އެމްއޭސީއެލްގެ އަހަރީ ބޯނަސް | ހުރިހާ މުވައްޒަފުންނަަށްވެސް 25،000 ރުފިޔާ
އެމްއޭސީއެލްގައި ތިންހާހެއްހައި މުވައްޒަފުން މަސައްކަތްކުރާއިރު މުވައްޒަފުންނަށް ބޯނަސްގެ ދިނުމަށް 75 މިލިއަން ރުފިޔާ އެ ކުންފުނިން ހަރަދުކުރާނެ އެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ހުރިހާ މުވައްޒަފުންނަށް އަހަރީ ބޯނަސްގެ ގޮތުގައި 25،000 ރުފިޔާ ދީފި އެވެ.
ފާއިތުވި އަހަރު އެމްއޭސީއެލްއަށް ފައިދާގެ ގޮތުގައި އެއް ބިލިއަން ރުފިޔާއަށްވުރެ ގިނައިން ލިބުނެވެ. 2022 ވަނަ އަހަރު އެ ކުންފުންޏަށް ފައިދާގެ ގޮތުގައި 868 މިލިއަން ރުފިޔާ ލިބުނުއިރު 2023 ގައި އެ ކުންފުންޏަށް ލިބުނު ފައިދާ 20 އިންސައްތަ އިތުރުވި އެވެ. ނިމުނު އަހަރު އެ ކުންފުންޏަށް ލިބުނީ 1.1 ބިލިއަން ރުފިޔާގެ ފައިދާއެކެވެ.
އެމްއޭސީއެލްގެ މެނޭޖިން ޑިރެކްޓާ އިބްރާހީމް ޝަރީފު ވިދާޅުވެފައިވަނީ މިދިޔަ އަހަރު އެ ކުންފުންޏަށް ލިބުނު ފައިދާގެ ތެެރެއިން މުވައްޒަފުންނަށް ބޯނަސްގެ ގޮތުގައި ދިނުމަށް ކަނޑައަޅާފައިވާ ފައިސާ މިއަދު އެ ކުންފުނީގެ މުވައްޒަފުންނަށް ޖަމާވާނެ ކަމަށެވެ.
އެމްއޭސީއެލްގައި ތިންހާހެއްހައި މުވައްޒަފުން މަސައްކަތްކުރާއިރު މުވައްޒަފުންނަށް ބޯނަސްގެ ދިނުމަށް 75 މިލިއަން ރުފިޔާ އެ ކުންފުނިން ހަރަދުކުރާނެ އެވެ.
އެމްއޭސީއެލްއިން އަންނަނީ ވެލާނާ އިންޓަނޭޝަނަލް އެއާޕޯޓު އިތުރަށް ފުޅާކޮށް އެއާޕޯޓުގެ ހިދުމަތްތައް އިތުރުކުރުމުގެ މަސައްކަތް ކުރަމުންނެވެ. އެގޮތުން މިހާރު ބިނާކޮށް ނިމުމަކާ ގާތްވެފައިވާ އެއާޕޯޓުގެ އައު ޓާމިނަލުގެ ބައެއް މި އަހަރުގެ ޑިސެންބަރު މަހު ހުޅުވާނެ އެވެ.
ވީއައިއޭގެ އައު ހިދުމަތްތައް ފެށުމުން އެމްއޭސީއެލްއަށް ލިބޭ އާމްދަނީ އިތުރުވެ ކުންފުނީގެ ފައިދާވެސް އިތުރުވާނެ ކަމުގައި ބެލެވެ އެވެ.
ކޮމެންޓް
Republic of Maldives