ޖަޕާނުން އިކޮނޮމިކް އެންޑް ޕަބްލިކް ޕޮލިސީ ކިޔެވުމަށް ސްކޮލަޝިޕެއް

ވޯލްޑް ބޭންކް އަދި އޭޝިއަން ޑިވެލޮޕްމަންޓް ބޭންކް ސްކޮލާޝިޕްގެ ދަށުން، ޖަޕާނުގެ ޔުނިވާސިޓީ އޮފް ސުކުބާގެ އިކޮނޮމިކް އެންޑް ޕަބްލިކް ޕޮލިސީ ޕްރޮގްރާމުގައި ކިޔެވުމުގެ ފުރުސަތު ހަޔާ އެޑިއުކޭޝަން މިނިސްޓްރީން ހުޅުވާލައިފި އެވެ.

މިނިސްޓްރީން ކުރި އިއުލާނެއްގައި ބުނެފައި ވަނީ ޖަޕާނުގެ ޔުނިވާސިޓީ އޮފް ސުކުބާގެ އިކޮނޮމިކް އެންޑް ޕަބްލިކް ޕޮލިސީ ޕްރޮގްރާމުގައި ކިޔެވުމުގެ ފުރުސަތު އޮތް ކަމަށް ޖަޕާނުގައި ހުންނަ ދިވެހިރާއްޖޭގެ އެމްބަސީއިން އަންގާފައިވާ ކަމަށެވެ.

އެހެންކަމުން މި ސްކޮލަޝިޕްތަކުގައި ބައިވެރިވުމަށް ޝައުގުވެރިވާ ފަރާތްތަކުން އަންނަ މަހުގެ 15 ވަނަ ދުވަހުގެ ކުރިން އޮންލައިން އެޕްލިކޭޝަން ފޮނުވުމަށް މިނިސްޓްރީން ވަނީ އެދިފަ އެވެ. އެޕްލިކޭޝަން ލިންކު ޔުނިވާސިޓީ ވެބްސައިޓުން ލިބޭނެ އެވެ.

މި ޕްރޮގްރާމަކީ ހިއުމަނިޓީސް އެންޑް ސޯޝަލް ސައިންސެސްގެ ދަށުން ކުރިއަށް ގެންދާ މާސްޓާސް ޑިގްރީ ޕްރޮގްރާމެކެވެ.

މި ސްކޮލަޝިޕަށް އެދި ހުށަހަޅާ ފަރާތްތަކުގެ ޝައުރުތުތަކުގެ ތެރޭގައި، ޑުއަލް ސިޓިޒެންޝިޕް އޮތް ފަރާތަކަށް ނުވުމާއި، ބެޗަލާސް ޑިގްރީ ހާސިލުކޮއްފައިވާ ފަރާތަކަށްވުން ހިމެނެ އެވެ. އަދި ދެ އަހަރުގެ މަސައްކަތުގެ ތަޖުރިބާ ލިބިފައިވާ ފަރާތަކަށްވުމާއި އުމުރުން 35 އަހަރަށް ވުރެ މަތި ފަރާތަކަށް ނުވުން ޝަރުތުތަކުގެ ތެރޭގައި ހިމެނެ އެވެ.

އޭގެ އިތުރުން، އިނގިރޭސި ބަހުން ލިޔަން ކިޔަން ދަތުމާއި، ޖަޕާނުގައި މަތީ ތައުލީމު ފުރިހަމަކުރުމަށްފަހު، ރާއްޖޭގައި މަދުވެގެން ދެ އަހަރު ވަޒީފާ އަދާކުރުމަށް އެއްބަސްވުން ހިމެނެ އެވެ.

މިނިސްޓްރީން ވަނީ މި ޕްރޮގްރާމްތަކަށް ހޮވޭ ފަރާތްތަކުން، ޕްރޮގްރާމް ފުރިކުރަން ފެށުމުގެ ކުރިން އެ ޕްރޮގްރާމެއް ހިންގާ ޔުނިވާސިޓީ ނުވަތަ އިންސްޓިޓިއުޓަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ގަބޫލުކުރާ މަރުކަޒެއްކަމާއި، ހޮވިފައިވާ ޕްރޮގްރާމަކީ އެމްކިޔުއޭ އިން ގަބޫލުކުރާ ޕްރޮގްރާމެއްކަން ކަށަވަރު ކުރަން އެދިފަ އެވެ.