"އަންނަން އޮތް ޖީލުތަކުން ރައީސް މުއިއްޒުއާ މުހާތަބު ކުރާނީ ބޮޑުތަކުރުފާނުގެ ނަމުން"
ޕީއެންސީގެ ބައެއް ވެރީންނާއި އެ ޕާޓީއަށް ނިސްބަތްވާ ބައެއް މަޖިލީސް މެންބަރުން ރައީސް މުއިއްޒަށް ތައުރީފުކުރުމުގައި ވަނީ ހައްދުފަހަނައަޅާ ގޮސްފަ އެވެ.
އަންނަން އޮތް ޖީލުތަކުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ މުހާތަބު ކުރާނީ ބޮޑުތަކުރުފާނުގެ ނަމުން ކަމަށް ޕީއެންސީގެ ޕީޖީ ލީޑަރު / އިނގުރައިދޫ ދާއިރާގެ މެންބަރު އިބްރާހިމް ފަލާހް ވިދާޅުވެއްޖެ އެވެ.
އޭނާ މި މޭރުމުން ވާހަކަ ދެއްކީ މިއަދު އޮތް މަޖިލީހުގެ ޖަލްސާ ގައި ވާހަކަ ދައްކަމުންނެވެ. ޓެކްސް ބޮޑު ކުރުމުގެ ބިލަށް ވާހަކަ ދައްކަމުން ފަލާހު ވިދާޅުވީ މިއަދު އުމުރުން ފަސް އަހަރުގެ ކުދިންނަށް އެ ކުދިންގެ މައިންބަފައިންނަށް ރައީސް މުއިއްޒުގެ ވާހަކަ ކިޔައި ދޭނެ ކަމަށެވެ.
އަދި ވިދާޅުވީ އެ ދުވަހު އެ ކުދިން ދެވަނަ ބޮޑުތަކުރުފާނުގެ ނަމުން ރައީސް މުއިއްޒަށް މުހާތަބު ކުރާނެ ކަމަށް އޭނާ ވިދާޅުވި އެވެ. ފަލާހު ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވިއިރު ގައުމު އޮތް ހާލަތާއި އެމަނިކުފާނު ފައިބާ ވަޑައިގެންނެވިއިރު ގައުމުގެ ހާލަތު އޮތްގޮތް އެ ދުވަހުން މައިންބަފައިން އެ މީހުންގެ ކުދީންނަށް އެ ވާހަކަތައް ކިޔައިދޭނެ ކަމަށެވެ.
ޕީއެންސީގެ ބައެއް ވެރީންނާއި އެ ޕާޓީއަށް ނިސްބަތްވާ ބައެއް މަޖިލީސް މެންބަރުން ރައީސް މުއިއްޒަށް ތައުރީފުކުރުމުގައި ވަނީ ހައްދުފަހަނައަޅާ ގޮސްފަ އެވެ. އޭގެ ތެރެއިން އެއް ބޭފުޅަކީ ފަލާހެވެ. އޭނާ އަކީ ކުރީން ރައީސް އަބްދުﷲ ޔާމީނާއި އަދި އޭނާ ގުޅުނު ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ވެސް މި މޭރުމުން އެތައް ފަހަރަކު ތައުރީފު ކޮށްފައިވާ ބޭފުޅެކެވެ.
ނަމަވެސް މި ފަހުން ރައީސް ޔާމީނަށް އެންމެ ބޮޑެތި ތުހުމަތުތައް ކުރައްވާ އެންމެ ހުތުރުކޮށް ފާޑު ވިދާޅުވަނީ ފަލާހެވެ.
ކޮމެންޓް
Republic of Maldives