ކޫއްޑޫ ރަންވޭ މަރާމާތުނުކުރޭ | ބޯޓުތަކަށް ގެއްލުންވާތީ މޯލްޑިވިއަންގެ ދަތުރުތައް މެދުކަނޑައިލަނީ

ގއ.ކޫއްޑޫ އެއާޕޯޓުގެ ރަންވޭ މަރާމާތުނުކުރާތާ ގިނަދުވަސްވެ ހަލާކުވުމާ ގުޅިގެން ގައުމީ އެއާލައިން މޯލްޑިވިއަންގެ ފުލައިޓުތަކަށް ގެއްލުންވާން ފެށުމުން އެ އެއާޕޯޓަށް ކުރަމުން އައި ދަތުރުތައް މެދުކަނޑައިލަން މޯލްޑިވިއަންއިން ނިންމައިފި އެވެ. 

މޯލްޑިވިއަންގެ އިސްވެރިޔަކު ނަން ނުޖެހުން ޝަރުތުކުރައްވައި "މިރާ"އަށް މައުލޫމާތު ދެއްވި ގޮތުގައި ކޫއްޑޫގެ ރަންވޭ މަރާމާތުނުކުރާތާ މިހާރު ގާތްގަނޑަކަަށް ފަސް އަހަރުވެއްޖެ އެވެ. އެކަމުގެ ސަބަބުން ރަންވޭ އޮތީ ވަރަށް ބޮޑަށް ހަލާކުވެފައި ކަމަށް އޭނާ ވިދާޅުވި އެވެ. 

"މޯލްޑިވިއަންގެ ދެ ފުލައިޓަކަށް ގެއްލުންވެއްޖެ. ގެއްލުންވުމުން މަރާމާތުކުރަން ވަރަށް ބޮޑެތި ހަރަދުކުރަންޖެހޭ. އެހެންވީމާ ކޫއްޑޫގެ ދަތުރުތައް މިވަގުތު ކުރުމަކީ ކުންފުންޏަށް ފީޒަބަލް ކަމެއް ނޫން،" އޭނާ ވިދާޅުވި އެވެ. 

މިއަދު ކޫއްޑޫއަށް ޝެޑިއުލް ދަތުރުތައް ކުރި ނަމަަވެސް މާދަމައިން ފެށިގެން ކޫއްޑޫއަށް ގައުމީ އެއާލައިނުން ދަތުރުނުކުރާނެ އެވެ. 

ހުވަދު އަތޮޅުގައި ހިންގާ ރިސޯޓުތަކުގެ ތެރެއިް އެންމެ ގިނަ ރިސޯޓު އޮތީ ހުވަދޫގެ އުތުރު ބުރީގަ އެވެ. އެ ރިސޯޓުތަކަށް ދާ ފަތުރުވެރިން ދަތުރުކުރަނީ ކޫއްޑޫ މަގުން ކަމަށްވާއިރު ފަތުރުވެރިކަމުގެ އެންމެ ބާރު ބޮޑުވާ ދުވަސްވަރު ކޫއްޑޫއަށް ދަތުރުކުރުން ހުއްޓައިލަންޖެހުމަކީ މޯލްޑިވިއަންއަށްވެސް އަދި ހުވަދޫގެ ފަތުރުވެރިކަމަށްވެސް ގެއްލުންވާނެ ކަމެކެވެ. 

ކޫއްޑޫ އެއާޕޯޓު ތަރައްގީކޮށް ހިންގަނީ ޔޫރަޕުގެ މަޝްހޫރު ހޮޓެލް ކުންފުންޏެއްކަމަށްވާ "އެކޯ"އިންނެވެ. އެއާޕޯޓު ތަރައްގީކޮށް ހިންގުމަށް އެ ކުންފުންޏަށް ދެ ރަށް ރިސޯޓު ތަރައްގީކުރަން ދޫކޮށްފައިވެ އެވެ. އެ ދެ ރަށުގައިވެސް މިހާރު ރިސޯޓު އޮޕަރޭޓު ކުރެއެވެ.