ކުޑަކުދިންގެ މެދުގައި ނޭވާލާ ނިޒާމަށް ޖެހޭ ވައިރަހެއް ފެތުރެނީ

ނޭވާލާ ނިޒާމަށް ޖެހޭ ރޯގާއެއް ކަމަށްވާ "ރެސްޕިރޭޓަރީ ސިންސިޝަލް ވައިރަސް" ކުޑަކުދިންގެ މެދުގައި ހަލުވި ކަމާއެކު ފެތުރެމުންދާތީ އެކަމަށް ސަމާލުވާން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.

ކުރުކޮށް ކިޔާ ގޮތުންނަމަ އާރްސީވީއަކީ ނޭވާލާން އުނދަގޫވާ ވައިރަހެކެވެ. މި ވައިރަހުގެ ސަބަބުން ނޭވާލާ ނިޒާމުގައި އިންފެކްޝަން އުފެދެ އެވެ. އެގޮތުން މި އިންފެކްޝަނުގެ ސަބަބުން ނޭފަތާއި ކަރުތެރެއާއި ފުއްޕާމޭއަށް ބަލި ޖެހެ އެވެ.

އެޗްޕީއޭ އިން މިއަދު ބުނީ ކުޑަކުދިންގެ މެދުގައި މި ވައިރަސް ފެތުރެމުންދާތީ، ވަރަށް ކައިރިން މޮނީޓާ ކުރަމުންދާ ކަމަށެވެ. އަދި ބަލިން ރައްކާތެރިވުމަށް އަމިއްލައަށް ފިޔަވަޅު އެޅުމަށް ވެސް އިލްތިމާސްކޮށްފައިވެ އެވެ. ހާއްސަ ގޮތެއްގައި ކުޑަކުދިން ބަލިން ރައްކާތެރިކުރުމަށް ހާއްސަ ފިޔަވަޅުތައް އެޅުމަށް ވަނީ އިލްތިމާސްކޮށްފަ އެވެ.

އެގޮތުން، ގިނައިން އަތް ދޮވުމާއި، ކެއްސާ ކިނބިހި އަޅާއިރު އަނގަޔާއި ނޭފަތް ފޮރުވުމާއި މީހުން ގިނަ ތަންތަނަށް ނުދިއުމަށް އެޗްޕީއޭ އިން ވަނީ އިރުޝާދު ދީފަ އެވެ. 

މި ބަލީގެ އަލާމާތްތަކުގެ ތެރޭގައި ހުން އައުމާއި، ކެއްސުމާއި، މެޔަށް ތަދުވުމާއި އަދި ނޭވަޔަށް އުނދަގޫ ކުރުން ހިމެނެ އެވެ. މިފަދަ ކަމެއް ދިމާވާނަމަ އަވަހަށް ޑޮކްޓަރަށް ދައްކަން އެޗްޕީއޭ އިން ވަނީ އެދިފަ އެވެ. ފަރުވާ ހޯދުން އަވަސްކޮށްފިނަމަ ބަލިން ސަލާމަތް ވުން ވެސް އަވަސްވާނެ ކަމަށް އެ އެޖެންސީ އިން ބުނެފައިވެ އެވެ.

މި ވައިރަސް ޖެހޭ މީހާ ބަލިން ރަގަޅު ވިޔަސް ބައެއް ފަހަރު ގިނަ ދުވަސްވާންދެން ނޭވަޔަށް އުނދަގޫ ކުރެ އެވެ. މި ވައިރަހަކީ އާންމުކޮށް ރޯގާ ޖެހުމުން ވެސް ބަލި ފެތުރޭހެން، ކެއްސާ ކިނބިލިއަޅާއިރު ނުކުންނަ ކުޅުފަދަ އެއްޗެހިން ޖެހޭ ވައިރަހެކެވެ. މި ވައިރަހަކީ ބައެއްފަހަރު ކުޑަކުދިންނަށް ނުރައްކާ ވައިރަހެކެވެ.