މައުސޫމް ވިދާޅުވަނީ ޑޮލަރު މާރުކުރުވުމުން ފަަތުރުވެރިކަމަށް ގެއްލުންވާނެކަމަށް

ފަތުރުވެރިކަމުގެ ސިނާއަތަށް ލިބޭ ބޭރު ފައިސާގެ އާމްދަނީގެ މިންވަރެއް ދިވެހިރާއްޖޭގެ ބޭންކުތަކަށް މާރުކުރުން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ލާޒިމުކުރުމަކީ ފަތުރުވެރިކަމުގެ ސިނާއަތަށް ބޮޑު ގެއްލުމެއް ލިބިދާނެ ކަމެއްގެ ގޮތުގައި ކުރީގެ ޓޫރިޒަމް މިނިސްޓަރު ޑރ.އަބްދުﷲ މައުސޫމް ސިފަ ކުރައްވައިފި އެވެ. 

މިއަދު ފާހަގަކުރަމުންދާ ގައުމީ ފަތުރުވެރިކަމުގެ ދުވަހާ ގުޅިގެން އެކްސްގައި ޝާއިއުކުރެއްވި ޕޯސްޓެއްގައި މައުސޫމް ވިދާޅުވީ ފަތުރުވެރިކަމުގެ ސިނާއަތަށް 52 އަހަރު ފުރޭއިރު މިއަދު އެ ސިނާއަތް އޮތީ ކަންބޮޑުވާންޖެހޭފަދަ ފައްތަރެއްގައި ކަމަށެވެ. 

ރާއްޖޭގެ ފަތުރުވެރިކަމުގެ ކާމިޔާބު ދަތުރުގެ މައިގަނޑު ފިލާވަޅަަކީ، އެ ސިނާއަތް ބިނާކުރުމުގައި އަދި ހާއްސަކޮށް ސިނާއަތުގެ ފެށުމުގައި އަމިއްލަ ވިޔަފާރިތަކުން އަދާކުރި މުހިއްމު ދައުރާއި، އެ ސިނާއަތް ކުރިއެރުވުމާއި، ރެގިއުލޭޓުކޮށް ސިޔާސަތުތައް އެކުލަވައިލުމުގައި ސަރުކާރުން ގެންގުޅުނު މަޝްވަރާގެ އުސޫލުކަމަށް މައުސޫމް ވިދާޅުވި އެވެ. 

އިތުރަށް މައުސޫމް ވިދާޅުވީ ކުރިން ރޭވުމެއް ނެތި ވަކި މަގުސަދެއް ހާސިލުކުރުމުގެ ބޭނުމުގައި ސަރުކާރުން ބޮޑެތި އުސޫލުުތައް އެކުލަވައިލާ ފަތުރުވެރިކަަމުގެ ސިނާއަތަށް ތަދައްހުލުވަމުންދާ ދިއުމަކީ ކަންބޮޑުވެވަޑައިގަންނަވާ ކަމެއް ކަމަށެވެ. 

އެގޮތުން ސަރުކާރުން ފިޔަވަޅުތައް އަޅަމުންދަނީ އެ ސިނާއަތުގައި ހަރަކާތްތެރިވާ އަމިއްލަ ވިޔަފާރިތަކުގެ އަޑާއި ކަންބޮޑުވުންތަކަށް ރިއާޔަތްނުކޮށް ކަމުގައިވެސް މައުސޫމް ވިދާޅުވި އެވެ. އަދި އެފިޔަވަޅުތަކުގެ ސަބަބަުން ފަތުރުވެރިކަމުގެ ސިނާއަތުގެ ދެމެހެއްޓެނެވިކަން ނުރައްކަލަށް ހުށަހެޅިދާނެ ކަމުގައި އޭނާ ފާހަގަކުރެއްވި އެވެ. 

މިފަދައިން މައުސޫމު ވިދާޅުވި ނަމަވެސް މަރުކަޒީ ބޭންކުންވަނީ ފަތުރުވެރިކަމުގެ ސިނާއަތުގެ ވިޔަފާރި ޖަމްއިއްޔާތަކާ ބައްދަލުކޮށް، ބޭންކުތަކަށް ޑޮލަރުގެ އާމްދަނީ ޖަމާކުރުމާއި އެއިން މިންވަރެއް ބޭންކުތަކަށް މާރުކުރުމާ ގުޅޭ ގޮގުން އެމްއެމްއޭއިން މަޝްވަރާކުރި އެވެ. 

ނަމަވެސް "މިރާ"އަށް އެނގިފައިވާ ގޮތުގައި މި މަޝްވަރާތަކުގައި މި ފިޔަވަޅު އެޅުމަށް އެއްބާރުލުން ދިނުމުގެ ޝައުގެއް އެ ޖަމްއިއްޔާތަކުން ފާޅުނުކުރެ އެވެ.