އައިޔޫއެމް އިން ދިރާސާ ކުރުމާ ބެހޭ މުބާރާތެއް ބާއްވަނީ

ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް) އިން "ރިވެލި 2024" ގެ ނަމުގައި ދިރާސާކުރާ ފަރާތްތަކަށް ހާއްސަ މުބާރާތެއް ބާއްވަން ނިންމައިފި އެވެ.

އައިޔޫއެމް އިން ބުނީ އެ މުބާރާތަކީ ރައީސް ޑރ. މުހައްމަދު މުއިއްޒު އިލްތިމާސްކުރައްވާފައިވާ ފަދައިން، ތަރައްގީގެ ބިންގަލެއްގެ ގޮތުގައި، ދިރާސާކުރުމަށް ލޯބިކުރާ މުޖްތަމައުއެއް ބިނާކުރުމަށް އަމާޒުކޮށް ބާއްވާ މުބާރާތެއް ކަމަށެވެ.

މި މުބާރާތުގައި ދިރާސާކުރުމަށް އާންމުންގެ މެދުގައި ޝައުގުވެރިކަން އުފެއްދުމާއި، ޕޯސްޓް ގްރެޖުއޭޓް ދަރިވަރުންނަށް އެ ދަރިވަރުން ޝައުގުވެރިވާ ދާއިރާތަކާއި ގުޅޭގޮތުން ކޮއްފައިވާ ދިރާސާތަށް އާންމުންނަށް ހުށަހެޅުމުގެ ފުރުސަތު ފަހިވެގެން ދާނެ ކަމަށް އައިޔޫއެމް އިން ބުނޏްވެ.

މި މުބާރާތް ބާއްވަން ހަމަޖެހިފައި ވަނީ މިމަހުގެ 26 ވަނަ ދުވަހު އެވެ. މުބާރާތުގައި ވަނަ ހޯދާ ފަރާތްތަކަށް 5،000 ރުފިޔާގެ އިނާމު ލިބޭނެ އެވެ. އަދި، މުބާރާތުގެ ހުރިހާ ބައިވެރިންނަށް ވެސް ސެޓްފިކެޓް ހަވާލުކުރާނެ ކަމަށް ވެސް އެ ޔުނިވާސިޓީން ބުންޏެވެ.

"ރިވެލި 2024"ގައި ބައިވެރިވުމަށް ޝައުގުވެރިވާ ފަރާތްތަކުން ގޫގަލް ލިންކެއް މެދުވެރިކޮށް، މައުލުމާތު ފުރިހަމަކުރުމަށް ފަހު ރަޖިސްޓާ ކުރަން މިހާރު ވަނީ ހުޅުވާލައިފަ އެވެ.