ޑިވެލޮޕްމެންޓު ބޭންކުގެ ސަމާލުކަން 5 ދާއިރާއަކަށް | އަމާޒު ސަރަހައްދީ ފަރަގު ކުޑަކުރުމަށް

ދިވެހިރާއްޖޭގެ ފުރަތަަމަ ޑިވެލޮޕްމެންޓު ބޭންކުން ފަސް ދާއިރާއަކަށް ސަމާލުކަން ދީގެން މަސައްކަތްކުރާނެ ކަަމަށާއި، އެ ބޭންކުގެ އެއް އަމާޒަކީ ސަރަހައްދީ އަދި ފަރުދީ ތަނަވަސްކަމުގެ ފަރަގުތައް ކުޑަކުރުން ކަމަށް އިކޮނޮމިކް ޑިވެލޮޕްމެންޓު މިނިސްޓްރީން ބުނެފި އެވެ. 

އިކޮނޮމިކް މިނިސްޓަރު މުހައްމަދު ސައީދު މީސްމީީޑިޔާގައި ހިއްސާކުރެއްވި ޕޯސްޓެއްގައި ފާހަގަކުރައްވާފައިވަނީ މެދުފަންތީގެ އާމްދަނީ ލިބޭ ގައުކަމަކަށްވުމާ ގުޅިގެން ރާާއްޖެއަށް ކުރިން ލިބުނު އެހީއާއި ލުއި ގޮތްތަކުގައި ލިބުނު ދަރަނި މިހާރު ލިބުން ދަތިވެފައިވާ ކަމަށެވެ. އަދި ރާއްޖެއަކީ އިމްޕޯޓަށް ބަރޯސާވާ ގައުމަކަށްވާތީ ޖީޑީޕީގެ ނިސްބަތުން ރާއްޖޭގެ ބޭރު ފައިސާގެ ރިޒާވް އިތުރުނުވާއިރު، ރާއްޖޭގެ ދަރަނި ވަރަށް ބޮޑަށް އިތުރުވެފައިވާ ކަމަށެވެ. 

އެ ހަގީގަތްތަކުގެ މައްޗަށް ބުރަވެ، ރާއްޖޭގެ މާލީ ނިޒާމުގައި ދުރު ރާސްތާ ތަސައްވުރެއް އޮތް ބޭންކެއް އުފެއްދުމަަކީ ވަރށް މުހިއްމުކަމެއް ކަމަަށާއި، ޑިވެލޮޕްމެންޓު ބޭންކުވާނީ ރާއްޖޭގައި ހިދުމަތްދޭ މާލީ މުއައްސަސާތަކާއި، ބައިނަލްއަގުވާމީ މާލީ މުއައްސަސާތަކާއި އިންވެސްޓަރުންނާ ގުޅިގެން ރާއްޖޭގައި ހިންގާ ތަރައްގީގެ މަޝްރޫއުތަކަށް ފައިސާ ހޯދުމުގައި މުހިއްމު ބައިވެރިއަކަށް ކަމުގައި އެ މިނިސްޓްރީން ބުނެފައިވެ އެވެ. 

ރާއްޖެއަށް ޑިވެލޮޕްމެންޓު ބޭންކެއްގެ ބޭނުންތެރިކަން ބޮޑުވާ ސަބަބުތަކުގެ ތެރޭގައި އެ މިނިސްޓްރީން ފާހަގަކުރީ ރާއްޖޭގެ ގުދުރަތީ މުއްސަނދިކަން އަންނަން އޮތް ޖީލުތަކަަށް ވާސިލުކޮށްދިނުމާއި، ސަރަހައްދީ އަދި ފަރުދީ ތަނަވަސްކަމުގެ ފަރަގު ކުޑަކުރުމާއި، މަންފާއެއް ނުލިބި ގިނަ ދުވަސްވެފައިވާ ރަށްރަށާއި ފަޅުތައް ތަރައްގީކުރުން ފަދަ ކަންކަމެވެ. 

