުޅިގެން އެމް.ޕީ.އެލްއިން ގަސް އިންދުމުގެ ޕްރޮގްރާމް ކުރިއަށް ގެނަދަން ސީއީއޯ ވަޖީހު ގޮވާލެއްވި އެވެ.
"އަޅުގަނޑުމެންގެ އަމާޒަކީ ދިވެހިރާއްޖޭގެ ހުރިހާ އަތޮޅުތަކެއްގެ ބައިވެރިވުމާއެކު މިކަން އެއް މިލިއަން ހާސިލްކުރުން،" ސީއީއޯ ވަޖީހް ވިދާޅުވި އެވެ.
އެއް މިލިއަން ގަސް އިންދުމުގެ މަސައްކަތުގެ ތެރެއިން އެމްޕީއެލްއިން ވަނީ މި ހަފުތާގެ ތެރޭގައި 10،000 ގަސް އިންދުމަށް ނިންމައިފަ އެވެ.
މި ރަސްމިއްޔާތުގައި ވާހަކަދައްކަވަމުން މޫސުމީ ބަދަލުތަކާއި ތިމާވެއްޓާއި ބެހޭ ވަޒީރު ތޯރިގު ވިދާޅުވީ ފަސް މިލިއަން ގަސް އިންދުމުގެ ޕްރޮގްރާމްގެ ދަށުން މިހާތަނަށް އެންމެ ގިނަ ގަސް އިންދުމަށް ޕްލެޖްކުރީ އެމްޕީ.ލް ކަމަށެވެ. އަދި މިކަމަކީ އެމްޕީއެލްގެ ފަދަ އެސްއޯއީއަކުން އިސްނަގައިގެންކުރާ ވަރަށް މުހިންމު މަސައްކަތެއް ކަމަށެވެ.
ކޮމެންޓް
Republic of Maldives