ދަޅުގައި އަދި ޕައުޗުގައި މަސް ބޭރުކުރި މިންވަރު %59 ދަށަށް

ރާއްޖެއިން ދަޅު މަސް އަދި ޕައުޗުގައި މަސް ބަންދުކޮށްގެން ބޭރުކުރި މިންވަރު ފާއިތުވި އަހަރަށްވުރެ %59 ދަށްވެފައިވާކަމަށް ހިސާބުތަކުން ދައްކައިފި އެވެ. 

މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އާންމުކޮށްފައިވާ އެކްސްޕޯޓު އިމްޕޯޓުގެ ހިސާބުތަކަށް ބަލާއިރު މި އަހަރު ރާއްޖެއިން ބޭރަށް ބޭރުކުރި މަހުގެ ޖުމްލަ އަދަދުވެސްވަނީ ފާއިތުވި އަހަރަށްވުރެ މަދުވެފަ އެވެ. އެގޮތުން މަހާއި މަހުގެ އުފެއްދުންތައް މި އަހަރުގެ ޖަނަވަރީން އޯގަސްޓުގެ ނިޔަލަށް ބޭރުކުރީ ނިމުނު އަހަރުގެ އެ މުއްދަތުގައި ބޭރުކުރި މިންވަރަށްވުރެ %46.6 މަދުންނެވެ. 

ނިމުނު އަހަރުގެ އެ މުއްދަތުގައި 56،678.3 މެޓްރިކް ޓަނުގެ މަހުގެ އުފެއްދުންތައް ރާއްޖެއިން ބޭރުކުރިއިރު މި އަހަރު ބޭރުކޮށްފައިވަނީ 30،241.3 މެޓްރިކް ޓަނެވެ. 

އޭގެ އިތުރަށް ފިނިކޮށްގެންނާއި ގަނޑުކޮށްގެން އަދި ތާޒާކޮށް ކަނޑުމަސް ބޭރުކުރި މިންވަރުވެސްވަނީ ވަރަށް ބޮޑަށް ދަށްވެފަ އެވެ. ނިމުނު އަހަރުގެ ފުރަތަމަ އަށް މަސްދުވަހު ތެރޭގައި 45،612.9 މެޓްރިކް ޓަނުގެ ކަނޑުމަސް ގަނޑުކޮށްގެންނާއި ފިނިކޮށްގެން އަދި ތާޒާކޮށް ބޭރުކުރި އެވެ. ނަމަވެސް މި އަހަރުގެ އެ މުއްދަތުގައި ބޭރުކުރީ 25،088.1 މެޓްރިކް ޓަނެވެ. އެއީ ނިމުނު އަހަރަށްވުރެ %45 ދަށް އަދަދެކެވެ. 

ކަނޑުމަހުގެ ބާވަތްތަކުގެ ތެރެއިން ކަޅުބިލަމަސް ބޭރުކުރި މިންވަރުވަނީ ވަރަށް ބޮޑަށް ދަށްވެފަ އެވެ. އެގޮތުން ނިމުނު އަހަރު 40،369.3 މެޓްރިކް ޓަނުގެ ކަޅުބިލަމަސް ބޭރުކުރިއިރު މި އަހަރު ބޭރުކުރީ 18،454.2 މެޓްރިކް ޓަނެވެ. 

އެމްއެމްއޭގެ ހިސާބުތައް ދައްކާ ގޮތުން މި މުއްދަތުގައި އިތުރުވީ ރީނދޫ އުރަހަ ކަންނެލި ބޭރުކުރި މިންވަރެވެ. 2023 ގެ ޖަނަވަރީން އޯގަސްޓަށް ބޭރުކޮށްފައިވަނީ 4،984 މެޓްރިކް ޓަނުގެ ރީނދޫ އުރަހަ ކަންނެއްޔެވެ. މި އަހަރު އެ އަދަދުވަނީ 6،407.2 މެޓްރިކް ޓަނަށް އިތުރުވެފަ އެވެ. 

އޭގެ އިތުރަށް ދަޅުގައާއި ޕައުޗުގައި ބޭރުކުރި މަހުގެ އަދަދުވެސް މި އަހަރު މަދުވެފައިވާކަމަށް އެމްއެމްއޭގެ ތަފާސްހިސާބުތަކުން ދައްކަ އެވެ. އެގޮތުން ނިމުނު އަހަރު 9،757 މެޓްރިކްޓަނުގެ މަސް ދަޅާއި ޕައުޗުގައި ބަންދުކޮށްގެން ބޭރުކުރި ނަމަވެސް މި އަހަރުގެ އެ މުއްދަތުގައި ބޭރުކޮށްފައިވަނީ 3،995.7 މެޓްރިކް ޓަނުގެ މަހެވެ. 

އޭގެ އިތުރަށް ޕްރޮސެސްކޮށްގެން ބޭރުކުރި މަހުގެ އެހެނިހެން ބާވަތްތައްވެސް ނިމުނު އަހަރަށްވުރެ މަދުވެފައިވެ އެވެ. އެގޮތުން މި އަހަރު 693 މެޓްރިކް ޓަނުގެ މަސް ބޭރުކުރިއިރު ނިމުނު އަހަރު އެ އަދަދު އުޅެނީ 895.6 މެޓްރިކް ޓަނުގަ އެވެ. 

މަހާއި މަހުގެ އުފެއްދުންތައް ބޭރުކުރާ މިންވަރު މަދުވުމުގެ ނަތީޖާއެއްގެ ގޮތުން ރާއްޖޭގައި އުފައްދާ މުދާ އެކްސްޕޯޓުކޮށްގެން ލިބުނު ފައިސާގެ އަދަދުވެސް ވަރަށް ބޮޑަށް މަދުވެފައިވާކަން އެމްއެމްއޭގެ ހިސާބުތަކުން ދައްކަ އެވެ. އެގޮތުން ނިމުނު އަހަރުގެ ޖަނަވަރީން އޯގަސްޓުގެ ނިޔަލަށް 116.3 މިލިއަން ޑޮލަރު އެކްސްޕޯޓުން ލިބުނުއިރު މި އަހަރު ލިބުނީ 66.7 މިލިއަން ޑޮލަރެވެ.