މާލެއިން އަޅުގަނޑު ބިމެއް ގަތްކަމަށް ވިދާޅުވެ ޔާމީން ހެއްދެވީ ބުހުތާނު ދޮގެއް: ފައިސަލް

ޓޫރިޒަމް މިނިސްޓަރު އިބްރާހީމް ފައިސަލް މާލެއިން ބިމެއް ބައްލަވައިގަނެފައިވާކަމަށް ކުރީގެ ރައީސް އަބްދުﷲ ޔާމީން ވިދާޅުވި ވާހަކަަފުޅަކީ ރޯ ބުހުތާނު ދޮގެއްކަމަށް ފައިސަލް ވިދާޅުވެއްޖެ އެވެ. 

ނިމުނު ހަފުތާގައި ޕީޕަލްސް ނޭޝަނަލް ފްރަންޓްއިން ބޭއްވި ޖަލްސާއެއްގައި ވާހަކަދައްކަވަމުން ރައީސް ޔާމީން ވިދާޅުވީ ސަރުކާރުގެ ވެރިން ގެންދަވަނީ ކޮރަޕްޝަނުގެ ތެރެއިން ގިނަ އަދަދެއްގެ ފައިސާ ހޯއްދަވަމުން ކަމަށެވެ. އެގޮތުން އެކި ބޭފުޅުން ބިންތަކާއި އެޕާޓުމެންޓާއި އެނޫންވެސް މުދާ ބައްލަވައިގަންނަވަމުންދާ ކަމަށް އެމަނިކުފާނު ތުހުމަތު ކުރެއްވި އެވެ. 

"މިމީހުން ހާދަ މުރާއްޔޭ، ކަރަޕްޝަންގަ ބިން ހޯދުމާއި، ބިން ކަނޑާފައި އަނބިންނަށް ދަންދެން ބިން ނެގުމާއި، ފައިސާ ނެގުމާއި، މި ހުރިހާ އެންމެން ވަރަށް ތަނަވަސް،" ރައީސް ޔަމީން ވިދާޅުވި އެވެ.  

އަޅުގަނޑު މާލެއިން ބިމެއް ގަތްކަމަށް ބުނެ ކުރީގެ ރައީސް ޔާމީން ދައްކަމުން ގެންދާ ވާހަކައަކީ ކަނޑައެޅިގެން ރޯ ބުހުތާނު ދޮގު ވާހަކައެކެވެ. އެ ފަދަ ދޮގުވާހަކަތައް ދެއްކުން ހުއްޓާލެއްވުމަށާއި (1/2) https://t.co/jE9lDjzuuk

— Ibrahim Faisal (@ifaisalofficial) October 5, 2024

އެވާހަކަފުޅުގެ ތެރެއިން އެމަނިކުފާނު ވިދާޅުވެފައިވަނީ ޓޫރިޒަމް މިނިސްޓަރު އަދި ކޮންގްރެސް ޕާޓީގެ ޗެއާޕާސަންގެ ދަރިކަލުން އިބްރާހީމް ފައިސަލުވެސް މާލެއިން ބިމެއް ބައްލަވައގަނެފައިވާ ކަމަށެވެ. 

ރައީސް ޔާމީނުގެ ތުހުމަތުތަކާ ގުޅިގެން މިއަދު އެކްސްގައި ކުރެއްވި ޕޯސްޓެއްގައި ފައިސަލް ވިދާޅުވީ އޭނާ މާލެއިން ބިމެއް ބައްލަވައިގެންނެވިކަމށް ވިދާޅުވެ ކުރީގެ ރައީސް ޔާމީން ދައްކަވާ ވާހަކަފުޅަކީ ކަނޑައެޅިގެން ރޯ ބުހުތާނު ދޮގު ވާހަކައެއް ކަމަށެވެ. 

އަދި އެފަދަ ދޮގު ވާހަކަތއް ދައްކަވައިގެން ރައްޔިތުންގެ މެދުގައި ފިތުނަ ފަސާދަ އުފެއްދެވުމަށް މަސައްކަަތް ނުކުރެއްވުމަށް ރައީސް ޔާމީނަށް ނަސޭހަތްތެރިވެވަޑައިގަންނަވާ ކަމަށްވެސް ފައިސަލު ވިދާޅުވި އެވެ.