މުހިންމު ނިންމުމެއް: އެމްއެސްއެސްގެ ބޯޓުގައި މިފްކޯގެ މަސް އެކްސްޕޯޓް ކުރަނީ
ހަރަދު ކުޑަވެ، މިފްކޯގެ ސްޓޯރޭޖް ދަތިތަކަށް ހައްލެއް ލިބި، އެހެން މާކެޓްތަކަށް ފަސޭހަކަމާއެކު މިފްކޯއަށް ވާސިލްވުމުގެ ފުރުސަތު ހުޅުވިގެންދާނެ އެވެ.
މޯލްޑިވްސް ސްޓޭޓް ޝިޕިން (އެމްއެސްއެސް) ގެ ބޯޓުތަކުގައި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ މަހާއި މަހުގެ އުފެއްދުންތައް އެކްސްޕޯޓުކުރުމާއި ގުޅޭ ފަހުމުނާމާއެއްގައި އެމްއެސްއެސް އަދި މިފްކޯއިން މިއަދު ސޮއިކޮށްފި އެވެ.
މި ރަސްމިއްޔާތު އޮތީ މިއަދު ހަވީރު އެސްޓީއޯ ޓްރެއިނިންގް އިންސްޓްޓިއުޓްގައެވެ. އެމްއެސްއެސްގެ ފަރާތުން މި ފަހުމުނާމާގައި ސޮއި ކުރެއްވީ ކުންފުނީގެ މެނޭޖިންގް ޑިރެކްޓަރު އަހްމަދު ޝަރީފެވެ. މިފްކޯގެ ފަރާތުން މި ފަހުމުނާމާގައި ސޮއި ކުރެއްވީ މިފްކޯ ހިންގުމާ ހަވާލުވެހުންނެވި ސީއެފްއޯ އިލްޔާސް ހަނީފެވެ.
މި ފަހުމުނާމާއިގެ ދަށުން، މިފްކޯގެ މަސް ރާއްޖެއިން ބޭރަށް އެކްސްޕޯޓް ކުރުމަށް ބޭނުންވާ ހުރިހާ ލޮޖިސްޓިކްސް ސޮލިއުޝަންއެއް އެމްއެސްއެސް ފޯރުކޮށްދޭނެ އެވެ. މީގެ ތެރޭގައި ރާއްޖޭގެ އެކި ކަންކޮޅުތަކުގައި ހުންނަ މިފްކޯ ފެސިލިޓީތަކުން އެމްއެސްއެސްގެ ކޮންޓެއިނަރުތަކަށް މިފްކޯގެ ޕްރޮޑަކްޓްތަކުގެ ތެރެއިން ފުރޯޒަން ޓޫނާ, ކޭންޑް ޓޫނާ, ޓޫނާ ޕައުޗް އަދި ފިޝްމީލް ލޯޑުކޮށް، މި ކޮންޓެއިނަރުތައް އެމްއެސްއެސްގެ ލޯކަލް އިންޓާ އެޓޯލް ޓްރާންސްޕޯޓް ކުރާ ބޯޓު "އެމްއެސްއެސް އޯޕަލް" މެދުވެރިކޮށް މާލެ ގެނެސް، މިތަކެތި ރާއްޖެއިން ބޭރަށް ދަތުރުކުރާ އެމްއެސްއެސްގެ ފީޑާ ބޯޓުތަކުގައި އޭގެ މަންޒިލަށް އެކްސްޕޯޓް ކުރެވިގެންދާނެއެވެ.
މިއެއްބަސްވުމުގެ ސަބަބުން އެމްއެސްއެސް މެދުވެރިކޮށް ދުނިޔޭގެ ކޮންމެތަނަކަށްވެސް މަސް އެކްސްޕޯޓް ކުރުމުގެ ފުރުސަތު ފަހިވެގެންދާނެ ކަމަށް ވެސް ބުންޏެވެ.
ޒަމާނުއްސުރެ މިފްކޯއިން މަސް އެކްސްޕޯޓް ކުރަމުން އައީ، ސަޕްލައި ދޯނިފަހަރުގައި ޖަނަރޭޓާ ސެޓް ގުޅާ އެއަށް ރީފާ ކޮންޓެއިނަރު ލޯޑް ކޮށްގެން މާލެ ގެނެސް ނުވަތަ ރީފާ އުޅަނދުފަހަރަށް ބަލްކްކޮށް މަސް ލޯޑުކޮށްގެންނެވެ.
އެމްއެސްއެސްއާއެކު އަލަށް ފެށި މި އެއްބަސްވުމުގެ ސަބަބުން މީގެ ކުރިން މަސް އެކްސްޕޯޓް ކުރަމުން އައި ގޮތް ބަދަލުވެ، މިކަމަށް ދާ ހަރަދު ކުޑަވެ، މިފްކޯގެ ސްޓޯރޭޖް ދަތިތަކަށް ހައްލެއް ލިބި، އެހެން މާކެޓްތަކަށް ފަސޭހަކަމާއެކު މިފްކޯއަށް ވާސިލްވުމުގެ ފުރުސަތު ހުޅުވިގެންދާނެ އެވެ.
މި ހިދުމަތާއެކު މިފްކޯއާ މަސްވެރިކަމުގެ ސިނާއަތަށް ލިބޭނެ ފައިދާތައް:
* ހަރަދު ކުޑަވުން: މި ހިދުމަތް ފެށުމުން، މީގެ ކުރިން ރީފަލާ ކޮންޓެއިނާ ދޯންޏަކަށް ލޯޑުކޮށްގެން ކޫއްޑޫ – މާލެ – ތައިލެންޑަށް އެކްސްޕޯޓް ކުރަމުން ގެންދިޔަ އަގު ކުޑަވެގެންދާނެ އެވެ.
