އެއާޕޯޓު ލަގޭޖު އުފުލާ ވެހިކަލެއް އެކްސިޑެންޓުވެ މީހަކު މަރުވެެއްޖެ

ވެލާނާ އިންޓަރނޭޝަނަލް އެއާޕޯޓުގެ ލަގެޖު އުފުލާ ވެހިކަލެއް އެކްސިޑެންޓުވެ، މީހަކު މަރުވެއްޖެ އެވެ.

ފުލުހުން ބުނީ އެއާޕޯޓު ލަގެޖު އުފުލާ ވެހިކަލެއް ދުއްވާފައި ދަނިކޮށް ލައިޓް އަދި ކެމެރާ ސްޓްރަކްޗާ ހަރުކޮށްފައިވާ ބުޑުގަނޑުގައި ޖެހި އެކްސިޑެންޓެއަ ހިނގާފައިވާ ކަމުގެ ރިޕޯޓު ލިބުނު ކަމަށެވެ.

މި އެކްސިޑެންޓުގައި ވެހިކަލް ދުއްވަން އިން މީހާ އެންމެ ފުރަތަމަ ގެންދިޔައީ އެއާޕޯޓު ކުލިނިކަށެވެ. އަދި އިތުރު ފަރުވާއަށް 9:28 ހާއިރު އައިޖީއެމްއެޗަށް ވަނީ ފޮނުވާފައެވެ.

އެހެން ނަމަވެސް ކުލިނިކަށް ގެންދިޔަ އިރުވެސް މީހާ މަރުވެފައިވާ ކަމަށް ފުލުހުންނަށް މައުލޫމާތު ދީފައިވާ ކަމަށް ފުލުހުން ބުންޏެވެ.

މަރުވެފައިވަނީ 45 އަހަރުގެ ދިވެހި ފިރިހެނެކެވެ. އޭނާގެ ބޭރުފުށުން އެއްވެސް ޒަހަމެއަ ފެންނަން ނެތް ކަމަށް ފުލުހުން ވަނީ ބުނެފައެވެ.

މި މައްސަލަ އާއި ގުޅިގެން ބަލަންޖެހޭ ކަންކަން ފުލުހުން ދަނީ ބަލަމުންނެވެ.