ތަރައްގީގެ މާސްޓާ ޕްލޭން އެކުލަވައިލުމުގައި އޮސްޓްރޭލިއާއިން އެހީތެރިވަނީ

ދިވެހިރާއްޖޭގެ ގައުމީ ތަރައްގީގެ މާސްޓާ ޕްލޭން އެކުލަވައިލުމުގައި އޮސްޓްރޭލިއާއިން ފަންނީ އެހީތެރިކަމާއި އިރުޝާދު ފޯރުކޮށްދިނުމާ ގުޅޭ އެއްބަސްވުމެއްގައި އެ ގައުމުގެ ސަރުކާރާއެކު ދިވެހި ސަރުކާރުން ސޮއިކޮށްފި އެވެ. 

ބުރާސްފަތިދުވަހު ހައުސިން އެންޑް އާބަން ޕްލޭނިން މިނިސްޓްރީގައި އޮތް ރަސްމިއްޔާތެއްގައި މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރު ޑރ.އަލީ ހައިދަރު އަހުމަދެވެ. އަދި އޮސްޓްރޭލިއާ ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އެ ގައުމުން ރާއްޖެއަށް ކަނޑައަޅާފައި ހުންނަަވާ ސަަފީރު ޑޭވިޑް ޖޭސަފެވެ. 

ހައުސިން މިނިސްޓްރީން ބުނި ގޮތުގައި އެ އެއްބަސްވުމުގެ ދަށުން ޔޫއެންޑީޕީގެ އިންޓަގްރޭޓެޑް ގަވަނަންސް މަޝްރޫއުގެ ދަށުން 900،000 އޮސްޓްރޭލިއަން ޑޮލަރުގެ އެހީ ލިބޭނެ އެވެ. 

ރާއްޖޭގެ ތަރައްގީގެ ޝާމިލު މާސްޓާ ޕްލޭނެއް އެކުލަވައިލުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދުފުޅެކެވެ. އެ ވައުދުފުޅާ އެއްގޮތަށް އެއް އަހަރު ތެރޭގައި އެ ޕްލޭން އެކުލަވައިލުމަށް ކެބިނެޓުގެ ލަފާފުޅުގެ މަތިން ރައީސް ނިންމަވާފައިވެ އެވެ. 

20 އަހަރުގެ ތަރައްގީގެ މާސްޓާ ޕްލޭން އެކުލަވައިލުމަށް ނިންމާފައިވަނީ ފުޅާ ދާއިރާއެއްގައި މަޝްވަރާކޮށްގެން، ސިޔާސީ ޕާޓީތަކާއި މަދަނީ ޖަމްއިއްޔާތަކާއި އެކި ދާއިރާތަކުގެ މާހިރުންނާއި، ރައްޔިތުންގެ ބައިވެރިވުން އޮންނަ ގޮތަށް ބޭރުގެ މާހިރުންގެ ބައިވެރިވުމާއެކު ދިވެހިން އިސްކޮށް މަސައްކަތްކުރާ ގޮތަށެވެ.