މަސްވެރިންނަށް ދޭންވެފައި ހުރި 17 މިލިއަން ރުފިޔާ ދޫކުރަން ފަށައިފި
މަސްވެރިންނަށް ދޭންޖެހިފައި ހުރި 17.3 މިލިއަން ރުފިޔާ މިއަދު އޮޑިވެރިންނަށް ޖަމާވާން ފަށާފައިވާނެ ކަމަށް މިފްކޯއިން ބުންޏެވެ.
ދައުލަތުގެ މަސް ކުންފުނި މޯލްޑިވްސް އިންޑަސްޓްރިއަލް ފިޝިން ކޮމްޕެނީ (މިފްކޯ)އިން މަސްވެރިންނަށް ދޫކުރަން ޖެހިފައި ހުރި 17 މިލިއަނަށްވުރެ ގިނަ ރުފިޔާ ދޫކުރުމުގެ މަސައްކަތް އެ ކުންފުނިން ފަށައިފި އެވެ.
މިއަދު އެ ކުންފުނިން ހާމަކުރި ގޮތުގައި މިހާރު މަސްވެރިންނަށް ދޫނުކުރެވި ހުރި ފައިސާ މި ހަފުތާ ތެރޭގައި ދޫކޮށް ނިންމުމުގެ މަސައްކަތްވަަނީ ފަށާފަ އެވެ. އެގޮތުން ދޫކުރަންޖެހޭ އަދަދަކީ 17،350،903 (ސަތާރަ މިލިއަން ތިންލައްކަ ފަންސާސްހާސް ނުވަ ސަތޭކަ ތިން) ރުފިޔާ އެވެ.
މި ފައިސާއަކީ ފާއިތުވި އޯގަސްޓު މަހުގެ 24 ވަނަ ދުވަހުން ފެށިގެން ސެޕްޓެންބަރު 25 ވަނަ ދުވަހުގެ ނިޔަލަށް މިފްކޯއަށް މަސްވެރިން ކިރުވި މަހަށްވާ ފައިސާ އެވެ. އެ ފައިސާ މިއަދު އޮޑިވެރިންނަށް ޖަމާވަމުންދާނެ ކަމުގައި މިފްކޯއިން ބުންޏެވެ.
މި އަހަރުގެ މިހާތަނަށް މިފްކޯއިން މަސްވެރިންނަށް އެއް ބިލިއަނަށްވުރެ ގިނަ ރުފިޔާ ދޫކޮށްފައިވެ އެވެ. އެގޮތުން އެންމެ ފަހުން މި މަހުގެ ނުވަވަނަ ދުވަހު ހަތް މިލިއަން ރުފިޔާ އެ ކުންފުނިން އޮޑިވެރިންނަށްވަނީ ދޫކޮށްފަ އެވެ.
މިފްކޯއަށް ކުރިމަތިވެފައިވާ ކޭޝް ފްލޯގެ މައްސަލަތަކާއި ދައުލަތުގެ މާލީ ހާލަތު ގޯސްވުމުގެ ސަބަބުން މަސްވެރިންނަށް ދޭންޖެހޭ ފައިސާ ދިނުމުގައި ލަސްތަކެއްވި ނަމަވެސް މަސްވެރިންނަށް ފައިސާ ދޫކުރާ ނިޒާމު ހަރުދަނާކުރުމަށް ސަރުކާރުން އަންނަނީ މަސައްކަތްކުރަމުންނެވެ.
ސަރުކާރު ބަދަލުވިއިރު މަސްވެރިންނަށް ދައްކަންޖެހިފައި ހުރި 200 މިލިއަނެއްހައި ރުފިޔާ ނުދައްކައި ހުއްޓެވެ. އެއިރު މަސްވެރިން އަތުން މަސް ގަންނަމުންއައީ ކިލޯއެއް 25 ރުފިޔާގެ ރޭޓުން ބައިނަލްއަގުވާމީ ބާޒާރުގައި މަހުގެ އަގު ހުރި މިންވަރަށްވުރެ އެތައް ގުނައެއް ބޮޑު ކޮށެވެ.
މި ސަރުކާރުންވަނީ މަސް ކިރުވާ އަގަކީ ބައިނަލްއަގުވާމީ ބާޒާރުގައި މަހުގެ އަގު ހުރި މިންވަރަށް ބަލައިގެން މިފްކޯއަށް ގެއްލުންނުވާ ގޮތަށް ކަނޑައަޅާ އަގެއްކަމަށް ހަމަޖެއްސުމަށް އުސޫލުތަކަށް ބަދަލުތަކެއް ގެނެސްފަ އެވެ.
ކޮމެންޓް
Republic of Maldives