އދގެ މަންސައިން ރައީސް | އަމާޒަކީ 2040 ގެ ކުރިން ތަރައްގީވެފައިވާ ގައުމަކަށް ރާއްޖެ ހެދުން

ދިވެހިރާއްޖެއާމެދު އެމަނިކުފާނު ގެންގުޅުއްވާ ތަސައްވުރަކީ 2040 ވަނަ އަހަރު އަންނަންވާއިރަށް ދިވެހިރާއްޖެއަކީ ތަރައްގީވެފައިވާ ގައުމަކަށް ހެއްދެވުންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

އދގެ އާންމު މަޖިލީހުގެ 79 ވަނަ ބައްދަލުވުމުގައި މިރޭ ދެއްވި ތަގުރީރުގައި ރައީސް ވިދާޅުވީ 2040 ވަނަ އަހަރަކީ ދިވެހިރާއްޖެއަށް ފުރިހަމަ މިނިވަންކަން ލިބި ސިޔާދަތު ލިބިފައިވާ މުސްތަގިއްލު ދައުލަތެއްގެ ގޮތުގައި ބައިނަލްއަގުވާމީ މުޖުތަމައުގައި ހަރަކާތްތެރިވާތާ 75 އަހަރު ފުރޭ ތާރީހީ އަހަރު ކަމަށެވެ. 

އަދި އެ ތާރީހާ ހަމައަށް ދާއިރު އެމަނިކުފާނު ރާއްޖެއަށް ހާސިލުވާން އެދިވަޑައިގަންނަވާ ކަމަކީ ކޮބައިތޯ ސުވާލުކުރެއްވުމަށްފަހު ވިދާޅުވީ މިރޭ އދގައި އެމަނިކުފާނު ހުންނެވީ ދިވެހިރާއްޖެއާމެދު ގެންގުޅުއްވާ ތަސައްވުރަކާއެކު ކަމަށެވެ. 

އެމަނިކުފާނުގެ ތަސައްވުރަކީ 2040 ވަނަ އަހަރު އަންނަންވާއިރަށް ދިވެހިރާއްޖެއަކީ ތަރައްގީވެފައިވާ ގައުމަކަށް ހެއްދެވުންކަން ހާމަކުރައްވަމުން ރައީސް ވިދާޅުވީ އެ ތަސައްވުރާމެދު ބަޔަކު ޝައްކު އުފައްދަފާނެ ކަމަށެވެ. ނަމަވެސް ހަރުދަނާ ތަސައްވުރެއް ވިސްނުމުގައި އޮވެގެން އަތުގައި ރަނގަޅު ޕްލޭނެއް އޮވެ މަސައްކަތް ކުރެވިއްޖެނަމަ އެ އަމާޒު ހާސިލުކުރެވޭނެ ކަަމުގައި ވިދާޅުވި އެވެ. 

އެ އަމާޒަށް ރާއްޖެއަށް ވާސިލުވެވިދާނެކަން ފާހަގަކުރައްވަމުން ރައީސް ވިދާޅުވީ 1965 ވަނަ އަހަރު ރާއްޖެއަށް މިނިވަންކަން ލިބުނުއިރު ރާއްޖެއަކީ ދުނިޔޭގެ ނިސްބަތުން އެންމެ ކުޑަ އާމްދަނީ ލިބޭ ގައުމުތަކުގެ ސަފުގައި ގުނައިލެވޭ ގައުމެއް ކަމަށެވެ. އާބާާދީގެ ތިން ބައިކުޅަަ އެއްބައި މީހުންނަކީ އެއިރު ލިޔަންކިޔަން ނުދަންނަ މީހުން ކަމަށާއި އުފަންވާ ކުދިންގެ ބޮޑު ބައެއް ޅަފުރާގައި މަރުވާ ކަމަށެވެ. އަދި އަމުދުން ރާއްޖޭގައި ސިނާއަތެއް ނެތްކަން ފާހަގަކުރެއްވި އެވެ. 

ނަމަވެސް އެންމެ ސާޅީހަކަށް އަހަރުތެރޭ ދިވެހިރާއްޖެ އެންމެ ކުޑަކޮށް ތަރައްގީވެފައިވާ ގައުމުތަކުގެ ސަފުން ވަކިވެ މެދު ފަންތީގެ މަތީ އާމްދަނީއެއް ލިބޭ ގައުމުތަކުގެ ސަފާ ގުޅުނުކަމަށާއި، އެއީ ދިވެހިން ނުހަނު ފަހުރުވެރިވާ ކާމިޔާބެއް ކަމުގައި ރައީސް ފާހަގަކުރެއްވި އެވެ. 

ތަރައްގީވެފައިވާ ގައުމަކަށް ރާއްޖެ ހެދުމަށްޓަކައި ކުރަންޖެހޭ ކަމަކީ ރާއްޖޭގެ އުފެއްދުންތެރިކަމުގެ ގާބިލުކަމަށް އިންވެސްޓުކޮށް، އުފެއްދުންތެރިކަން އިތުރުކުރުން ކަމަށްވެސް ރައީސް ވިދާޅުވި އެވެ. އެކަމަށްޓަކައި ޑިޖިޓަލައިޒްކުރުމާއި، އިގުތިސާދު ސިންދަފާތުކުރުމާއި، ކަނޑުގެ ވަސީލަތްތައް އެންމެ ރަނގަޅަށް ބޭނުންކުރުމުގެ މުހިއްމުކަން އެމަަނިކުފާނު ފާހަގަކުރެއްވި އެވެ.