ހަތަރު ލައްކައަށް އިސްދޫ ކައުންސިލަށް ޝަރުތު ހަމަނުވާ ވޭނެއް ގަތުމުން ދަތުރުކުރަންޖެހެނީ ކުއްޔަށް

ހައްދުންމަތީ އިސްދޫ ކައުންސިލުން ހަތަރު ލައްކައަށްވުރެ ގިނަ ރުފިޔާ ހަރަދުކޮށްގެން ޝަރުތު ހަމަނުވާ ވޭނެއް ގަތުމަށްފަހު، އެވޭން ބޭނުންނުކުރެވޭތީ ކުއްޔަށް އުޅަނދު ނަގައިގެން ދަތުރުކުރަމުންދާކަން ހާމަވެއްޖެ އެވެ. 

އިސްދޫ ކައުންސިލުން ގާނޫނާއި ގަވާއިދަށް އަމަލުކޮށްފައިވާ މިންވަރު ވަޒަންކޮށް އޮޑިޓާ ޖެނެރަލް އޮފީހުން ނެރެފައިވާ ކޮމްޕްލަޔަންސް އޮޑިޓު ރިޕޯޓުގައި ފާހަގަކުރި ގޮތުގައި 439،900 ރުފިޔާއަށް ވޭނެއް ގަތުމަށް އަމިއްލަ ކުންފުންޏަކާއެކު ކައުންސިލުން އެއްބަސްވުމެއް ހެދީ 7 މޭ 2023 ގަ އެވެ. 

އެ އެއްބަސްވުމަކީ 2023 ވަނަ އަހަރުގެ މާޗު މަހުގެ 30 ވަނަ ދުވަހު އެ ކައުންސިލުން ކުރި އިއުލާނަކާ ގުޅިގެން އަގު ހުށަހަޅައިގެން ކައުންސިލުން ހެދި އެއްބަސްވުމެކެވެ. އެ އިއުލާނުގައި އަދި ފަހުން ހެދި އެއްބަސްވުމުގައިވެސް ކައުންސިލަށް ބޭނުންވާ އުޅަނދުގައި ހުންނަންޖެހޭ ޝަރުތުތައް ނުވަތަ ސްޕެސިފިކޭޝަންތައް ބަޔާންކޮށްފައިވެ އެވެ. 

އެގޮތުން އިއުލާނާއި އެއްބަސްވުމުގައި ބަޔާންކުރި ގޮތުން ކައުންސިލަށް ބޭނުންވަނީ 2019 ވަނަ އަހަރު ނުވަތަ އެއަށްވުރެ ފަހުން އުފައްދާފައިވާ އުޅަނދެކެވެ. ބީލަން ކާމިޔާބުކުރި ފަރާތުން ހުށަހަޅާފައިވަނީ 2019 ވަނަ އަހަރު އުފައްދާފައިވާ އުޅަނދެއް ފޯރުކޮށްދިނުމަށެވެ. 

ނަމަވެސް އޮޑިޓު އޮފީހުން ފާހަގަކުރި ގޮތުގައި އެފަރާތުން ކައުންސިލަށް ފޯރުކޮށްދީފައިވަނީ 2018 ވަނަ އަހަރު އުފައްދާފައިވާ އުޅަނދެކެވެ. އެހެންކަމުން 2019 ވަނަ އަހަރު އުފައްދާފައިވާ އުޅަނދެއް ފޯރުކޮށްދޭނެކަމަށް ބީލަމުގެ މަރުހަލާގައި އެފަރާތުން ބުނެފައިވަނީ އޮޅުވާލައިގެން ބީލަން ކާމިޔާބުކުރުމަށް ކަމުގައި ބެލެވޭކަމށް އޮޑިޓު އޮފީހުން ބުނެފައިވެ އެވެ. 

އޮޑިޓުން ފާހަގަކުރި ގޮތުގައި 22 މޭ 2023 ގައި ކައުންސިލުން އެ އުޅަނދާ ހަވާލުވެފައިވަނީ އިއުލާނުގައި އަދި އެއްބަސްވުމުގައި ބަޔާންކޮށްފައިވާ ޝަރުތުތައް އެ އުޅަނދުގައި ފުރިހަމަވާކަން ކަށަވަރު ނުކޮށެވެ. އުޅަނދާ ހަވާލުވެ އޭގެ އަގުގެ ގޮތުގައި 434،900 ރުފިޔާ ކައުންސިލުން ދޫކޮށްފައިވެ އެވެ. 

ކައުންސިލުން ބުނެފައިވަނީ އެ އުޅަނދަކީ ކައުންސިލުގެ ޝަރުތު ފުރިހަމަވާ އުޅަަނދެއް ނޫންކަން އެނގުމުން އެ މައްސަލަ ހައްލުކުރުމަށް ކައުންސިލުން އިސްދޫ ކޯޓަށް ސެޕްޓެންބަރު 6، 2023 ގައި މައްސަލައެއް ހުށަހަޅާފައިވާ ކަމަށެވެ. 

އޮޑިޓު އޮފީހުން ބުނެފައިވާ ގޮތުން ކައުންސިލުން ބަލައިގަތް އުޅަނދަކީ ޝަރުތު ފުރިހަމަނުވާ އުޅަނދަކަށްވާތީ އެ އުޅަނދުގެ ބޭނުންނުކުރެވޭތާ އަހަރެއްހައި ދުވަސް ވެއްޖެ އެވެ.