ތެލެސީމިއާ ހޮސްޕިޓާ އިމާރާތްކުރުމާ ގުޅޭ އެއްބަސްވުމުގައި ސޮއިކޮށްފި

ތެލެސީމިއާ ބައްޔަށް ފަރުވާ ދިނުމަށް ހާއްސަ ހޮސްޕިޓަލެއް ހުޅުމާލެއިން އެކަމަށް ހާއްސަކޮށްފައިވާ 72،000 އަކަފޫޓުގެ ބިމުގައި ތަރައްގީކުރުމަށް މެލޭޝިޔާގެ ކުންފުންޏަކާއެކު އެމްއޯޔޫއެއްގައ ސޮއިކޮށްފި އެވެ. 

ތެލެސީމިއާ ޕްރިވެންޝަން އެންޑް ކޮންޓްރޯލު މެނޭޖުމެންޓު މާސްޓާ ޕްލޭން އިފްތިތާހު ކުރުމަށް ކްރޮސް ރޯޑްސްގައި ރޭ ބޭއްވި ރަސްމިއްޔާތުގައި ތެލެސީމިއާ ހޮސްޕިޓަލުގެ އިންޖިނިއަރިންއާއި ޕްރޮކިއުމެންޓު އަދި ކޮންސްޓްރަކްޝަން އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ހެލްތު މިނިސްޓަރު އަބްދުﷲ ނާޒިމް އިބްރާހީމެވެ. 

އަދި ހޮސްޕިޓަލު ހިންގައި ބަލަހައްޓަން ހަމަޖެހިފައިވާ މެލޭޝިޔާގެ މެޑޯ އޭޝިޔާ ކުންފުނީގެ ފަރާތުން އެ ކުންފުނީގެ ސީއީއޯ ސްޓުއާޓް ޖޭ ވެނަރ ޕެކްގެ އާއި ޗިން ހިން އިންޖީނިއަރިން ގްރޫޕްގެ ސީއީއޯ ރޮޖަރ ލިމް ސްވީކިއެޓް އެއްބަސްވުމުގައި ސޮއިކުރައްވާފައިވެ އެވެ. އޭގެ އިތުރަށް ބައިނަލްއަގުވާމީ މިންގަނޑުތަކާ އެއްގޮތަށް ހޮސްޕިޓަލު އިމާރާތްކުރުމަށް މާލީ އަދި ފަންނީ އެހީތެރިކަން ފޯރުކޮށްދޭން ހަމަޖެހިފައިވާ ސައިނޯމާ އިންޖީނިއަރިން އިންޑަސްޓްރީގެ މެނޭޖިން ޑިރެކްޓާ ލިއު ޓާއޯވެސް ސޮއިކުރެއްވި އެވެ. 

މި ހޮސްޕިޓަލު ތަރައްގީކުރަނީ ހުޅުމާލޭގެ ދެވަނަ ފިޔަވަހީގަ އެވެ. އެ ހޮސްޕިޓަލުގައި އެންމެ ޒަމާނީ ވަސލަތްތަކާއި ތެލަސީމިއާ ބަލިމީހުންނަށް ބޭނުންވާ ފަރުވާތައް ދެވޭގޮތަށް، ލެބޯޓަރީއާއި ވޯޑުތަކުގެ އިތުރަށް ޕްރައިވެޓް ރޫމްތަކާއި އައިސީޔޫ އަދި އެކަހެރިކޮށްގެން ފަރުވާދެވޭނެ އިންތިޒާމުތަކާއި، ގުނަވަން ބަދަލުކުރުމާއި ބޯންމެރޯއަށް ޓްރާންސްޕްލާންޓު ޔުނިޓެއްވެސް ހުންނާނެ އެވެ.

ތެލަސީމިޔާ ބައްޔަށް ފަރުވާ ފޯރުކޮށްދޭ ރަނގަޅު ފެންވަރުގެ ހޮސްޕިޓަލެއް ރާއްޖޭގައި ގާއިމުކުރެއްވުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު 2023 ވަނަ އަހަރުގެ ރިޔާސީ އިންތިހާބުގައި ވެވަޑައިގެންފައިވާ ވައުދުފުޅެކެވެ.