ރާއްޖެއަށް އެތެރެކުރަން އުޅުނު 3.8 ކިލޯގެ ޑްރަގްސް އަތުލައިގަނެފި

ރާއްޖެއަށް އެތެރެކުރަން އުޅުނު 3.8 ކިލޯގެ މަސްތުވާތަކެތި މޯލްޑިވްސް ކަސްޓަމްސްއިން އަތުލައިގަނެފި އެވެ. 

ކަސްޓަމުން ހާމަކުރި ގޮތުގައި މި މަސްތުވާތަކެތި އަތުލައިގަތީ މަހުގެ ފަސްވަނަ ދުވަހާއި ހަތްވަނަަ ދުވަހު އެވެ. އެތަކެތީގެ ތެރޭގައި ހިމެނެނީ ހެރޮއިން އަދި ކޮކެއިނެވެ. 

އެ އިދާރާއިން ހާމަކުރި ގޮތުގައި މި މަހުގެ ފަސްވަނަ ދުވަހު ވެލާނާ އިންޓަނޭޝަނަލް އެއާޕޯޓުން 2،440 ގުރާމު ނުވަތަ 2.4 ކިލޯގެ މަސްތުވާތަކެތި އެތެރެކުރަން އުޅެނިކޮށް އަތުލައިގަނެފައިވެ އެވެ. އެ ދުވަހު އަތުލައިގަނެފައިވަނީ ކޮކެއިން ޝިޕްމެންޓެކެވެ.

ހަތްވަނަ ދުވަހު އަތުލައިގަތް މަސްތުވާތަކެއްޗަކީ ޕޯސްޓާއި އެކްސްޕްރެސް ކޮންސައިންމެންޓު މެދުވެރިކޮށް ރާއްޖެއަށް އެތެރެކުރަން އުޅުނު 1،040 ގުރާމުގެ މަސްތުވާތަކެއްޗެވެ. އެ އިދާރާއިން ބުނި ގޮތުގައި އެއީ ހެރޮއިން އެވެ. 

މި މައްސަލަތަކާ ގުޅޭ އިތުރު ތަފުސީލު ކަސްޓަމްސްއިން ހާމަކޮށްފައިނުވެ އެވެ. ނަމަވެސް މިފަދަ މައްސަލަތަކުގައި އަތުލައިގަނެވޭ މަސްތުވާތަކެތި ފުލުހުންނާ ހަވާލުކުރުމުން ފުލުހުން ކޮންޓްރޯލްޑް ޑްރަގް އޮޕަރޭޝަނެއް ހިންގައި އެތަކެއްޗާ ގުޅުންހުރި އިތުރު ފަރާތްތައް ހޯދުމަށް މަސައްކަތް ކުރެ އެވެ.