ގަވާއިދާ ހިލާފު ބިދޭސީން ލައްވައި މަސައްކަތްކުރުވާ 92 ދިވެހިންނަށް ނޯޓިސް

ގަވާއިދާ ހިލާފަށް އުޅޭ ބިދޭސީން ލައްވައި މަސައްކަތްކުރުވި 92 ދިވެއްސަކަށް މޯލްޑިވްސް އިމިގްރޭޝަނުން ނޯޓިސް ދީފި އެވެ. 

އިއްޔެ ހަވީރު ހުޅުމާލޭގައި ފުލުހުންނާއި އިމިގްރޭޝަން ގުޅިގެން ހިންގާފައިވާ ބޮޑު އޮޕަރޭޝަނުގެ ތެރެއިން ހަވީރު 4:00 އާއި އިރުއޮއްސި 6:00 އާ ދެމެދުގައި ޖުމްލަ 796 ބިދޭސީންނާ ސުވާލުކޮށްފައިވާ ކަމަށް އިމިގްރޭޝަނުން ބުނެފައިވެ އެވެ. 

ހުޅުމާލޭގެ ދެ ފިޔަވަހި 27 ޒޯނަކަށް ބަހާލައިގެން ކުރިއަށްގެންދިޔަ އިންސްޕެކްޝަނުގައި އިމިގްރޭޝަނުންވަނީ 314 ތަނެއް ބަލައި ފާސްކޮށްފަ އެވެ. އަދި އެ މައްސަލާގައި ގަވާއިދާ ހިލާފަށް ފިަލައިގެން އުޅޭ ބިދޭސީންތަކެއްވެސް އަތުލައިގަނެފައިވެ އެވެ. 

އެގޮތުން އިމިގްރޭޝަނުން ބުނެފައިވަނީ ފިލައިގެން ގަވާއިދާ ހިލާފަށް އުޅޭ ޖުމްލަ 28 ބިދޭސީން އިމިގްރޭޝަނުގެ ބެލުމުގެ ދަށަށް ގެނެސްފައިވާ ކަމަަށެވެ. 

އޭގެ އިތުރަށް ވިސާގެ ކަންކަން ފުރިހަމަކޮށްފައިނުވާ 165 ބިދޭސީއަކަށް އިމިގްރޭޝަނށް ހާޒިރުވެ ވިސާގެ ކަންކަން ރަނގަޅުކުރުމުގެ ނޯޓިސް އެ އިދާރާއިން ދިނެވެ. ހަމައެހެންމެ ގަވާއިދާ ހިލާފަށް އުޅޭ ބިދޭސީން ލައްވައި މަސައްކަތްކުރުވާ 92 ވިޔަފާރިއަކަށް ނޯޓިސްދީ ނަސޭހަތް ދީފައިވެ އެވެ. 

އިމިގްރޭޝަނުން ބުނެފައިވަނީ ނޯޓިސް ދިން ވިޔަފާރިތަކުން ނޯޓިސްގައިވާ ގޮތަށް އަމަލުނުކުރާނަމަ އެ ފަރާތްތަކާމެދު އިމިގްރޭޝަން ގާނޫނުގެ ދަށުން ފިޔަވަޅު އަޅާނެ ކަމަށެވެ. 

އަދި ގަވާއިދާ ހިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދުމާއެކު، އެފަދައިން އުޅޭ ބިދޭސީންގެ ފަރާތުން ރާއްޖޭގެ އިގުތިސާދީ އިޖުތިމާއީ ފޭރާމަށް ލިބޭ ގެއްލުން ކުޑަކުރުމަކީ އިމިގްރޭޝަނުގެ އަމާޒުކަމަށް އެ އިދާރާއިން ބުނެފައިވެ އެވެ.