ގައުމީ އެއާލައިންގެ ޓިކެޓް އަގު ކަނޑައަޅާ ގޮތާމެދު މާރިޔާގެ ސުވާލެއް!

ގައުމީ އެއާލައިން -- މޯލްޑިވިއަން އިން ޓިކެޓް އަގު ކަނޑައަޅާ ގޮތާމެދު ކުރީގެ ޑިފެންސް މިނިސްޓަރު މާރިޔާ އަހްމަދު ދީދީ ސުވާލެއް އަމާޒު ކުރައްވައިފި އެވެ.

އެކްސް ގައި އެކަމަނާ ކުރެއްވި ޕޯސްޓެއްގައި ވިދާޅުވީ ގައުމީ އެއާލައިން މޯލްޑިވިއަން އަކީ "ފައްކާ" އެއާލައިނެއް ކަމަށެވެ. ނަމަވެސް އެކި ސަރަހައްދުތަކަށް ކުރާ ދަތުރުތަކަށް އަގު ކަނޑައަޅާ ގޮތާމެދު އެކަމަނާ ސުވާލު ކުރެއްވި އެވެ.

އެއީ ދިގު ދަތުރުތަކަށް ނަގާ އަގުތަަކަށް ވުރެ ކުރު ދަތުރުތަކަށް ނަގާ އަގު ބޮޑުވުމުން އެކަމަނާ ކުރެއްވި ސުވާލެެކެވެ. މިސާލެއްގެ ގޮތުން ނެންގެވީ މާލެ އިން ކައްދޫއަށް ކުރާ ދަތުރުގެ އަގާއި މާލެއިން ކޫއްޑޫއަށް ކުރާ ދަތުރުގެ އަގެވެ.

މާލެ އިން ކައްދޫއަށް ކުރާ ދަތުރުގެ ދިގު މިނަކީ 40 މިނެޓެވެ. ދެކޮޅުގެ އަގަކީ 3،000 ރުފިޔާ އެވެ. މާލެ އިން ކޫއްޑޫއަށް ކުރާ ދަތުރުގެ ދިގު މިނަކީ ގަޑިއެއްގެ އިރެވެ. ނަމަވެސް ދެކޮޅު ޓިކެޓްގެ އަގަކީ 2،2020 ރުފިޔާ އެވެ. މާރިޔާ ވަނީ އެ ދެ އެއާޕޯޓަށް ކުރާ ދަތުރުތަކުގެ ޓިކެޓް އަގު ފެންނަ ފޮޓޯއެއްވެސް ހިއްސާ ކުރައްވާފަ އެވެ.

އަދި "މިއީ ކިހިނެތް ކަނޑައެޅޭ އަގުތަކެއްތޯ" ސުވާލު ކުރެއްވި އެވެ.

މޯލްޑިވިއަންގެ ޓިކެޓް އަގުތައް ކަނޑައަޅާ ގޮތާމެދު ގިނަ ބަޔަކު ސުވާލު އުފައްދަ އެވެ. އަގުތައް ބޮޑުވުމަކީ ވެސް އާންމުންގެ ވަރަށް ބޮޑު ކަންބޮޑުވުމެކެވެ. ވައިގެ ދަތުރުފަތުރުގެ އަގު ކުޑަ ކުރުމަކީ ކޮންމެ ސަރުކާރަކުން ވެސް ރައްޔިތުންނަށް ވާ ވައުދެކެވެ. ނަމަވެސް އެ ވައުދުފުއްދުމުގެ ނަމުގައި ކުޑަ ދުވަސްކޮޅަކަށް ޓިކެޓްގެ އަގު ހެޔޮކޮށް ކުރީގެ އަގަށް ބަދަލު ކުރެ އެވެ.