ރޫޕޭ ކާޑުގެ ހިދުމަތް ފެށުން | ފުރަތަމަ ޓްރާންސެކްޝަން މިއަދު ހަދައިފި

އިންޑިޔާގެ ރޫޕޭ ކާޑު ބޭނުންކޮށްގެން ދިވެހިރާއްޖޭގައި މާލީ މުއާމަލާތްތައް ކުރަން ފަށައިފި އެވެ. 

އިންޑިޔާގެ އިންސްޓެންޓް ޕޭމެންޓު ސިސްޓަމް ކަމަށްވާ ޔުނިފައިޑް ޕޭމެންޓްސް އިންޓަފޭސް (ޔޫޕީއައި)ގެ ދަށުން ރޫޕޭ ކާާޑު ރާއްޖޭގައި ބޭނުންކުރަން ފެށީ މިއަދު އެވެ. އެ ހިދުމަތް އިފުތިތާހުކުރުން އޮތީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިންޑިޔާއަށް ކުރައްވަމުންދާ ފުރަމާނަ ދަތުރުފުޅުގެ ތެރެއިން ކުޑައިރުކޮޅެއް ކުރިންނެވެ. 

އިންޑިޔާގެ ބޮޑުވަޒީރު ނަރެންދުރަ މޯދީއާއެކު ބޭއްވެވި ރަސްމީ ބައްދަލުވުމަށްފަހު ދެ ބޭފުޅުން އެކުގައި މީޑިޔާއަށް ބަޔާނެއް ދެއްވުމުގެ ކުރިން ބައެއް އެއްބަސްވުންތަކުގައި ސޮއިކޮށް ބައެއް މަސައްކަތްތައް އިފުތިތާހުކޮށްފައިވެ އެވެ. އެގޮތުން މިއަދު އިފުތިތާހުކުރި އެއްކަމަކީ ރޫޕޭ ކާޑު ބޭނުންކުރުމެވެ. 

ރާއްޖޭގައި ރޫޕޭ ކާޑުން ހެދި ފުރަތަމަ ޓްރާންސެކްޝަން ހެދި މަންޒަރު ނޫސްވެރިންގެ އެ ބައްދަލުވުމުގައި ލައިވްކޮށްފައިވެ އެވެ. 

2016 ވަނަ އަހަރު އިންޑިޔާގައި ތައާރަފުކުރި ޔޫޕީއައި ޕޭމެންޓަކީ މޯބައިލް ފޯނުގެ ޒަރީއާއިން ބޭންކުތަކުގެ މެދުގައި މުއާމަލާތްތައް ހިންގޭނެ އިންތިޒާމުތައް ހަމަޖެއްސުމަށް ތައާރަފުކުރި ޕޭމެންޓު ސިސްޓަމެކެވެ. 

ރޫޕޭ ކާޑު ރާއްޖޭގައި ބޭނުންކުރެވޭނެ އިންތިޒާމު ހަމަޖެއްސުމާއެކު، ބީއެމްއެލް އޭޓީއެމްތަކާއި ޕީއޯއެސް މެޝިނާއި އެހެނިހެން ޑިޖިޓަލް ޗެނަލްތަކުގައި ޕޭމެންޓުތައް ހެދުމަށާއި އެހެނިހެން ހިދުމަތްތައް ހޯދުމަށް ރޫޕޭ ކާޑު ބޭނުންކުރެވޭނެ އެވެ.