ބައްސާމުގެ އެޕާޓުމެންޓުތައް ފުލުހުންނާ ހަވާލުކުރަން އެންގި މައްސަލަ ހައިކޯޓުން ބޭރުކޮށްލައިފި

ފުޓްބޯލް އެސޯސިއޭޝަން އޮފް މޯލްޑިވްސްގެ ކުރީގެ ރައީސް ބައްސާމް އަދީލު ޖަލީލު ހުޅުމާލޭގެ އަމީން އެވެނިއުއިން ބައްލަަވައިގަނެފައިވާ ދެ އެޕާޓުމެންޓު ފުލުހުންނާ ހަވާލުކުރަން އަންގައި ހުޅުމާލޭ މެޖިސްޓްރޭޓު ކޯޓުން ނެރުނު އަމުރު ހައިކޯޓުގައި ބައްސާމުގެ ފަރާތުން އިސްތިއުނާފު ކުރި މައްސަލަ އެ ކޯޓުން ބޭރުކޮށްލައިފި އެވެ.

މައްސަލައާ ގުޅިގެން ކުރިން ފުލުހުން މީޑިއާއަށް މައުލޫމާތު ދެމުން ބުނެފައިވަނީ އަމީން އެވެނިއުއިން ބައްސާމް ބައްލަވައިގަނެފައިވާ ދެ އެޕާޓުމެންޓު ފުލުހުންނާ ހަވާލުކުރުމަށް ފާއިތުވި ސެޕްޓެންބަރު މަހުގެ 28 ވަނަ ދުވަހު ކޯޓުން އަމުރުކޮށްފައިވާ ކަމަށެވެ. އެއީ 136 ގަޑި އިރުތެރޭ އެ އެޕާޓުމަންޓުތައް ފުލުހުންނާއި ހަވާލު ކުރުމަށް ކުރި އަމުރެކެވެ.

ނަމަވެސް އެޕާޓްމަންޓްތައް ހަވާލުކުރުން ފަސްކޮށްދިނުމަށް ސެޕްޓެމްބަރު މަހުގެ 29 ވަނަ ދުވަހު ބައްސާމްގެ ފަރާތުން ސިޓީއެއް ފުލުހުންނަށް ފޮނުވާފައިވެއެވެ. އަދި ބައްސާމްގެ ފަރާތުން އެދިފައިވާ ކަންކަމަށް ރިއާޔަތްކޮށް މިމަހުގެ ހަ ވަނަ ދުވަހުގެ ރޭގަނޑު 12:00 އާ ހަމަޔަށް އެ މުއްދަތު އިތުރުކޮށްދީފައިވާ ކަމަށް ފުލުހުން ވަނީ ބުނެފައެވެ.

އެކަމަކު މިމަހުގެ ހަތަރު ވަނަ ދުވަހު އަނެއްކާވެސް މި މަހުގެ 31 ވަނަ ދުވަހާ ހަމައަށް މުއްދަތު ދިނުމަށް ބައްސާމްގެ ވަކީލުންގެ ފަރާތުން ސިޓީއަކުން އެދިފައިވެ އެވެ. ބައްސާމް ފޮނުއްވި ސިޓީގައި ވިދާޅުވެފައިވަނީ އެ އެޕާޓުމެންޓުތައް ހަވާލުކޮށްފިނަމަަ އޭނާގެ ތުއްތު ދެކުދިން ގޮވައިގެން ވަންނާނެ ތަނެއް މިހާރު ނެތް ކަމަަށެވެ. އަދި އެ ސަބަބަށްޓަކައި އޭނާގެ އެޕާޓުމެންޓު ހަވާލުކުރުން ފަސްކޮށްދިނުމަށް އެދޭކަމަށް ބައްސާމުގެ ވަކީލު ފުލުހަށް ފޮނުވި ސިޓީގައި ބުނެފައިވެ އެވެ.

