އިންޝުއަރެންސް ވިޔަފާރި | ދެ ކުއާޓާއިން އެއް ބިލިއަންގެ ޕްރިމިއަމް ދޫކުރި

މި އަހަރުގެ ފުރަތަމަ ދެ ކުއާޓާގައި އިންޝުއަރެންސް ވިޔަފާރިތަކުން ދެ ބިލިއަންގެ ޕްރިމިއަމް ވިއްކާފައިވާކަން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ހިސާބުތަކުން ދައްކައިފި އެވެ. 

އެމްއެމްއޭއިން މަހަަކު އެއްފަހަރު އާންމުކުރާ ހިސާބުތަކުން ދައްކާ ގޮތުގައި މި އަހަރުގެ ފުރަތަމަ ދެ ކުއާޓާގައި އިންޝުއަރެންސް ކުންފުނިތަކުންވަނީ 1.3 ބިލިއަން ރުފިޔާގެ ޕްރިމިއަމް ވިއްކާފަ އެވެ. 

2023 ވަނަ އަހަރުގެ ނިޔަލަށް އިންޝުއަރެންސް ކުންފުނިތަކުން ވިއްކާފައިވަނީ ޖުމްލަ 1.6 ބިލިއަން ރުފިޔާގެ ޕްރިމިއަމް އެވެ. އަދި އެ އަހަރުގެ ފުރަތަމަ ދެ ކުއާޓާގައި އިންޝުއަރެންސް ކުންފުނިތަކުން ވިއްކާފައިވަނީ 886.4 މިލިއަން ރުފިޔާ އެވެ. އެހެންކަމުން ނިމުނު އަހަރުގެ ފުރަތަމަ ދެ ކުއާޓާއާ އަޅާބަލާއިރު މި އަހަރުގެ ފުރަތަމަ ދެ ކުއާޓާގައި ޕްރިމިއަމްތައް ވިއްކައިގެން އިންޝުއަރޭންސް ކުންފުނިތަކަށް ލިބުނު ފައިސާގެ އަދަދު %55.4 އިތުރުވި އެވެ. 

މި އަހަރުގެ ފުރަތަމަ ދެ ކުއާޓާގައި އެންމެ ގިނަ އަދަދެއްގެ ފައިސާ އިންޝުއަރެންސް ކުންފުނިތަކަށް ލިބުނީ ހެލްތު އިންޝުއަރެންސް ޕްރިމިއަމްތަކުންނެވެ. ހެލްތު އިންޝުއަރެންސް ޕްރިމިއަމްތަަކުން ދެ ކުއާޓާގައި ޖުމްލަ 376.5 މިލިއަން ރުފިޔާ އިންޝުއަރެންސް ކުންފުނިތަކަށް ލިބުނެވެ. 

އިންޝުއަރެންސް ކުންފުނިތަކުން ދޫކުރަންޖެހުނު ފައިސާގެ އަދަދުވެސް ފާއިތުވި އަހަރުގެ ފުރަތަމަ ދެ ކުއާޓާއާ އަޅާބަލާއިރު މި އަހަރުގެ ފުރަތަމަ ދެ ކުއާޓާގައި އިތުރުވެފައިވާކަން އެމްއެމްއޭގެ ހިސާބުތަކުން ދައްކަ އެވެ. 

އެގޮތުން އަހަރުގެ ފުރަތަމަ ކުއާޓާގައ 116.1 މިލިއަން ރުފިޔާގެ ކްލެއިމް ހަދާފައިވާއިރު ދެވަނަ ކުއާޓާގައި އެ އަދަދުވަނީ 208.4 މިލިއަން ރުފިޔާއަށް އަރާފަ އެވެ. އެހެންކަމުން މި އަހަރުގެ ފުރަތަމަ ދެ ކުއާޓާގައި އިންޝުއަރެންސް ކްލެއިމްސްވަނީ 324.5 މިލިއަން ރުފިޔާއަށް އަރާފަ އެވެ. 

ނިމުނު އަހަރުގެ ފުރަތަމަ ދެ ކުއާޓާގައި ހަދާފައިވާ ކްލެއިމްސްގެ ޖުމްލަ އަދަދަކީ 256.4 މިލިއަން ރުފިޔާ ކަމަށް އެމްއެމްއޭގެ ހިސާބުތަކުން ދައްކަ އެވެ. އެހެންކަމުން މި އަހަރުގެ ފުރަތަމަ ދެ ކުއާޓާގައި ހަދާފައިވާ ކްލެއިމްސްގެ އަގު 26.6 އިންސައްތަ އިތުރުވެފައިވެ އެވެ. 

އެމްއެމްއޭގެ ހިސާބުތަކަށް ބަލާއިރު މި އަހަރުގެ މިހާތަނަށް ރާއްޖޭގެ އިންޝުއަރެންސް ވިޔަފާރި ފާއިތުވި އަހަރަށްވުރެ ބޮޑަށް ކުރިއަރާފައިވެ އެވެ. ފާއިތުވި އަހަރުތަކުގައިން އިންޝުއަރެންސް ޕްރިމިއަމްގެ ގޮތުގައި ކުންފުނިތަކަށް ލިބުނު ފައިސާ އަހަަރުން އަހަރަށް އިތުރުވެފައިވެ އެވެ. 

2019 ވަނަ އަހަރު އިންޝުއަރެންސް ކުންފުނިތަކުން ދޫކުރި ޕްރިމިއަމްތަކުގެ ޖުމްލަ އަގަކީ 945.9 މިލިއަން ރުފިޔާ އެވެ. އެ އަދަދު 2023 ގައި 1.6 ބިލިއަން ރުފިޔާއަށް އިތުރުވި އެވެ. އެއީ ފަސް އަހަރު ތެރޭގައި 74 އިންސައްތަ އިތުރުވެފައިވެ އެވެ.