"ހިތުގެ ބައްޔަށް ވާރުތަކުރާ އަލާމަތްތައް ގިނަ މީހުންގެ ގައިން ދަނީ ފެންނަމުން"

ރާއްޖޭގައި ހަދާފައިވާ ދިރާސާއަކުން ދައްކާ ގޮތުގައި، ވަރަށް ބޮޑު ޕަސެންޓެއްގެ މީހުން ގައިގައި ހިތުގެ ބައްޔަށް ވާރުތަކުރާ އަލާމާތްތައް ފެނިފައިވާ ކަމަށް ހެލްތު މިނިސްޓަރު ޑރ. އަބްދުﷲ ހަލީލް ވިދާޅުވެއްޖެ އެވެ.

މިނިސްޓަރު މިހެން ވިދާޅުވެފައި ވަނީ ހިތުގެ ބަލީގެ ދުވަސް ފާހަގަ ކުރުމަށް އިއްޔެ ބޭއްވި އިވެންޓްގައި ވާހަކަ ދައްކަވަމުންނެވެ. މިނިސްޓަރު ވިދާޅުވެފައި ވަނީ ހިތުގެ ސިއްހަތާއި ވިންދު ރަގަޅު ކުރުމަކީ އަމިއްލަ އަތްމަތީގައި އޮތް ކަމެއް ކަމަށެވެ. އެހެންކަމުން އެކަމަށް ހުރިހާ އެންމެންވެސް މަސައްކަތް ކުރުމަށް ބާރުއަޅުއްވާފައިވެ އެވެ.

ދުނިޔޭގެ ތަފާސްހިސާބުތަކަށް ބަލާއިރު، އަހަރެއްގެ މައްޗަށް ގާތްގަނޑަކަށް 17 މިލިއަން މީހުން ހިތުގެ އެކި ބަލިތަކުގައި މަރުވާ ކަމަށް މިނިސްޓަރު ވިދާޅުވި އެވެ. އަދި 2020 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ރާއްޖޭގައި ހެދި ދިރާސާއަކުން ދައްކާ ގޮތުގައި، 15 އަހަރާއި 65 އަހަރާ ދެމެދުގެ އެކިއެކި އުމުރުފުރާގެ މީހުންގެ ތެރެއިން 4.7 ޕަސެންޓަކީ ހިތުގެ އެކި ބަލިތައް ރެކޯޑު ކުރެވިފައިވާ މީހުންކަމަށް ވިދާޅުވި އެވެ.

"އޭގެ އިތުރުން މި ދިރާސާއިން ދައްކާ ގޮތުން ރަގަޅު ޕަސެންޓެއް، މިދެންނެވީ ފުދޭވަރަކަށް ބޮޑު ޕަސެންޓެއް އެއީ ހިތުގެ ބައްޔަށް ވާރުތަ ވެދާނެ ބައެއް އަލާމާތްތައް ހުރި ބޭފުޅުން،" މިނިސްޓަރު ވިދާޅުވި އެވެ.

ހިތުގެ ބަލީގެ ދުވަސް ކޮންމެ އަހަރަކު ވެސް ބާއްވަނީ ސެޕްޓެމްބަރު 29 ވަނަ ދުވަހު އެވެ. މިދުވަސް ފާހަގަކުރުމުގެ މަގުސަދަކީ ހިތުގެ ބައްޔާއި ބައްޔަށް ހުށަހެޅޭ ހިރާސްތަކާއިމެދު އާންމުން ހޭލުންތެރިކޮށް، ހިތުގެ ބަލިތަކުން ރައްކާތެރިވުމަށް އާންމުންނަށް ބާރުއެޅުމެވެ.

މިއަހަރު ފާހަގަކުރި ހިތުގެ ބަލީގެ ދުވަހުގެ ޝިއާރަކީ "ޔޫސް ހާޓް ފޯ އެކްޝަން" އެވެ. މި ދުވަހާ ގުޅިގެން އިއްޔެ ހުޅުމާލޭގައި ވަނީ ބައިސްކަލް، ސްކޭޓް އަދި ސްކޫޓަރު ދުއްވުމުގެ ހަރަކާތެއް ބާއްވާފަ އެވެ.