ރާއްޖޭގައި ފޯރުކޮށްދޭ ޓޫރިޒަމް ހިދުމަތްތަކުގެ އަގުގެ ބޮޑު ބަޔަކުން ރާއްޖެއަށް ޓެކުސް ނުލިބޭ
ރާއްޖޭގައި ފޯރުކޮށްދޭ ފަތުރުވެރިކަމުގެ ވަރަށް ގިނަ ހިދުމަތްތަކުގެ ބުކިންތައް ވިއްކަނީ ބޭރުގެ ބޮޑެތި އޮންލައިން ޕްލެޓްފޯމުތައް މެދުވެރިކޮށެވެ. އެ މުއާމަލާތްތަކުގެ އަގުން ޓެކްސް ނެގޭނެ ގޮތެއް މިހާތަނަށް ނެތެވެ.
ރާއްޖޭގައި ފޯރުކޮށްދޭ ޓޫރިޒަމްގެ ހިދުމަތްތަކާއި މުދަލުގެ ތެރެއިން ބޮޑު ބައެއްގެ އަގުން ރާއްޖެއަށް ޓެކްސް ނުލިބޭކަމަށް ވޯލްޑް ބޭންކުން ބުނެފި އެވެ.
ވޯލްޑް ބޭންކުން މި މަހުގެ ދިހަވަަނަ ދުވަހު ޝާއިއުކުރި މޯލްޑިވްސް އިކޮނޮމިކް އަޕްޑޭޓް ރިޕޯޓުގައި ފާހަގަކުރި ގޮތުގައި ރާއްޖެއިން ބޭރުގައި ހިންގާ އޮންލއިން ޕްލެޓްފޯމުތަކުގައި ރާއްޖޭގައި ޗުއްޓީ ހޭދަކުރުމަށް ހާއްސަ ޕެކޭޖުތައް މާކެޓު އަގުގައި ވިއްކަ އެވެ. އެ ޕެކޭޖުތަކުގައި ރާއްޖޭގައި ތިބުމާއި ދަތުރުފަތުރާއި، ކެއުންބުއިމާއި، މުނިފޫހިފިލުވުމަށް ކުރާ ކަންކަން ހިމެނެ އެވެ.
ރާއްޖެއިން ބޭރުގައި ހަދާ މި ބުކިންގެ ހުރިހާ މުއާމަލާތެއް ހިނގަނީ ރާއްޖެގެ އިމުން ބޭރުގައި ބޭރު ދެ ފަރާތެއްގެ މެދުގައި ކަމަށްވެފައި، އެ މުއާމަލާތުގައި ރާއްޖޭގެ ބިމެއް ވިއްކުމާއި ކުއްޔަށް ދިނުން ނުހިމެނޭތީ އެ ޕެކޭޖުތަކުން ޓެކުސް ނެގޭނެ ގޮތެއް މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އަށް މިހާރު ނޯވެ އެވެ.
އަދި މީރާއަށް އެ މުއާމަލާތްތަކުން ޓެކްސްކުރުމުގެ ގާނޫނީ ހައްގު ނެތުމުގެ އިތުރަށް އެފަދަ ޓެކްސްއެއް ނެގޭނެ އެއްވެސް ގޮތެއްވެސް އެ އިދާރާއަށް ނެތްކަން ވޯލްޑް ބޭންކުން ފާހަގަކޮށްފައިވެ އެވެ. ނަތީޖާއެއްގެ ގޮތުން އެފަދަ ހިދުމަތްތަކާއި މުދަލުގެ އަގުން ރާއްޖޭގައި މިހާރު ޓެކުހެއް ނުނެގެ އެވެ.
މިކަމުގެ ހައްލެއްގެ ގޮތުގައި ވޯލްޑް ބޭންކުން ފާހަގަކުރީ ބޭސް އިރޯޝަން ޕްރޮފިޓް ޝިފްޓިން ޕްރޮޖެކްޓްގެ ނަމުގައި އޯއީސީޑީން ތައާރަފުކޮށްފައިވާ ޕްރޮޖެކްޓެވެ. އެ ޕްރޮޖެކްޓު ތަންފީޒުކުރުމުގެ އޮނިގަނޑު ނުވަތަ ފްރޭމްވޯކުގައި 2017 ވަނަ އަހަރު ރާއްޖެއިން ބައިވެރިވެފައިވެ އެވެ. އެ އޮނިގަނޑުގެ ތެރެއިން ތަފާތު އުސްލޫބުތައް ބޭނުންކޮށްގެން ރާއްޖެއަށް މިފަދަ މުއާމަލާތްތަކުން ޓެކްސް ނެގިދާނެ އެވެ. އެކަމަށްޓަކައި އަންނަނިވި ކަންކަން ކުރަންޖެހޭނެ އެވެ.
