ކެފޭ އުސޫލުން ޑްރަގް ހިދުމަތްދީ ވިއްކަމުންދިޔަ ދެ މީހަކު ހައްޔަރުކޮށްފި

މާލޭގައި ކެފޭ އުސޫލުން މަސްތުވާތަކެތީގެ ހިދުމަތް ދެމުން އެތަކެތީގެ ވިޔަފާރި ކުރަމުން އައި ދެ މީހަކު ހައްޔަރުކޮށްފިއެވެ.

މަސްތިވާތަކެތި ގެންގުޅެ، ބޭނުންކޮށް އެތަކެތީގެ ވިޔަފާރި ކުރި މި މައްސަލައިގައި ހައްޔަރުކޮށްފައި ވަނީ މ. ރޫބީ، ހުސައިން ނިޔާޒް، 35އ، އާއި, ގ. ޕާކަރުހައުސް، އަބްދުﷲ ޖިނާހް 28އ، އެވެ.

މި ދެމީހުން ހައްޔަރުކޮށް ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރު ކުރުމުން ބަންދަށް ވަނީ ހަތް ދުވަސް ދީފައެވެ.

މި ދެ މީހުންގެ ބަންދު އަމުރުގައިވާގޮތުން މި ދެމީހުން ހުއްޓުވާފައިވަނީ ކެފޭ އުސޫލުން މަސްތުވާތަކެތީގެ ވިޔަފާރި ކުރަމުންދިޔަ ތަނެއްގެ ތެރެއިންނެވެ. 

އަމުރުގައިވާގޮތުން މި ދެމީހުން ތިބި މި ތަނުގެ ތެރެއިން ގިނަ އަދަދެއްގެ މަސްތުވާތަކެތި ވަނީ ފެނިފައެވެ. އަދި ދެ މީހުންގެ ކުޑަ ކަމުދާތަކެތި ވަނީ މަސްތުވާތަކެއްޗަށް ޕޮޒިޓިވްވެފައެވެ.

މި ދެމީހުންގެވެސް މިބާވަތުގެ ކުށުގެ ރެކޯޑްސް އޮންނަކަން އަމުރުގައި ވަނީ ފާހަގަކޮށްފައެވެ. 

މި ދެމީހުންގެ ފަރާތުން ވަނީ މި މައްސަލައިގެ ޝަރީއަތް އަވަސްކޮށްދިނުމަށް އެދިފައެވެ.