މުވައްޒިފުންގެ އަދަދާ ގުޅޭގޮތުން ފަތުރަނީ ދޮގު، ބޭނުމަކީ ހަގީގަތް އޮޅުވާލުން: ތަރުޖަމާން

މި ސަރުކާރުގެ ސިޔާސީ މަގާމުތަކާއި، ސަރުކާރުގެ ކުންފުނިތަކަށް އިތުރަށް ވެއްދި މީހުންގެ ނަންބަރާއި ގުޅޭގޮތުން ފަތުރަނީ ދޮގު މައުލޫމާތުތަކެއް ކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާން ހީނާ ވަލީދު ވިދާޅުވެއްޖެ އެވެ.

ހީނާ މިހެން ވިދާޅުވީ އޮންލައިން ނޫހަކު އެފަދަ މައުލޫމާތުތަކެއް ގެނެސްދީފައިވާތީ އެވެ. އެ ނޫހުގެ ރިޕޯޓްގައިވާ ގޮތުން މި ސަރުކާރުގެ ސިޔާސީ މަގާމުތަކާއި، ސަރުކާރުގެ ކުންފުނިތަކަށް އިތުރަށް ވެއްދި މީހުންގެ އަދަދު ހުރީ 7،000 އިން މަތީގަ އެވެ.

ނަމަވެސް ހީނާ ވިދާޅުވީ އެއީ ބުހުތާނު ދޮގު ކަމަށެވެ. އަދި ވިދާޅުވީ ހިޔާލަށް އަންނަހާ ވާހަކައެއް އެއްވެސް ހަގީގަތެއް ބަލައިލުމެއް ނެތި ފެތުރުމަކީ ޒިންމާދާރު ނޫސްވެރިކަމެއް ނޫން ކަމަށެވެ.

"ހަމައެކަނި ސަރުކާރު ކުންފުނިތަކަށް ބެލި ނަމަވެސް 2023 ވަނަ އަހަރުގެ ފަހު ކުއާޓަރއަށް ވުރެ 2024 ވަނަ އަހަރުގެ ފުރަތަމަ ކުއާޓަރގައި ސަރުކާރު ކުންފުނިތަކުގެ މުވައްޒަފުންގެ ޢަދަދުން 1000 އަށްވުރެ ގިނަ މުވައްޒަފުން މަދުވެފައިވާކަން ޕީސީބީއިން ހާމަކޮށްފައިވާ ހިސާބުތަކުން އެނގޭ،" ފަތުރަމުން ދަނީ ދޮގު ވާހަަކަތަކެއް ކަން ފާހަގަ ކުރައްވާ ހީނާ ވިދާޅުވި އެވެ.

ހީނާ ވިދާޅުވި ގޮތުގައި މިފަދަ ދޮގު ހަބަރު ލިޔަނީ، ސަރުކާރުގެ ހަރަދުތައް ކުޑަކުރެއްވުމަށާ މިދިޔަ ފަސް އަހަރު ގައުމު ވައްޓާލާފައި އޮތް ދަރަނީގެ އަނދަވަޅުން ގައުމު ސަލާމަތް ކުރައްވަން ރައީސުލްޖުމްހޫރިއްޔާ ކުރައްވާ މަސައްކަތްޕުޅު ދިވެހި ރައްޔިތުން ބަލައިގަންނާތީ ކަމުގެ ހަގީގަތް އޮޅުވާލާށެވެ.

މި އަހަރުގެ ފުރަތަމަ ކުއާޓާގައި ދައުލަތުގެ ކުންފުނިތަކުގެ މުވައްޒަފުންގެ އަދަދު ނިމުނު އަހަރުގެ ފަހު ކުއާޓާއަށްވުރެ ހާހެއްހަައި ވަޒީފާއިން މަދުކޮށްފައިވާ ކަމަށް ހިސާބުތަކުން ދައްކަ އެވެ.

