މާލޭގެ މަގުތަކުގެ ޓްރެފިކަށް ލުޔެއް | ކުނި ނަގާ ވަގުތު ބަދަލުކުރަނީ

މާލާގެ ތޮއްޖެހުން ބޮޑުވެ ޓްރެފިކް މައްސަލަަތައް އިތުރުވެފައިވާތީ އެކަމަށް ހައްލެއް ހޯދުމުގެ ގޮތުން މާލޭގެ ގެދޮރުން ކުނި ނަގާ ވަގުތު ބަދަލުކުރަން ނިންމައިފި އެވެ. 

މިހާރު ދުވާލު ވަގުތުން ފެށިގެން މާލެ ސަރަހައްދުގައި ގެދޮރުން ކުނި ނަގަމުންދާތީ ކުނި ނަގާ ވެހިކަލްތައް މަގުތަކުގައި ހަރަކާތްތެރިވުމުގެ ސަބަބުން ޓްރެފިކް ހުއްޓި މަގުތައް ތޮއްޖެހުމުގެ މައްސަލަ ކުރިމަތިވާތީ އާންމުން އަންނަނީ ވަރަށް ބޮޑަށް ޝަކުވާ ކުރަމުންނެވެ. 

މާލޭގެ މަގުތަކުގެ އަމާންކަން ކަށަވަރުކޮށް، މާލެއަށް ކުރިމަތިވެފައިވާ މަގުތައް ތޮއްޖެހުމުގެ މައްސަލަ ހައްލުކުރުމަށް ސަރުކާރުންވަނީ މާލެ ފަހި ޕްރޮގުރާމުގެ ނަމުގައި ހާއްސަ ޕްރޮގުރާމެއް އެކުލަވައިލާފަ އެވެ. އެ ޕްރޮގުރާމުގެ ދަށުން މާލޭގެ މަގުތަކުގައި ބޭނުންނުކޮށް ހުރި އުޅަނދުތައް ނަގައި މަގުތައް ސާފުކުރުމާއި ޕާކްކުރާނެ ޖާގަަތައް އުފެއްދުމުގެ މަސައްކަތް އޮތީ ފަށާފަ އެވެ. 

އެ ޕްރޮގުރާމުގެ ތެރެއަށް މާލޭގެ ކުނި ނެގުމުގެ ވަގުތު ބަދަލުކުރުން ހިމަނައި، މިހާރު ކުނި ނަގާ ވަގުތުގެ ބަދަލުގައި ރޭގަނޑު 10:00 އިން ފެށިގެން ފަތިހު 5:00 އާ ދެމެދުގައި ކުނި ނެގުމަށް ހަމަޖައްސަން ޓްރާންސްޕޯޓު އެންޑް ސިވިލް އޭވިއޭޝަން މިނިސްޓްރީން ނިންމާފައިވެ އެވެ. 

އެ މިނިސްޓްރީން ބުނި ގޮތުގައި އެ ބަދަލަކީ މާލެއަށް ކުރިމަތިވެފައިވާ ތޮއްޖެހުމުގެ މައްސަލަ ހައްލުކުރުމަށް ކޮންމެހެން ގެންނަންޖެހިފައިވާ ބަދަލެކެވެ. އޮފީސްތަކާއި ސުކޫލުތަކުގެ ގަޑިތަކުގައި މާލޭގެ މަގުމަތި ތޮއްޖެހޭއިރު އެވަގުތު މަގުމަތީގައި ކުނި ނެގުމުގެ މަސައްކަތްކުރުމުން އިތުރަށް ތޮއްޖެހުން ބޮޑުވާ ކަމަށް އެ މިނިސްޓްރީން ބުންޏެވެ. 

މި ގެންނަ ބަދަލު ތަންފީޒުކުރުމުގައި އެންވަޔަރަމެންޓު މިނިސްޓްރީއާއި މާލޭ ސިޓީ ކައުންސިލާއި ވެމްކޯއިން ބައިވެރިވާނެ ކަމުގައިވެސް ޓްރާންސްޕޯޓު މިނިސްޓްރީން ބުނެފައިވެ އެވެ.