ރައީސް އދގެ އާންމު މަޖިލީހުގެ ބައްދަލުވުމަށް ކުރެއްވި ދަތުރުފުޅު ނިންމަަވާލައްވައި ފުރާވަޑައިގެންފި
ދަތުރުފުޅު ނިންމަވައިލެއްވުމަށްފަހު ރައީސް މިއަދު ފުރާވަޑައިގެންފައިވާއިރު، އެމަނިކުފާނަށް ރާއްޖެއަށް ވަޑައިގެންނެވޭނެ ކަމަށް ބެލެވެނީ މާދަމާ އެވެ.
އދ.ގެ އާންމު މަޖިލީހުގެ 79 ވަނަ ބައްދަލުމުގައި ބައިވެރިވެވަޑައިގަތުމަށް އެމެރިކާގެ ނިއުޔޯކަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރެއްވި ދަތުރުފުޅު ނިންމަވައިލެއްވުމަށްފަހު ރާއްޖެއަށް އަނބުރާ ވަޑައިގަތުމަށް ފުރާވަޑައިގެންފި އެވެ.
ރައީސްގެ ދަތުރުފުޅުގައި އދ.ގެ އާންމު މަޖިލީހުގައި ތަގުރީރު ކުރެއްވުމުގެ އިތުރަށް އާންމު މަޖިލީހުގެ ބައްދަލުވުމުގެ ހަވާސާގައި ބޭއްވި ތަފާތު އެކި ހަރަކާތްތަކުގައި ބައިވެރިވެވަޑައިގެން އެކި މައުޟޫތަކަށް ތަގުރީރުކުރައްވާފައިވެ އެވެ.
އެގޮތުން ތަރައްގީވަމުން އަންނަ ކުދި ޖަޒީރާ ގައުމުތަކުން ބޭއްވި ބައެއް ހަރަކާތްތަކުގައި އެމަނިކުފާނު ބައިވެރިވެވަޑައިގެންނެވި އެވެ. އަދި އެ ހަރަކާތްތަކުގައި ކުދި ޖަޒީރާ ގައުމުތަކަށް ކުރިމަތިވެފައިވާ ގޮންޖެހުންތަކާ ގުޅޭ ގޮތުން އަޑުއުފުއްލެވި އެވެ.
އޭގެ އިތުރަށް އދގެ އެންމެ ބާރުގަދަ ގުނަވަންކަމަށްވާ ސަލާމަތީ މަޖިލީހުގައި އޮތް ހުޅުވާލެވިފައިވާ ބަހުސެއްގައި ބައިވެރިވެވަޑައިގެން ސަލާމަތީ މަޖިލީހުގެ މެންބަރު ދައުލަތްތަކާ މުހާތަބުކުރައްވައި އެމަނިކުފާނުވަނީ ވާހަކަފުޅުދައްކަވާފަ އެވެ. މިއީ ސަލާމަތީ މަޖިލީހުގައި ދިވެހި ރައީސަކު ވާހަކަދެއްކެވި ފުރަތަމަ ފަހަރެވެ.
އަދި އެމެރިކާގެ އެންމެ މަޝްހޫރު އެއް ޔުނިވާސިޓީކަމަށްވާ ޕްރިސްޓަން ޔުނިވަސިޓީއަށް ޒިޔާރަތްކުރައްވައި އެ ޔުނިވަސިޓީގައި ރައީސްވަނީ ތަގުރީރުކުރައްވާފަ އެވެ. އަދި ނިއުޔޯކުގައި ހުންނަ ގޫގްލްގެ އޮފީހަކަށް ޒިޔާރަތްކުރައްވައި ގޫގްލްއާއެކު މަޝްވަރާތަކެއް ކުރިއަށްގެންދަވާފައިވެ އެވެ.
ދަތުރުފުޅު ނިންމަވައިލެއްވުމަށްފަހު ރައީސް މިއަދު ފުރާވަޑައިގެންފައިވާއިރު، އެމަނިކުފާނަށް ރާއްޖެއަށް ވަޑައިގެންނެވޭނެ ކަމަށް ބެލެވެނީ މާދަމާ އެވެ. މި ދަތުރުފުޅުގައި ފޮރިން މިނިސްޓަރު މޫސާ ޒަމީރާއި، އެންވަޔަރަމެންޓު މިނިސްޓަރު ތޯރިގު އިބްރާހީމް ހިމެނިވަޑައިގަންނަވާ މަތީ ފަންތީގެ ވަފުދެއް ރައީސްގެ އަރިހުގައި އދ.އަށް ވަޑައިގެންފައިވެ އެވެ.
ކޮމެންޓް
Republic of Maldives