މާބަނޑު އަދި ޅަދަރިމައި މުވައްޒަފުންނަށް އައިޖީއެމްއެޗްގެ ލުއިތައް ކަނޑައިލުން، ނަރުހުންގެ އުދާސް ބޮޑު

އައިޖީއެމްއެޗްގައި މަސައްކަތްކުރަމުން އަންނަަ މުވައްޒަފުންގެ ތެރެއިން މާބަނޑު އަންހެނުންނާއި ޅަދަރިމައިންނަށް ދެމުން އައި ޑިއުޓީގެ ފްލެކްސިބިލިޓީ ކަނޑައިލުމަށް އެ ހޮސްޕިޓަލުން ނިންމުމާ ގުޅިގެން އެ ހޮސްޕިޓަލުގައި މަސައްކަތްކުރާ ވަރަށް ގިނަ ނަރުހުން ކަންބޮޑުވުން ފާޅުކޮށްފި އެވެ. 

އެ ހޮސްޕިޓަލުން ނެރުނު އެތެރޭގެ މެމޯއެއްގައި ބުނެފައިވަނީ އެ ހޮސްޕިޓަލުގައި މަސައްކަތްކުރާ މާބަނޑު އަންހެނުންނާއި ޅަދަރިމައިންނަށް ދެމުންއައި ފްލެކްސިބިލިޓީ ޑިއުޓީ ދިނުން ހުއްޓައިލުމަށް ނިންމާފައިވާ ކަމަށެވެ. 

މެމޯގައި ބުނި ގޮތުގައި އެ ފްލެކްސިބިލިޓީ ޑިއުޓީ ދިނުން ހުއްޓައިލުމަށް ނިންމާފައިވަނީ އެތަނަކީ 24 ގަޑިއިރު ހިދުމަތް ދޭ ތަނަކަށްވާއިރު މިވަގުތުވެސް ވަރަށް ގިނަ މުވައްޒަފުން ފްލެކްސިބިލިޓީ ޑިއުޓީ އަދާކުރާތީ، ހިދުމަތްތައް ދިނުމަށް ދަތިވެ ބުރާއަރާތީ އެވެ. 

އިތުރަށް މެމޯގައި ބުނެފައިވަނީ މިވަގުތު ފްލެކްސިބިލިޓީ ޑިއުޓީގައި ތިބި މުވައްޒަފުންނަށް އެ ޑިއުޓީގައި މަސައްކަަތްކުރުމަށް ދެ މަސްދުވަހުގެ މުހުލަތެއް ދޭނެ ކަމަށެވެ. އެއަށްފަހު ދެން އިތުރަށް ފްލެކްސިބިލިޓީ ޑިއުޓީ އެއްވެސް މުވައްޒަފަކަށް ހަމަޖައްސައިނުދިނުމަށް ބުނެފައިވެ އެވެ. 

ސިވިލް ސާވިސްގެ ގަވާއިދުގައި ބުނެފައިވަނީ މާބަނޑުވުމުގެ ސަބަބުން ނުވަތަ ޅަދަރިމައިވުމުގެ ސަބަބުން ކަނޑައަޅާފައިވާ ގަޑިތަކަށް އޮފީހަށް ނުކުމެ މަސައްކަތްކުރަން ދަތިވާ މުވައްޒަފުންނަށް ފްލެކްސިބަލްކޮށް މަސައްކަތްކުރެވޭނެ ވަގުތެއް ހަމަޖައްސައިދިނުމަށް އެދިއްޖެނަމަ އެ ގަވާއިދާ އެއްގޮތަށް އެ އިދާރާއެއްގެ އެމްއާރު އެމްޑީ ކޮމިޓިއަށް ހުށަހަޅައިގެން އެފަދަ އިންތިޒާމެއް ހަމަޖެއްސިދާނެ ކަމަށެވެ. 

އައިޖީއެމްއެޗްގެ މި ނިންމުމާ ގުޅިގެން ނަން ނުޖެހުން ޝަރުތުކޮށް "މިރާ"އަށް މައުލޫމާތު ދިން އައިޖީއެމްއެޗްގެ ނަރުހެއް ބުނީ ނަރުހުންގެ 99 އިންސައްތައަކީ އަންހެނުން ކަމަށްވާއިރު ޅަދަރިމައިވުމުގެ ސަބަބުން ފްލެކްސިބިލިޓީ ނުލިބޭނަމަ ހިދުމަތުގައި ދެމިތިބެން ވަރަށް ގިނަ މުވައްޒިފުންނަށް ދަތިވާނެ ކަމަށެވެ. 

"ފްލެކްސިބިލިޓީ ޑިއުޓީއަށް މިއެދެނީ އިތުރު ގޮތެއް ނެތިގެން. އަޅުގަނޑުމެންނަށްވެސް ދަރިން ބަލަމުން މިހާ ބުރަ މަސައްކަތެއް ކުރަން ފަސޭހައެއް ނޫން. އެހެންވެ އެކަމަށް ހޮސްޕިޓަލުން ކުރިން ރިއާޔަތްކޮށްދިން. ކޮންސިޑާކުރަންޖެހޭނެ ކަމެއް ކަމުގައި އަޅުގަނޑުމެން ދެކެން،" އޭނާ ބުންޏެވެ.

އިތުރު ނަރުހަކު ފާހަގަކުރީ ހޮސްޕިޓަލުން ފޯރުކޮށްދޭ ހިދުމަތުގެ ފެންވަރު އެއް މިންގަނޑެއްގައި ހިފަހެއްޓުމަށްޓަކައި މުވައްޒަފުންގެ ދުޅަހެޔޮކަމަށް ބަލަަންޖެހެ އެވެ. މުވައްޒަފުން ނަފުސާނީ ގޮތުންނާއި ޖިސްމާނީ ގޮތުން ދުޅަހެޔޮ ހާލުގައި ނެތި ރަނގަޅު އެކަށީގެންވާ ހިދުމަތެއް ފޯރުކޮށްދެވޭނެ ގޮތާ ގުޅޭ ގޮތުން އޭނާ ސުވާލުކުރި އެވެ. 

އޭނާ އިތުރަށް ބުނީ އުންމީދުކުރަނީ މިހާރު ގެނެސްފައިވާ ބަދަލު މުރާޖައާކޮށް ހޮސްޕިޓަލަށް ދިމާވެފައިވާ ދަތިތައް ހައްލުކުރާއިރު، މުވައްޒަފުންގެ ދުޅަހެޔޮކަމަށްވެސް ބަލައިގެން މުވައްޒަފުންނާއި ހޮސްޕިޓަލާއި ހިދުމަތް ހޯދާ މީހުންނަށްވެސް ގެއްލުންނުވާނެ ހުރިހާ ފަރާތްތަކުގެ ހައްގު ރައްކާތެރިކުރެވޭނެ ހައްލެއް ހޯދިގެން ދިއުން ކަމަށެވެ.