* އެފިޝަންސީ ރަނގަޅުވުން: އެމްއެސްއެސް މެދުވެރިކޮށް ލިބެނީ އަތޮޅުތެރޭގައި އަދި ރާއްޖެއިން ބޭރުގައި މަސް އެކްސްޕޯޓްކުރުމުގެ އެންޑް-ޓު-އެންޑް ލޮޖިސްޓިކްސް ސޮލިއުޝަން ކަމުން، މިފްކޯގެ އޮޕަރޭޝަންތައް ލުއިވެގެން ދާނެ އެވެ.
*މާކެޓް ޑައިވާސިފިކޭޝަން: އެމްއެސްއެސްގެ ގްލޯބަލް ނެޓްވޯކް މެދުވެރިކޮށް، މިފްކޯއަށް އާ މާކެޓްތައް ހޯދުމުގެ ފުރުސަތު ފަހިވެ، ދިވެހި މަހުގެ އުފެއްދުންތަކަށް އިތުރު ކަސްޓަމަރުން ލިބިގެންދާނެ އެވެ.
* އެންހޭންސްޑް އިންވެންޓްރީ މެނޭޖްމަންޓް: އެމްއެސްއެސްގެ ރީފާ ކޮންޓެއިނަރުތަކުގެ ސަބަބުން މިފްކޯއަށް ވަރަށް ބޮޑަށް ބޭނުންވެފައިވާ ސްޓޯރޭޖް ސޮލިއުޝަންތައް ލިބި، މިފްކޯގެ އިންވެންޓްރީ ފަސޭހަކަމާއެކު ބެލެހެއްޓޭނެ އިންތިޒާމް ހަމަޖެހިގެންދާނެ އެވެ. ހަމައެއާއިއެކު، މީގެ ކުރިން ބަލްކްކޮށް ރީފަރ ބޯޓުތަކަށް ލޯޑްކުރުމުގައި ދިމާވާ މައްސަލަތަކަށް އެއްކޮށް ހައްލު ލިބިގެންދާނެ އެވެ.
* އެކްސްޕޯޓް ވޮލިއުމް އިތުރުވުން: އެމްއެސްއެސް އިން ލަފާކުރާ ގޮތުގައި މި ހިދުމަތުގެ ސަބަބުން ރާއްޖެއިން ބޭރަށް އެކްސްޕޯޓް ކުރާ މިންވަރު ވަރަށް ބޮޑަށް އިތުރުވާނެ އެވެ.
* ރާއްޖޭގެ ޝިޕިން ހަރުދަނާކުރުން: މަސްވެރިކަން ކަހަލަ ދިވެހި ރާއްޖޭގެ މައިގަނޑު ސިނާއަތެއް ތަރައްޤީ ކުރުމަށް އެމްއެސްއެސް މުޙިއްމު ރޯލެއް އަދާކުރުމަކީ، އެމްއެސްއެސް ފުޅާކުރުމަށް ލިބިގެންދާ ފުރުސަތެކެވެ. ރާއްޖެއިން ބޭރުގެ ޝިޕިންލައިންތަކަށް ކުރާ ބަރޯސާ ކުޑަވެ، ގައުމީ ޝިޕިންގް ލައިން މެދުވެރިކޮށް ދުނިޔޭގެ ކޮންމެ މާކެޓަކަށްވެސް ހާއްސަ ޝިޕިންގް ރޫޓްތައް ހެދުމަށް ފުރުސަތު ލިބެއެވެ.
* ސީމްލެސް އެކްސްޕޯޓް އޮޕަރޭޝަންސް: އެމްއެސްއެސްގެ އޯލް އިންކްލޫސިވް ހިދުމަތުގެ ސަބަބުން، ސަރުކާއި އަދި ޕްރައިވެޓް ކުންފުނިތަކަށްވެސް މަހާއި މަހުގެ ބާވަތްތައް އެކްސްޕޯޓު ކުރުމަކީ ފަސޭހަ، ހަރުދަނާ އަދި އިތުބާރު ހިފޭ ހިދުމަތަކަށް ވެގެންދާނެ އެވެ. އެމްއެސްއެސް އިން މިފްކޯގެ މަސް އެކްސްޕޯޓު ކުރުމުގެ ޓެކްނިކަލް މަސައްކަތާއި ހަވާލުވުމުން، މިފްކޯގެ ކުރިން ހިނގަމުންދިޔަ އޮޕަރޭޝަން ލުއިވެ، މިފްކޯގެ މައިގަނޑު މަސައްކަތް ކަމުގައިވާ ދިވެހި މަހާއި މަހުގެ އުފެއްދުންތައް އުފެއްދުމުގެ މަސައްކަތަށް އިތުރަށް ސަމާލުވެ މަސްއޫލުވުމަށް ފުރުސަތު ލިބިގެންދާނެ އެވެ. މި ހިދުމަތުގެ ސަބަބުން އެމްއެސްއެސްއަށާއި މިފްކޯ އަދި ރާއްޖޭގެ އިގްތިސާދަށް، ހާއްސަ ކޮށް މަސްވެރިކަމުގެ ސިނާއަތަށް ފައިދާކުރާނެ އެވެ.
ކޮމެންޓް
Republic of Maldives