ކޫއްޑޫ ރަންވޭގެ މައްސަލަ ވަރަށް އަވަަހަށް ހައްލު ކުރެވޭނެ: އަމީން

ކޫއްޑޫ އެއާޕޯޓުގެ ރަންވޭ މައްސަލަ ހައްލުކުރުމުގެ މަސައްކަތް ފަށާފައިވާކަމަށް ޓްރާންސްޕޯޓު އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެ އެވެ. 

ކޫއްޑޫ އެއާޕޯޓުގެ ރަންވޭ ހަލާކުވެފައި އޮތުމުގެ ސަބަބުން ގައުމީ އެއާލައިން މޯލްޑިވްސްއިންވަނީ އެ އެއާޕޯޓަށް ދަތުރުކުރުން ވަގުތީ ގޮތުން ހުއްޓާލާފަ އެވެ. 

މޯލްޑިވިއަންގެ އިސްވެރިޔަކު ނަން ނުޖެހުން ޝަރުތުކުރައްވައި "މިރާ"އަށް މައުލޫމާތު ދެއްވި ގޮތުގައި ކޫއްޑޫގެ ރަންވޭ މަރާމާތުނުކުރާތާ މިހާރު ގާތްގަނޑަކަަށް ފަސް އަހަރުވެއްޖެ އެވެ. އެކަމުގެ ސަބަބުން ރަންވޭ އޮތީ ވަރަށް ބޮޑަށް ހަލާކުވެފައި ކަމަށް އޭނާ ވިދާޅުވި އެވެ.

"މޯލްޑިވިއަންގެ ދެ ފުލައިޓަކަށް ގެއްލުންވެއްޖެ. ގެއްލުންވުމުން މަރާމާތުކުރަން ވަރަށް ބޮޑެތި ހަރަދުކުރަންޖެހޭ. އެހެންވީމާ ކޫއްޑޫގެ ދަތުރުތައް މިވަގުތު ކުރުމަކީ ކުންފުންޏަށް ފީޒަބަލް ކަމެއް ނޫން،" އޭނާ ވިދާޅުވި އެވެ.

އެދުވަހު ކޫއްޑޫއަށް ޝެޑިއުލް ދަތުރުތައް ކުރި ނަމަަވެސް ޖެހިގެން އައި ދުވަހުން  ފެށިގެން ކޫއްޑޫއަށް ގައުމީ އެއާލައިނުން ދަތުރުނުކުރާނެ އެވެ. 

މިކަމާ ގުޅިގެން އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ މޯލްޑިވިއަންގެ ދަތުރުތައް ހުއްޓައިލީ ދިގު މުއްދަތަކަށް އެއާޕޯޓު މަރާމާތުކޮށް އާބާތުރަފިލުވާފައި ނެތުމުގެ ސަބަބުން، ރަންވޭގެ ހާލަތު ގޯސްވެ، އެ އެއާލައިނުގެ ދެ ބޯޓަކަށް ގެއްލުންވުމާ ގުޅިގެން ކަމަށެވެ. 

އެ މައްސަލަައާ ގުޅިގެން މިހާރު މިނިސްޓްރީން އިސްނަގައިގެން އެއާޕޯޓު އޮޕަރޭޓުކުރާ ކުންފުންޏާއި ސިވިލް އޭވިއޭޝަން އޮތޯރިޓީއާއި ގުޅުންހުރި އެހިނެހެން ފަރާތްތަކާއެކު މައްސަލަ ހައްލުކުރަން މަސައްކަތް ފަށާފައިވާ ކަމަށްވެސް އަމީނު ވިދާޅުވި އެވެ. 

"އިރާދަކުރެއްވިއްޔާ ވަރަށް އަވަހަށް މައްސަލަ ހައްލުކޮށް އެއާޕޯޓު އާންމު ހާލަތަށް ގެނެވޭނެ،" ރަންވޭ މަރާމާތުކޮށް މިހާރު ކުރިމަތިވެފައިވާ މައްސަލަތައް ހައްލުކޮށް ވަރަަށް އަވަހަށް އެއާޕޯޓަށް މޯލްޑިވިއަންގެ ދަތުރުތައް ފެށޭނެކަމުގެ ޔަގީންކަން ދެއްވައި މިނިސްޓަރު ވިދާޅުވެފައިވެ އެވެ. 

ހުވަދު އަތޮޅުގައި ހިންގާ ރިސޯޓުތަކުގެ ތެރެއިން އެންމެ ގިނަ ރިސޯޓު އޮތީ ހުވަދޫގެ އުތުރު ބުރީގަ އެވެ. އެ ރިސޯޓުތަކަށް ދާ ފަތުރުވެރިން ދަތުރުކުރަނީ ކޫއްޑޫ މަގުން ކަމަށްވާއިރު ފަތުރުވެރިކަމުގެ އެންމެ ބާރު ބޮޑުވާ ދުވަސްވަރު ކޫއްޑޫއަށް ދަތުރުކުރުން ހުއްޓައިލަންޖެހުމަކީ މޯލްޑިވިއަންއަށްވެސް އަދި ހުވަދޫގެ ފަތުރުވެރިކަމަށްވެސް ގެއްލުންވާނެ ކަމެކެވެ.

ކޫއްޑޫ އެއާޕޯޓު ތަރައްގީކޮށް ހިންގަނީ ޔޫރަޕުގެ މަޝްހޫރު ހޮޓެލް ކުންފުންޏެއްކަމަށްވާ "އެކޯ"އިންނެވެ. އެއާޕޯޓު ތަރައްގީކޮށް ހިންގުމަށް އެ ކުންފުންޏަށް ދެ ރަށް ރިސޯޓު ތަރައްގީކުރަން ދޫކޮށްފައިވެ އެވެ. އެ ދެ ރަށުގައިވެސް މިހާރު ރިސޯޓު އޮޕަރޭޓު ކުރެއެވެ.