"ތިބީ ޔާމީން އަރިހުން ދަރިވަރުވި ބޭފުޅުން، ދެން ވެސް ވާނީ ކުރިން ވީ ގޮތް"

ކުރީގެ ރައީސް އަބްދުﷲ ޔާމީން، ވެރިކަމާ ހަވާލުވެވަޑައިގަތްއިރު އެކައުންޓްގައި އެއްވެސް ފައިސާއެއް ނުހުންނާނެ ކަމަށާއި، ވެރިކަން ނިމިވަޑައިގަތްއިރު މިލިއަނުން ފައިސާ ހުރި ކަމަށް މިހާރުގެ ވެރިން ވާހަކަ ދައްކަވާއިރު، އެމީހުން ވެސް ނުހައްގު މުއްސަނދިކަން ހޯއްދަވަމުން ގެންދަވާ ކަމަށް ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ތުހުމަތު ކުރައްވައިފި އެވެ.

އެމްޑީޕީން މިދިޔަ ބުރާސްފަތި ދުވަހުގެ ރޭ ބޭއްވި ހަރުގެ ޖަލްސާގައި ވާހަކަ ދައްކަވަމުން ނާޒިލް ވިދާޅުވީ މިހާރުގެ ވެރިންނަކީ ރައީސް ޔާމީންގެ އަރިހުން ދަރިވަރުވެފައި ތިބި ބޭފުޅުން ކަމަށެވެ. މިހާރު ވެސް އިސް މަގާމުތަކުގައި ތިއްބެވި ބޭފުޅުން ހުޅުމާލޭން ބިން ގަންނަ ވާހަކައާއި އިންވެސްޓް ކުރާ ވާހަކަތައް އަޑުއިވެމުންދާ ކަމަށެވެ.

ރައީސް ޔާމީނަށް ތުހުމަތު ކުރައްވައި، ވެރިކަމުން ފައިބާވަޑައިގެންނެވިއިރު އެކައުންޓްގައި 500 މިލިއަން ރުފިޔާއަށްވުރެ ގިނައިން ހުރި ކަމަށް ސަރުކާރުގެ އިސް މަގާމުތަކުގައި ތިބި ބޭފުޅުން ތުހުމަތުކުރެއްވިކަން ފާހަގަކުރައްވަމުން ނާޒިލް ވިދާޅުވީ އެ ބޭފުޅުންގެ އެކައުންޓްތަކުގައި ވެސް ވެރިކަން ނިމޭއިރު ހަމަ އެވަރަށް ފައިސާ ހުންނާނެ ކަމަށެވެ.

"ހަމައެގޮތަށް ނޫންތޯ ތަމްރީނުވެފަ ތަރުބިއްޔަތުވެފަ މިތިބީ؟ އެގޮތަށް ނޫންތޯ އެކަންތައް ކުރާނީ؟ އެ ސްކޫލުން ދަރިވަރުވީ، ކޯސް ހެދީ އެތާނގަ. އެކޯހުގެ ނަތީޖާ މިހާރުވެސް ސްކޫލަށްދާ ވާހަކައާ ނަތީޖާ ނެރޭ ވާހަކަ އެބަ ދައްކާ، އެއީ އެ ނަތީޖާ އަކީ. ކިތަންމެ ވަރަކަށް ކިޔާ ދިނަސް އެބޭފުޅުންނަކަށް ނޯންނާނެ އެހެން ގޮތެއް. ހަމަ އޮންނާނީ ދަސްވެފަ އޮތް ގޮތް،" ނާޒިލް ވިދާޅުވި އެވެ.

ނާޒިލް ވިދާޅުވީ ގައުމުގެ އިގުތިސޯދު 4.3 ޕަސެންޓްގަ ކުރިއަރަމުންދާ ވާހަކަ ދެއްކި ނަމަވެސް ލިބޭ ފައިސާ ފެންނަން ނެތް ކަމަށެވެ. އެފައިސާއަށް ވަމުންދާ ގޮތް ނޭންގޭ ކަމަށެވެ. އެކަން އެވަނީ ސަރުކާރަށް ފައިސާ މެނޭޖް ކުރަން ނޭންގޭތީ ކަމަށާއި، ރައްޔިތުންނަށްޓަކައި ހެޔޮ ހިތުން މަސައްކަތް ކޮށްދޭނެ އެއްވެސް ބޭފުޅަކު ރައީސް ޑރ. މުހައްމަދު މުއިއްޒުގެ އަރިހުގައި ނެތް ކަމަށެވެ.

ރައްޔިތުންނަށް ކަންކަން ކޮށްދިނުމަށް ޓެކްސް ބޮޑުކުރަން ސަރުކާރުން ނިންމާފައިވާއިރު، ޓެކްސް ބޮޑުކޮށްފިނަމަ އަންނަ އަހަރުގެ ބަޖެޓަށް 963.4 މިލިއަން ރުފިޔާ އިތުރުވާނެ ކަމަށް ވެސް އޭނާ ވިދާޅުވި އެވެ. 

"އެހެންވީމް މިއާ އަޅުގަނޑުމެން ގަބޫލެއް ނޫން. ޓެކްސް ބޮޑުކޮށްގެން ލިބޭ ފައިދާއެއް ނޭންގެ، ގައުމުގެ އިގުތިސޯދު 4.3 ޕަސެންޓުގަ ކުރިއަރަމުން އެބަދޭ. އެކަމަކު ފައިސާ ފޮއްޗެއް ނެތް. ހުސްވެއްޖެ، މެނޭޖް ކުރާކަށް ނޭންގެ، ހެޔޮހިތުން ރައްޔިތުންނަށްޓަކާ މަސައްކަތް ކުރާނެ އިހުލާސްތެރި އެކަކުވެސް ނެތް އެތާކު ނެތް،" ނާޒިލް ތުހުމަތު ކުރެއްވި އެވެ.