ސަލާމަތީ މަޖިލީހުގައި ރައީސް ތަގުރީރު ކުރެއްވުމަކީ ރާއްޖެއަށް މުހިއްމު ހިނދުކޮޅެއް: ޒަމީރު
"ރައީސް ބޭނުންފުޅުވަނީ ސަލާމަތީ މަޖިލީހަކީ މިހާރަށްވުރެ އިސްނަގައިގެން ހަރަކާތްތެރިވާ، 21 ވަނަ ގަރުނުގެ ތަފާތު ގޮންޖެހުންތަކަށް ހޭނުމުގެ ގާބިލުކަން ހުރި ތަނަކަށް ވުމަށް،" ޒަމީރު ވިދާޅުވި އެވެ.
އދގެ ސަލާމަތީ މަޖިލީހުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތަގުރީރުކުރެއްވުމަކީ ރާއްޖެއަށް މުހިއްމު ވަގުތުކޮޅެއް ކަމުގައި ހާރިޖީވަޒީރު މޫސާ ޒަމީރު ވިދާޅުވެއްޖެ އެވެ.
ރޭ ސަލާމަތީ މަޖިލީހުގައި ކުރިއަށްދިޔަ ހުޅުވާލެވިފައިވާ ބަހުސްގައި ބައިވެރިވެވަޑައިގެން ރައީސްވަނީ ތަގުރީރު ކުރައްވާފަ އެވެ. އެމަނިކުފާނު އިއްވެވި ތަގުރީރުގައި ސަލާމަތީ މަޖިލީހުގެ އިހުމާލާއި ނުކުޅެދުންތެރިކަމުގެ ސަބަަބުން ގިނަ ދައުލަތް ބައިވެރިވާ ބައިނަލްއަގުވާމީ ނިޒާމަށް ދައުލަތްތަކާއި އާންމުންގެ އިތުބާރު ގެއްލެމުންދާކަން ފާހަގަކުރައްވައި ސަލާމަތީ މަޖިލިސް އިސްލާހު ކުރުމަށް ކުރެވިދާނެ ބައެއް ކަންކަން ފާހގަކުރެއްވި އެވެ.
ރޭ ރައީސް ސަލާމަތީ މަޖިލީހުގައި ދެއްވި ތަގުރީރަކީ އެ މަޖިލީހާ މުހާތަބުކުރައްވައި ދިވެހިރާއްޖޭގެ ރައީސަކު ދެއްވި ފުރަތަމަ ތަގުރީރުކަން ފާހަގަކުރައްވަމުން މިނިސްޓަރު ވިދާޅުވީ އެ ތަގުރީރުގައި ރައީސް އަލިއަޅުވައިލެއްވީ ގިނަ ދައުލަތްތައް ބައިވެރިވާ ނިޒާމަށް އިތުބާރު ގެއްލިފައިވާ ސަބަބުގެ މައްޗަށް ކަމަށެވެ.
އަދި އެ ސަބަބުގެ ގޮތުގައި ރައީސް ފާހަގަކުރެއްވީ ބައިނަލްއަގުވާމީ ސުލްހައާއި ސަލާމަތް ދެމެއްހެޓުމުގައި އދގެ ސަލާމަތީ މަޖިލީހަށް ނަތީޖާ ނުނެރެވުންކަން ކަމުގައި މިނިސްޓަރު ވިދާޅުވި އެވެ.
އަދި އެ މައްސަލަ ހައްލުކުރުމަށް ތިން ކަމެއް ރައީސް ސަލާމަަތީ މަޖިލީހަށް ހުށަހަޅުއްވައި ތަންފީޒު ކުރުމަށް ގޮވައިލެއްވި ކަމަށާއި، ފުރަތަމަ ކަމެއްގެ ގޮތުގައި ރައީސް ފާހަގަކުރެއްވީ ހުރިހާ ދައުލަތްތައް ތަމްސީލުވާނެ ގޮތަކަށް ސަލާމަތީ މަޖިލިސް އެކުލަވައިލުން ކަމަށް ޒަމީރު ވިދާޅުވި އެވެ.
މިނިސްޓަރު ވިދާޅުވީ ބަދަލުވެފައިވާ މިހާރުގެ ބައިނަލްއަގުވާމީ މާހައުލު ރިވެލިވާ ގޮތަށް ސަލާމަތީ މަޖިލިސް ބަދަލުވާންޖެހޭކަން ރައީސް ފާހަގަކުރެއްވި ކަމަށެވެ. ތަރައްގީވަމުން އަންނަ ކުދި ޖަޒީރާ ގައުމުތަކުގެ މެދުގައި ދައުރުވާ ގޮތަށް ހާއްސަ ޖާގައެއް އެ ގައުމުތަކަަށް ސަލާމަތީ މަޖިލީހުން ހާއްސަކުރަން ރައީސް ގޮވައިލެއްވިކަން ޒަމީރު ފާހަގަކުރެއްވި އެވެ.
ދެވަނަ ކަމަކަށް ރައީސް ގޮވައިލެއްވީ އދގެ ސަލާމަތީ މަޖިލީހުގެ ދާއިމީ ފަސް މެންބަރު ދައުލަތަށް އޮންނަ ވީޓޯގެ އިމްތިޔާޒު އުވައިލެއްވުމަށް ކަމުގައި ކަން ފާހަގަކުރައްވައި މިނިސްޓަރު ވިދާޅުވީ ވީޓޯގެ ސަބަބުން ފަލަސްތީނު ރައްޔިތުންނާމެދު ހިންގާ އަނިޔާތައް ހިމެނޭހެން، ހަނގުރާމައިގެ ޖަރީމާތަކާއި އިންސާނިއްޔަތާ ހިލާފު އަމަލުތައް ހުއްޓުވުމުގައި ސަލާމަތީ މަޖިލިސް ނުކުޅެދުންތެރި ވާވެފައިވާކަން ރއީސް ފާހަގަކުރެއްވި ކަމަށެވެ. އަދި އެމަނިކުފާނު ގޮވައިލެއްވީ ވީޓޯ އުވައިލުމާއެކު އަސްލު މަސްދަރުތައް މަތީ ސަލާމަތީ މަޖިލީހުގެ އިސްލާހާ ގުޅޭ މަޝްވަރާތަކެއް ހިންގަން ކަމަށެވެ.
ތިންވަނައަށް ރައީސް ގޮވައިލެއްވީ އައު ބާވަތްތަކުގެ ސަލާމަތީ ނުރައްކާތަކަށް ހޭވެރިވުމުގެ ގޮތުން ސަލާމަތީ މަޖިލީހަށް މީހުންގެ އީޖާދީ އަދި ވަގުތާ ބައްދަލު ހިޔާލުތައް ހުށަހެޅޭނެ ގޮތެއް ހަދައި މީސްތަކުންނާ ސަލާމަތީ މަޖިލިސް ގުޅުވައިދެއްވުމަށްކަން މިނިސްޓަރު ފާހަގަކުރެއްވި އެވެ.
"ރައީސް ބޭނުންފުޅުވަނީ ސަލާމަތީ މަޖިލީހަކީ މިހާރަށްވުރެ އިސްނަގައިގެން ހަރަކާތްތެރިވާ، 21 ވަނަ ގަރުނުގެ ތަފާތު ގޮންޖެހުންތަކަށް ހޭނުމުގެ ގާބިލުކަން ހުރި ތަނަކަށް ވުމަށް،" ޒަމީރު ވިދާޅުވި އެވެ.
ކޮމެންޓް
Republic of Maldives