ދައުލަތުގެ ޑޮލަރު އާމްދަނީ %13.6 އިތުރުވެ 800 މިލިއަން ޑޮލަރު ފަހަނައަޅައިފި

މި އަހަރުގެ ޖަނަވަރީން ސެޕްޓެންބަރުގެ ނިޔަލަށް ޑޮލަރުން ދައުލަތަށް ލިބުނު އާމްދަނީ ނިމުނު އަހަރަށްވުރެ 13.6 އިންސައްތަ އިތުރުވެފައިވާކަން މީރާގެ ހިސާބުތަކުން ދައްކައިފި އެވެ. 

މީރާގެ ހިސާބުތަކުން ދައްކާ ގޮތުގައި ނިމުނު އަހަރުގެ ސެޕްޓެމްބަރުގެ ނިޔަލަށް ދައުލަތަށް ޑޮލަރު އާމްދަނީގެ ގޮތުގައި ލިބުނީ 705.1 މިލިއަން ޑޮލަރެވެ. ނަމަވެސް މި އަހަރު 801.2 މިލިއަން ޑޮލަރު ލިބިފައިވެ އެވެ. އެހެންކަމުން ނިމުނު އަހަރަށްވުރެ އިތުރަށް 96 މިލިއަން ޑޮލަރު ދައުލަތަށް ލިބުނެވެ. 

ޑޮލަރުން އެންމެ ބޮޑު އާމްދަނީއެއް ލިބުނީ ޓެކުހުގެ ގޮތުގަ އެވެ. ޓެކުހުގެ ގޮތުގައި ޖުމްލަ 175.5 މިލިއަން ޑޮލަރު މި އަހަރު ލިބުނުއިރު އެއީ 2023 ގައި ލިބުނު 133.7 މިލިއަން ޑޮލަރަށްވުރެ ގާތްގަނޑަކަށް 42 މިލިއަން ޑޮލަރު އިތުރު އަދަދެކެެވެ. 

ޑޮލަރުން ލިބުނު ޓެކްސްގެ ތެރެއިން ޑިޕާޗާ ޓެކުހުގެ ގޮތުގައި ނިމުނު އަހަރު 48 މިލިއަން ޑޮލަރު ލިބުނުއިރު މި އަހަރު އެ އަދަދުވަނީ 55.2 މިލިއަން ޑޮލަރަށް އިތުރުވެފަ އެވެ. އަދި ގްރީން ޓެކްސްގެ ގޮތުގައި ނިމުނު އަހަރު 48.2 މިލިއަން ޑޮލަރު ލިބުނުއިރު މި އަހަރު 52.7 މިލިއަން ޑޮލަރު ލިބިފައިވެ އެވެ.

ނިމުނު އަހަރާ އަޅާބަލާއިރު އެންމެ ބޮޑަށް އިތުރުވީ ޓީޖީއެސްޓީ އެވެ. މި އަހަރުގެ ޖަނަވަރީން ފެށިގެން ޓީޖީއެސްޓީ ނަގަމުން އައި ރޭޓު ބަދަލުކުރުމާ ގުޅިގެން މި އަހަރު 469 މިލިއަން ޑޮލަރު ޓީޖީއެސްޓީގެ ގޮތުގައި ލިބުނެވެ. އެއީ ފާއިތުވި އަހަަރަށްވުރެ 51 މިލިއަން ޑޮލަރު އިތުރު އަދަދެކެވެެ. 

ނަމަވެސް އާމްދަނީން ނަގާ ޓެކުހުގެ ގޮތުގައި ޑޮލަރު ލިބުނު މިންވަރު ނިމުނު އަހަރަށްވުރެ މަދުވި އެވެ. ނިމުނު އަހަރު އާމްދަނީން ނަގާ ޓެކުހުގެ ގޮތުގައި 53 މިލިއަން ޑޮލަރު ލިބުނުއިރު މި އަހަރު ލިބުނީ 48.3 މިލިއަން ޑޮލަރެވެ. 

ޓެކުސް ނޫން ގޮތްގޮތުން ލިބުނު އާމްދަނީއަށް ބަލައިރު އެކުއިޒިޝަންގެ ގޮތުގައި ނިމުނު އަހަރު 2.9 މިލިއަން ޑޮލަރު ލިބުނުއިރު މި އަހަރު އެ އަދަދުގެ ދެގުނަވަނީ ލިބިފަ އެވެ. އެގޮތުން މި އަހަރު 6.3 މިލިއަން ޑޮލަރު ލިބިފައިވެ އެވެ. ފަތުރުވެރިކަމަށް ދޫކޮށްފައިވާ ބިންތަކުގެ ލީސް މުއްދަތު އިތުރުކުރުމުގެ ފީގެ ގޮތުގައި ނިމުނު އަހަރު އެއްވެސް ޑޮލަރެއް ނުލިބެ އެވެ. މިއަހަރު 15 މިލިއަން ޑޮލަރު ލިބިފައިވެ އެވެ. 

ފަތުރުވެރިކަމުގެ ސިނާއަތުގެ ބިމު ކުލީގެ ގޮތުގައި ނިމުނު އަހަރު ލިބުނީ 78.1 މިލިއަން ޑޮލަރެވެ. މި އަހަރު އެ އަދަދުވަނީ 92.3 މިލިއަން ޑޮލަރަށް އިތުރުވެފަ އެވެ. 

ދިވެހި ރުފިިޔާއިން ލިބުނު 9.6 ބިލިއަން ރުފިޔާއާއި ޑޮލަރުން ލިބުނު 12.3 ބިލިއަން ރުފިޔާއާއެކު ގާތްގަނޑަކަށް 22 ބިލިއަން ރުފިޔާ ޖުމްލަ އާމްދަނީގެ ގޮތުގައި ދައުލަތަށް ލިބުނެވެ. އެއީ ނިމުނު އަހަރަށްވުރެ ތިން ބިލިއަނެއްހައި ޑޮލަރު އިތުރު މިންވަރެކެވެ.