- ޑިޖިޓަލް އިގުތިސާދު ޓެކްސް ކުރުމުގައި ހުރި ގޮންޖެހުންތަކަށް ހައްލުތަކެއް ހޯދުން
- ދާއިމީ އެސްޓަބްލިޝްމެންޓުގެ ދަރަޖައިން ރެކުމަށް ބޭނުންކުރާ މަސްނޫއީ އުކުޅުތައް ބޭނުންކުރުން ހުއްޓުވުން
- އުފައްދާ އަގާއި ޓްރާންސްފާ ކުރާ އަގުގެ މެދުގައި ހުރި ފަރަގުތައް ނައްތައިލުން
ރާއްޖޭގައި ޖީއެސްޓީ އަދި ޓީޖީއެސްޓީ ނަގަމުންދަނީ މުއާމަލާތް ހިނގި ތަނުގެ އަސްލަަށް ބަލައިގެންނެވެ. އޭގެ ބަދަލުގައި ރާއްޖޭގައި ޑެސްޓިނޭޝަން ޕްރިންސިޕަލްއަށް ބަލައިގެން ޓެކްސް ކުރަން ފެށުމަށް ވޯލްޑް ބޭންކުން ލަފާދީފައިވެ އެވެ.
އެގޮތަށް ޓެކްސް ނަގަން ފެށުމަށް ކުރެވިދާނެ ކަންކަން
- 1.ރާއްޖެއާއި މިފަދަަ ހިދުމަތްތައް ދޭ ޕްލެޓުފޯމުތަކާ ދެމެދުގައި ގުޅުން ގާއިމުކުރުމެވެ. މިގޮތަށް އެ ޕްލެޓުފޯމުތަކުން ފޯރުކޮށްދޭ ހިދުމަަތްތަކުން ޓެކްސް ނެގުމުގައި ގޮންޖެހުންތަކެއް ހުންނާނެ އެވެ. އެންމެ ބޮޑު މައްސަލައަކީ މި ޕްލެޓުފޯމުތަކުން ހިދުމަތް ހޯދާ ފަރާތްތަކަކީ ރާއްޖޭގައި ދިރިއުޅޭ ބަޔަކަށް ނުވުމެވެ. އެހެންކަމުން މިހާރު އެކުލަވައިލެވިފައިވާ އޮނިގަނޑު ނުވަތަ ފްރޭމްވޯކުގެ ތެރެއިން އެ މުއާމަލާތްތަކުން ޓެކްސް ކުރުމަށް ހުރަސްތައް ހުންނާނެ އެވެ.
- 2.ދެވަނަ ގޮތަކީ ރާއްޖޭގައި ފޯރުކޮށްދޭ ހިދުމަތްތަކުގެ ބުކިން ހަދައިދޭ ޕްލެޓްފޯމުތަކުން ރާއްޖޭގައި ދާއިމީ އެސްޓަބްލިޝްމެންޓު/ ވިޔަފާރީގެ ގޮފިތަކެއް ރާއްޖޭގައި ގާއިމުކުރުން ލާޒިމުކުރުމެވެ. ނަމަވެސް އެ ޕްލެޓްފޯމުތަކުގެ ކަސްޓަމރުން ރާއްޖޭގައި ނުތިބޭތީ އެތަންތަނުގެ އެސްޓަބްލިޝްމެންޓުތަކެއް ދާއިމީކޮށް ރާއްޖޭގައި ގާއިމުކުރަންޖެހޭ ސަބަބެއް ނެތުމަކީ މިގޮތަށް އެތަންތަން ޓެކްސް ކުރުމަށްވެސް ކުރިމަތިވާނެ ގޮންޖެހުމެކެވެ.
މި މައްސަލަ ހައްލުކުރުމަށް މީރާގައި ގާއިމުކުރަންޖެހޭ ބައެއް ވަސީލަތްތައް ފާހަގަކޮށް ވޯލްޑް ބޭންކުންވަނީ އެކަން ކުރެވިދާނެ ގޮތްތަކެއްވެސް އެ ރިޕޯޓުގައި ހުށަހަޅާފަ އެވެ.
ކޮމެންޓް
Republic of Maldives