އޭގެ ފަހުން ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ، އެޕާޓްމެންޓްތަކަކީ ބޮޑެތި މީހުންނާއި އަދި ކުޑަކުދިން ވެސް ދިރިއުޅެމުންދާ އެޕާޓްމެންޓްތަކަކަށް ވާތީ ހާލަތަށް ރިއާޔަތް ކުރުމުގައި އިންސާނީ ކަރާމާތައް ހުރުމަތްތެރކޮށް ހިތައި ބައްސާމް އެދުނު ގޮތަށް ފަސްކޮށްދީފައިވާނެ ކަމަށެވެ.

މިކަމާ ގުޅިގެން އާންމުންގެ އެތައް ފާޑުކިޔުމެއް ފުލުހުންގެ މުއައްސަސާއަށް އަމާޒުވެފައިވަނިކޮށް، ހޯމަދުވަހުގެ ރޭ ފުލުހުން ނެރުނު ބަޔާނެއްގައި ބުނެފައިވަނީ ބައްސާމް އެދުނު މުއްދަތު އޭނާ އަށް ދެވެން ނެތް ކަމަށާ އަންގާރަދުވަހުގެ ރޭ 12:00ގެ ކުރިން އެޕާޓުމަންޓުތައް ހުސްކޮށް ފުލުހުންނާއި ހަވާލުކޮށްދިނުމަށް އަންގާފައިވާ ކަމަަށެވެ. އަދި މި ވަގުތުތެރޭގައި ހަވާލު ނުކޮށްފިނަމަ ގާނޫނީ އިމުގެ ތެރެއިން މި އެޕާޓުމެންޓުތައް ފުލުހުންގެ ބެލުމުގެ ދަށަށް ގެނައުމަށްޓަކައި އަޅަންޖެހޭ ފިޔަވަޅުތައް އަޅާނެ ކަމަށް ފުލުހުން ވަނީ ބުނެފައެވެ. 

ފުލުހުންގެ އެންގުމާ އެއްގޮތަށް އެރޭ ބައްސާމުވަނީ އެ ދެ އެޕާޓުމެންޓު ފުލުހުންގެ ހިދުމަތާ ހަވާލުކުރައްވާފަ އެވެ.
ބައްސާމުގެ ނަމުގައި އަމީން އެވެނިއުއިން ގަނެފައިވާ ދެ އެޕާޓުމެންޓަކަށް ފައިސާ ދައްކާފައިވަނީ އެފްއޭއެމްގެ ފައިސާއިންކަަން ތަހުގީގުން ދެނެގަނެވިފައިވާކަމަށް ފުލުހުން ކުރިން ބުނެފައިވެ އެވެ. އެ އެޕާޓުމެންޓުތަކަށް ފައިސާ ދެއްކުމަށް އެފްއޭއެމްގެ ފައިސާއިން ޖުމްލަ ތިން މިލިއަނަށްވުރެ ގިނަ ރުފިޔާ ބައްސާމު ބޭނުންކުރިކަމަށް ފުލުހުން ބުނެފައިވެ އެވެ.

އަމީން ކޮންސްޓްރަކްޝަނަށް އެ ފައިސާ ދެއްކުމަށްފަހު ފައިސާގެ އަސްލު އޮޅުވައިލުމަށް ލިޔެކިޔުންތައް ތައްޔާރުކޮށް މަނީ ލޯންޑާކުރުމުގެ އަމަލުތަކެއް ހިންގާފަ އެވެ. އެޕާޓުމެންޓު ގަތުމަށް ބައްސާމް ބޭނުންކުރި ދިވެހި ރުފިޔާއަކީ އެފްއޭއެމްއަށް ލިބުނު ފައިސާގެ ތެރެއިން ޑޮލަރު މާރުކުރުމަށް އެކި ކުންފުނިތަކަށް ދޫކުރި ފައިސާއިން އެފްއޭއެމްއަށް ލިބުނު ރުފިޔާކަމަށްވެސް ފުލުހުން ތުހުމަތުކުރެ އެވެ.

ބައްސާމްގެ ފަރާތުން ވަނީ އެ މައްސަލަ ހައިކޯޓަށް ގެންގޮސްފަ އެވެ. ނަމަވެސް ކޯޓުން ނިންމީ އެ މައްސަލަ ބަލައިނުގަތުމަށެވެ.