އިންޑިއާ ގުޅުން ގާތްވާނެ، ހާރިޖީ ސިޔާސަތު ބައްޓަން ކުރާނީ ދިވެހީންނަށް ފައިދާވާ ގޮތަށް: ރައީސް
"އަޅުގަނޑު ގަސްތުކުރަނީ ރާއްޖޭގެ ހާރިޖީ ސިޔާސަތުގެ އެންމެ ފުރިހަމަ އެހީތެރިކަން ތިޔަ ލޮބުވެތި ހުރިހާ ރައްޔިތުންނަށް ލިބޭނެ ގޮތަކަށް މިހާރަށް ވުރެ ފުރިހަމަ ކުރަން،"
ރާއްޖޭގެ ހާރިޖީ ސިޔާސަތުގެ އެންމެ ފުރިހަމަ އެހީތެރިކަން ދިވެހީންނަށް ލިބޭނެ ގޮތަށް އެ ސިޔާސަތު ބައްޓަން ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އިންޑިއާގެ ނިއުދިއްލީ ގައި ދިރިއުޅޭ ދިވެހި ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ ރާއްޖެ-އިންޑިއާ ގުޅުމަކީ ވަރަށް ޒަމާންވީ ގާތްގުޅުމެއް ކަމަށެވެ. އަދި އެމަނިކުފާނުގެ މި ދަތުރުފުޅާއެކު ދެ ގައުމުގެ ގުޅުން އިތުރަށް ބަދަހި ވެގެންދާނެ ކަމަށް ރައީސް ވިދާޅުވި އެވެ.
އަދި ވިދާޅުވީ އެ ދަތުރުފުޅާ އެކު ދެ ގައުމަށް ފައިދާ ހުރި ކަންކަމުގައި އިތުރަށް ގާތްވާނެ ކަމަށެވެ. ރައީސް ވިދާޅުވީ އިންޑިއާ އަކީ ދިވެހީން ވަރަށް ގިނަ ކަންކަމުގައި ގޮސް އުޅޭ ގައުމެއް ކަމަށެވެ. އެ ގޮތުން ބޭސްފަރުވާއާ ތައުލީމާއި ވިޔަފާރީގެ އެކި ބޭނުންތަކަށް ދިވެހީން އެ ގައުމަށް ދަތުރުކުރާކަން ރައީސް ފާހަގަ ކުރެއްވި އެެވެ.
ރައީސް ވިދާޅުވީ އެެމަނިކުފާނުގެ ހާރިޖީ ސިޔާސަތު ބައްޓަން ކުރައްވާނީ ހާރިޖީ ސިޔާސަތުގެ އެންމެ ފުރިހަމަ އެހީތެރިކަން ދިވެހީންނަށް ލިބޭނެ ގޮތަށް ކަމަށެވެ.
"އަޅުގަނޑު ގަސްތުކުރަނީ ރާއްޖޭގެ ހާރިޖީ ސިޔާސަތުގެ އެންމެ ފުރިހަމަ އެހީތެރިކަން ތިޔަ ލޮބުވެތި ހުރިހާ ރައްޔިތުންނަށް ލިބޭނެ ގޮތަކަށް މިހާރަށް ވުރެ ފުރިހަމަ ކުރަން. އެއީ އަޅުގަނޑުމެންގެ ސިޔާސަތު ބައްޓަން ކޮށްފައިވާ ގޮތަކީ ވެސް،"
ކޮމެންޓް
Republic of Maldives