އިސްރާއީލު ޕާސްޕޯޓު މަނާކުރަނީ އެމީހުންގެ ޖަރީމާތަކާ ދެކޮޅުކަން ހާމަކުރަން: ރައީސް
"އަޅުގަނޑު މި ވާހަކަ މި ދަންނަވަނީ ވަރަށް ސާފުކޮށް. އިޒްރޭލު ޕާސްޕޯޓު މަނާ ކުރުމުގެ މަގުސަދަކީ އިޒްރޭލުން ފަލަސްތީނުގައި ހިންގާ ކަންތައްތައް ބަލައިނުގަތުން. އެއީ ޔަހޫދީން ނުވަތަ އެހެންވެސް ދީނަކާ ގުޅުން ހުރި ކަމެއް ނޫން،"
އިސްރާއީލުގެ ޕާސްޕޯޓުގައި ރާއްޖެއަށް އެތެރެވުން މަނާކުރަނީ ފަލަސްތީނު ރައްޔިތުންނާ ދެކޮޅަށް އިސްރާއީލުން ހިންގަމުންދާ ޖަރީމާތަކާ ދެކޮޅުކަން ހާމަކުރުމުގެ ގޮތުންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވެފައިވަނީ ޕްރިންސްޓަން ޔުނިވަސިޓީގެ ޑީންސް ލީޑާޝިޕު ސީރީޒްގައި ބުރާސްފަތި ދުވަހު އެ ޔުނިވާސިޓީގައި ދެއްވި ތަގުރީރަށްފަހު އެ ތަގުރީރު އަޑުއަހަން ދިޔަ މީހުން ކުރި ސުވާލުތަކަށް ޖަވާބުދެއްވަމުންނެވެ.
އިތުރަށް ރައީސް ވިދާޅުވެފައިވަނީ ރާއްޖެއަކީ ކުޑަ ގައުމެއް ނަމަވެސް ފަލަސްތީނު ރައްޔިތުންނާމެދު އިސްރާއީލުން ހިންގަަމުންދާ ޖަރީމާތައް ބަލައިނުގަންނާނެކަން ދުނިޔެއަށް ދައްކައިދިނުމަށް އިހުތިޖާޖުކުރަން ބޭނުންވާ ކަމށެވެ. އަދި ރައްޔިތުންގެ މަޖިލީހުން ފާސްވިހާ އަވަހަކަށް އިސްރާއީލު ޕާސްޕޯޓު މަނާކުރާނެ ކަމަށެވެ.
ރާއްޖޭގެ މަގުސަދަކީ އިޒްރޭލުން ފަލަސްތީނާ ދެކޮޅަށް މި ހިންގާ ޖަރީމާތައް، މި ކުށްތައް ބަލައިނުގަނެ، ކިތަންމެ ކުޑަ ގައުމެއް ނަމަވެސް ރާއްޖެއަށް ކުރެވޭނެ ކަމެއް ކުރުން. ރައްޔިތުންގެ މަޖިލީހުން ފާސްވާހާ އަވަހަކަށް އިޒްރޭލުގެ ޕާސްޕޯޓު މަނާވާނެ،" ރައީސް ވިދާޅުވި އެވެ.
އިތުރަށް ރައީސް ވިދާޅުވީ އިސްރާއީލު ޕާސްޕޯޓު މަނާކުރުމަކީ އެއްވެސް ހާލަަތެއްގައި ޔަހޫދީންނާ ދެކޮޅުވެގެން ކުރާ ކަމެއް ނޫން ކަމަށެވެ. އަދި އިތުރަށް ވިދާޅުވެފައިވަނީ ރާއްޖެއިން ވަކި ދީނަކަށް ނިސްބަތްވާ މީހުންނާ ދެކޮޅަށް ފިޔަވަޅު ނާޅާނެ ކަމަށެވެ.
"އަޅުގަނޑު މި ވާހަކަ މި ދަންނަވަނީ ވަރަށް ސާފުކޮށް. އިޒްރޭލު ޕާސްޕޯޓު މަނާ ކުރުމުގެ މަގުސަދަކީ އިޒްރޭލުން ފަލަސްތީނުގައި ހިންގާ ކަންތައްތައް ބަލައިނުގަތުން. އެއީ ޔަހޫދީން ނުވަތަ އެހެންވެސް ދީނަކާ ގުޅުން ހުރި ކަމެއް ނޫން،" ރައީސް ވިދާޅުވި އެވެ.
ދިވެހިންނަކީ ޔަހޫދީންނާ ދެކޮޅު ބައެއް ނޫންކަން ފާހަގަކުރައްވަމުން ރައީސް ވިދާޅުވީ ދިވެހިންނަކީ ހުރިހާ ގައުމަކާވެސް ރަހުމަތްތެރި ގުޅުމެއް ބާއްވާ ބައެއް ކަމަށެވެ.
އިޒްރޭލް ޕާސްޕޯޓް މަނާކުރުމުގެ މަސައްކަތް ފަށާފައިވާތާ މަސްތަކެއް ވެއްޖެ އެވެ. އެކަން ތަންފީޒު ނުވެ ގިނަ ދުވަސްތަކެއް ވެފައިވާ ކަމަށް ބުނެ އާންމުންނާއި ވާދަވެރީންގެ ފާޑުކިޔުން ބޮޑެވެ. އެ މަސައްކަތަށް ހުޅަނގުގެ ނުފޫޒު އޮތް ވާހަކަތަކެއް ވެސް ދެކެވެ އެވެ. ނަމަވެސް ސަރުކާރުން ބުނަނީ އެ މަސައްކަތް އަދި ލަސް ނުވާ ކަމަށެވެ.
ކޮމެންޓް
Republic of Maldives