ސައުދީއަށް ކަނޑައަޅާ ދިވެހި ސަފީރުކަމަށް ސަރީރު
އޮސްޓްރޭލިއާގެ މޮނާޝް ޔުނިވަސިޓީން ފޮރިން އެފެއާޒް އެންޑް ޓްރޭޑުގެ ދާއިރާއިން މާސްޓާސް ހާސިލުކުރައްވާފައިވާ ސަރީރަކީ ރާއްޖޭގެ އެންމެ ތަޖުރިބާކާރު އެއް ޑިޕްލޮމެޓެވެ.
ސައުދީ އަރަބިއްޔާއަށް ދިވެހިރާއްޖެއިން ކަނޑައަޅުއްވާ ސަފީރުކަމަށް ގިނަ ދުވަހު ރާއްޖޭގެ ހާރިޖިއްޔާގައި ހިދުމަތްކުރައްވާފައިވާ ތަޖުރިބާކާރު ޑިޕްލޮމެޓު އަހްމަދު ސަރީރު އައްޔަންކުރެއްވުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރައްޔިތުންގެ މަޖިލީހަށް ނަންފުޅު ފޮނުއްވައިފި އެވެ.
1986 ވަނަ އަހަރުން ފެށިގެން ހާރިޖީ ދާއިރާގެ އެކި މަގާމުތައް ފުރުއްވާފައިވާ ސަރީރަކީ ރާއްޖޭގެ ޑިޕްލޮމެޓިކް މިޝަންތަކުގައި އެކި ފެންވަރުގެ މަގާމުތައް އަދާކުރައްވާފައިވާ، ހާރިޖީ ހިދުމަތުގެ ތަޖުރިބާ ބޮޑު ބޭފުޅެކެވެ.
ރައީސް އަބްދުﷲ ޔާމީނުގެ ވެރިކަމުގައި ދޮރިން ސެކްރެޓަރީގެ މަގާމު ފުރުއްވި ސަރީރަކީ އދ.އަށް ރާއްޖެއިން ކަނޑައަޅާފައި ހުންނަވާ ދާއިމީ މަންދޫބުގެ މަގާމުވެސް އަދާކުރައްވާފައިވާ ބޭފުޅެކެވެ. އަދި ބަންގުލަދޭޝަށް ރާއްޖެއިން ކަނޑައަޅާފައި ހުންނަވާ ސަފީރުކަމުގެ އިތުރަށް އެހެން ބައެއް ގައުމުތަކުގެ ސަފާރާތަކުގައިވެސް އެކި ފެންވަރުގައި އޭނާ މަސައްކަތް ކުރައްވާފައިވެ އެވެ.
އެންމެ ފަހުން ސަރީރު ހުންނެވީ އޯގަނައިޒޭޝަން އޮފް ދަ އިސްލާމިކް ކޮންފަރެންސް (އޯއައިސީ)ގެ ސެކްރެޓަރީ ޖެނެރަލްގެ އެޑްވައިޒަރެއްގެ ހައިސިއްޔަތުން އެ ޖަމްއިއްޔާގެ އޭޝިއަން އެފެއާޒް ޑިރެކްޓަރު ކަމުގަ އެވެ.
އޮސްޓްރޭލިއާގެ މޮނާޝް ޔުނިވަސިޓީން ފޮރިން އެފެއާޒް އެންޑް ޓްރޭޑުގެ ދާއިރާއިން މާސްޓާސް ހާސިލުކުރައްވާފައިވާ ސަރީރަކީ މިހާރު ރާއްޖޭގެ ހާރިޖީ ހިދުމަތުގެ ދާއިރާގައި ތިއްބެވި އެންމެ ތަޖުރިބާކާރު ޑިޕްލޮމެޓުންގެ ތެރޭގައި ހިމެނިވަޑައިގަންނަވާ ބޭފުޅެކެވެ.
ކޮމެންޓް
Republic of Maldives