އަދި ފަތުރުވެރިކަމުގެ އިންފްރަސްޓްރަކްޗާ ބާވެ ހަލާކުވިޔަނުދިނުމާއި، ދައުލަތުން ހަރަދުކޮށްފައިވާ އުމްރާނީ ވަސީލަތްތައް މަރާމާތުކޮށް ބެލެހެއްޓުމާއި، ރަނގަޅުފެންވަރުގެ ބޯހިޔާވަހިކަމާއި، ވަޒްންވެރިވާނެ ޒަމާނީ މާހައުލު އުފެއްދުމާއި، ދުވަސްވީ މީހުންނަށް ޝަރަފުވެރިކަމާއެކު ދިރިއުޅެވޭނެ އިންތިޒާމުތައް ގާއިމުކުރުމާއި، ދައުލަތުގެ ދަރަނީގެ ބުރަ އަންނަން އޮތް ޖީލުތަކަށް ލުއިކުރުމަކީވެސް ޑިވެލޮޕްމެންޓު ބޭންކުގެ ބޭނުންތަކުގެ ތެރޭގައި މިނިސްޓްރީން ފާހަގަކުރި ކަންކަމެވެ. 

މިނިސްޓްރީން ބުނެފައިވަނީ ޑިވެލޮޕްމެންޓު ބޭންކެއްގެ ފައިދާއާމެދު މިނިސްޓްރީން ބުނެފައިވަނީ ރާއްޖޭގެ ވިޔަފާރި ބޭންކުތަކުން އަމާޒު ހިފަނީ ކުރު ރާސްތާގެ / މެދު ރާސްތާގެ ލޯނުތަކަށް އެކަނި ކަމަށެވެ. އެކަމުގެ ސބަބުން އިގުތިސާދު އޭގެ ފުރިހަމަ ދުވެލީގައި ކުރިއަށްދިއުމަށް ނުކުޅެދިފައިވާކަމަށްވެސް އެ މިނިސްޓްރީން ބުނެ އެވެ. 

ޑިވެލޮޕްމެންޓު ބޭންކުން ދަރަނީގެ ގޮތުގައި ފައިސާ ދޫކުރުމުގެ އިތުރަށް މާލީ އެހީއާއި ފަންނީ އެހީތެރިކަން ފޯރުކޮށްދިނުމުގެ އައު ގޮތްތައް ހޯދާނެ ކަމަށް މިނިސްޓްރީން ބުނެފައިވެ އެވެ. އަދި އެކަމުގައި ފަސް ދާއިރާއަކަށް އެ ބޭންކުން ސަމާލުކަން ދޭނެ އެވެ. 

އެ މިނިސްޓްރީން ބުނި ގޮތުގައި ޑިވެލޮޕްމެންޓު ބޭންކު ގާއިމުކުރެވުމުން ރާއްޖެއިން ބޭރުން ޑައިރެކްޓު އިންވެސްޓުމެންޓުތައް ގެނެވި ރާއްޖޭގެ މާލީ ނިޒާމު މެދުވެރިކޮށް ލިބެންހުރި ޑޮލަރުގެ އަދަދު އިތުރުކުރުމަށް ދޮރު ހުޅުވޭނެ ކަމަށެވެ. 

އަދި މާލީ ގޮތުން ދެކޮޅުޖެހޭ މަޝްރޫއުތަކަށް ޑިވެލޮޕްމެންޓު ބޭންކުން އިންވެސްޓުކުރުމުން އިގުތިސާދު ފުޅާވާނެ ކަމަށާއި، ޑިވެލޮޕްމެންޓު ބޭންކުގެ ބޭރު ފައިސާގެ ރިޒާވް އިތުރުވި ވަރަކަށް ދައުލަތުގެ ބޭރުގެ ފައިސާގެ ރިޒާވްއަށްވެސް ހެޔޮ ބަދަލެއް އަންނާނެ ކަމުގައި މިނިސްޓްރީން ދެކެ އެވެ.