ދައުލަތުގެ ކުންފުނިތަކުގެ ހިންގުން ވިލަރެސްކުރާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އޮގަސްޓް 21 ގައި އާންމުކުރި ދައުލަތުގެ ކުންފުނިތަކުގް 2024 ވަނަ އަހަރުގެ ފުރަތަމަ ކުއާޓާގެ ރިޕޯޓުގެ ހުލާސާގައި ބުނެފައިވަނީ މި އަހަރުގެ ފުރަތަމަ ކުއާޓާ ނިމުނުއިރު ދައުލަތުގެ ކުންފުނިތަކުގެ މުވައްޒަފުންގެ އަދަދަކީ 33،284 ކަމަށެވެ. ފާއިތުވި އަހަރުގެ ފަހު ކުއާޓާގެ ރިޕޯޓުގައި ބުނެފައިވާ ގޮތުން އެ އަހަރު ނިމުނުއިރު ދައުލަތުގެ ކުންފުނިތަކުގެ ވަޒީފާތަކުގެ އަދަދު 34،369 އަށް އަރައެވެ. އެހެންކަމުން މި އަހަރުގެ ފުރަތަމަ ކުއާޓާ ނިމުނުއިރު 1،085 ވަޒީފާ މަދުކޮށްފައިވެ އެވެ.

ސަރުކާރު ކުންފުނިތަކުގެ ތެރެއިން ފުރަތަމަ ކުއާޓާގައި އެންމެ ބޮޑު އަދަދަކަށް ވަޒީފާ މަދުވީ ފެނަކައިންނެވެ. 2023 ވަނަ އަހަރު ނިމުނުއިރު އެ ކުންފުނީގައި 7،132 މުވައްޒަފުން ތިއްބެވެ. މި އަހަރުގެ ފުރަތަމަ ކުއާޓާގައި އެ ކުންފުނީގެ މުވައްޒަފުންގެ އަދަދުވަނީ 6،543 އަށް މަދުވެފަ އެވެ. އެހެންކަމުން މި އަހަރުގެ ފުރަތަމަ ތިން މަސް ތެރޭގައި ފެނަކައިގެ މުވައްޒަފުންގެ ތެރެއިން 589 މުވައްޒަފުންވަނީ މަދުކޮށްފަ އެވެ. އެ ދުވަސްވަރު ފެނަކައިގެ ވަޒީފާއަށް ކޮންޓްރެކްޓު އުސޫލުން ނަގާފައި ތިބި ގިނަ މުވައްޒަފުންތަކެއްގެ ކޮންޓްރެކްޓު މުއްދަތު ހަމަވުމާއެކު ކުންފުނީގެ މާލީ ހާލަތަށް ރިއާޔަތްކޮށް އެ މުވައްޒަފުން ކުރާނެ މަސައްކަތެއްވެސް ނެތުމާއެކު ކޮންޓުރެކްޓުތައް އާނުކުރަން ނިންމި އެވެ.

ފެނަކައިގެ އިތުރަށް ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ)ގެ މުވައްޒަފުންގެ އަދަދުވެސް އަހަރުގެ ފުރަތަމަ ކުއާޓާގައި މަދުކޮށްފައިވެ އެވެ. 2023 ނިމުނުއިރު އެ ކުންފުނީގައި 2،239 މުވައްޒަފުން ތިބި ނަމަވެސް މި އަހަރުގެ ފުރަތަމަ ކުއާޓާ ނިމުނުއިރު އެ އަދަދުވަނީ 1،682 އަށް މަދުވެފަ އެވެ. އެހެންކަމުން ފާއިތުވި އަހަރު ނިމުނުއިރާ އަޅާބަލާއިރު އެޗްޑީސީގެ މުވައްޒަފުންގެ އަދަދު މި އަހަރުގެ ފުރަތަމަ ކުއާޓާގައި 557 އިން މަދުވެފައިވެ އެވެ.