ޝަކުވާ ބޮޑުވުމުން އައިޖީއެމްއެޗްގެ ނިންމުން ބަދަލުކޮށްފި
އައިޖީއެމްއެޗުން ނެރުނު ބަޔާނެއްގައި ވަނީ ކަންބޮޑުވުންތަކަށް ރިއާޔަތްކޮށް ކުރީން ވެސް އޮތްގޮތަށް އުސޫލު ބަދަލުކޮށްފައިވާ ކަމަށެވެ.
އައިޖީއެމްއެޗްގައި މަސައްކަތްކުރަމުން އަންނަަ މުވައްޒަފުންގެ ތެރެއިން މާބަނޑު އަންހެނުންނާއި ޅަދަރިމައިންނަށް ދެމުން އައި ޑިއުޓީގެ ފްލެކްސިބިލިޓީ ކަނޑައިލުމަށް އެ ހޮސްޕިޓަލުން ނިންމި ނިންމުން ބަދަލުކޮށްފި އެވެ.
އެ ހޮސްޕިޓަލުން ނެރުނު އެތެރޭގެ މެމޯއެއްގައި ބުނެފައިވަނީ އެ ހޮސްޕިޓަލުގައި މަސައްކަތްކުރާ މާބަނޑު އަންހެނުންނާއި ޅަދަރިމައިންނަށް ދެމުންއައި ފްލެކްސިބިލިޓީ ޑިއުޓީ ދިނުން ހުއްޓައިލުމަށް ނިންމާފައިވާ ކަމަށެވެ.
މެމޯގައި ބުނި ގޮތުގައި އެ ފްލެކްސިބިލިޓީ ޑިއުޓީ ދިނުން ހުއްޓައިލުމަށް ނިންމާފައިވަނީ އެތަނަކީ 24 ގަޑިއިރު ހިދުމަތް ދޭ ތަނަކަށްވާއިރު މިވަގުތުވެސް ވަރަށް ގިނަ މުވައްޒަފުން ފްލެކްސިބިލިޓީ ޑިއުޓީ އަދާކުރާތީ، ހިދުމަތްތައް ދިނުމަށް ދަތިވެ ބުރާއަރާތީ އެވެ.
އިތުރަށް މެމޯގައި ބުނެފައިވަނީ މިވަގުތު ފްލެކްސިބިލިޓީ ޑިއުޓީގައި ތިބި މުވައްޒަފުންނަށް އެ ޑިއުޓީގައި މަސައްކަަތްކުރުމަށް ދެ މަސްދުވަހުގެ މުހުލަތެއް ދޭނެ ކަމަށެވެ. އެއަށްފަހު ދެން އިތުރަށް ފްލެކްސިބިލިޓީ ޑިއުޓީ އެއްވެސް
މުވައްޒަފަކަށް ހަމަޖައްސައިނުދިނުމަށް ބުނެފައިވެ އެވެ.
ސިވިލް ސާވިސްގެ ގަވާއިދުގައި ބުނެފައިވަނީ މާބަނޑުވުމުގެ ސަބަބުން ނުވަތަ ޅަދަރިމައިވުމުގެ ސަބަބުން ކަނޑައަޅާފައިވާ ގަޑިތަކަށް އޮފީހަށް ނުކުމެ މަސައްކަތްކުރަން ދަތިވާ މުވައްޒަފުންނަށް ފްލެކްސިބަލްކޮށް މަސައްކަތްކުރެވޭނެ ވަގުތެއް ހަމަޖައްސައިދިނުމަށް އެދިއްޖެނަމަ އެ ގަވާއިދާ އެއްގޮތަށް އެ އިދާރާއެއްގެ އެމްއާރު އެމްޑީ ކޮމިޓިއަށް ހުށަހަޅައިގެން އެފަދަ އިންތިޒާމެއް ހަމަޖެއްސިދާނެ ކަމަށެވެ.
އައިޖީއެމްއެޗްގެ މި ނިންމުމާ ގުޅިގެން ނަން ނުޖެހުން ޝަރުތުކޮށް "މިރާ"އަށް މައުލޫމާތު ދިން އައިޖީއެމްއެޗްގެ ނަރުހެއް ބުނީ ނަރުހުންގެ 99 އިންސައްތައަކީ އަންހެނުން ކަމަށްވާއިރު ޅަދަރިމައިވުމުގެ ސަބަބުން ފްލެކްސިބިލިޓީ ނުލިބޭނަމަ ހިދުމަތުގައި ދެމިތިބެން ވަރަށް ގިނަ މުވައްޒިފުންނަށް ދަތިވާނެ ކަމަށެވެ.
އެ ނިންމުމަށް އާންމުންގެ ފާޑުކިޔުން ވެސް ބޮޑުވުމުން އައިޖީއެމްއެޗުން ނެރުނު ބަޔާނެއްގައި ވަނީ ކަންބޮޑުވުންތަކަށް ރިއާޔަތްކޮށް ކުރީން ވެސް އޮތްގޮތަށް އުސޫލު ބަދަލުކޮށްފައިވާ ކަމަށެވެ. އަދި ބުނީ އެ ހޮސްޕިޓަލުން ދޭ ހިދުމަތްތަކަށް ދަތިނުވާނެ ހެން މުވައްޒިފުން މަސައްކަތް ކުރުމުގައި ފަސޭހަގޮތްތައް ހަމަޖައްސައިދީ އެކަށީގެންވާ މާހައުލެއް ގާއިމު ކޮށްދޭނެ ކަމަށެވެ.
ކޮމެންޓް
Republic of Maldives