"ކޯ-ޗެއާކުރަން ލިބުމަކީ ރާއްޖޭގައި ޑިޖިޓަލައިޒޭޝަން ފުޅާކުރަން ލިބުނު ފުރުސަތެއް"

ސަމިޓް އޮފް ދަ ފިއުޗާ، "އިންޓަރެކްޓިވް ޑައިލޮގް 3، ޓުވާޑްސް އަ ކޮމަން ޑިޖިޓަލް ފިއުޗާ"ގެ ކޯ-ޗެއާގެ ހައިސިއްޔަތުން ރިޔާސަތު ބެލެހެއްޓުމުގެ ފުރުސަތު ރާއްޖެއަށް ލިބުމުން، ރާއްޖޭގައި ޑިޖިޓަލް އިކޮނޮމީ ކުރިއަރުވައި، ޑިޖިޓަލައިޒޭޝަން ފުޅާކުރުމުގެ މަގު އިތުރަށް ފަހިވެގެން ގޮސްފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިވަގުތު ހުންނެވީ އދ.ގެ ޖެނެރަލް އެސެމްބްލީގައި ބައިވެރިވެވައިގަތުމަށް އެމެރިކާގަ އެވެ. "އިންޓަރެކްޓިވް ޑައިލޮގް 3، ޓުވާޑްސް އަ ކޮމަން ޑިޖިޓަލް ފިއުޗާ"ގެ ކޯ-ޗެއާކަން ކުރެއްވުމަށްފަހު އިއްޔެ ދެއްވި ބަސްދީގަތުމެއްގައި ރައީސް ވިދާޅުވީ އެމަނިކުފާނަށް ކޯ-ޗެއާކަން ކުރެއްވުމުގެ ފުރުސަތު ލިބުމަކީ ރާއްޖެއަށް އޭގެ ސަބަބުން ވަރަށް ބޮޑަށް ފައިދާ ކުރާނެ ކަމެއް ކަމަށެވެ.

އެގޮތުން، ރާއްޖޭގެ ނަން އިންޓަނޭޝަނަލް ކޮމިއުނިޓީގައި ފާހަގަވެގެން ދާނެ ކަމަށާއި، އޭގެ ސަބަބުން ރާއްޖެއަށް ޑިޖިޓަލައިޒޭޝަން ދާއިރާއިން ފުރުސަތުތައް ފަހިވެގެން ދާނެކަން ވެސް ފާހަގަކުރެއްވި އެވެ.

"ހަގީގަތުގަ އަޅުގަނޑު ގަބޫލުކުރީ މިކަމަކީ ދިވެހިރާއްޖޭގެ ފަރާތުން މިގަފަ މުހިންމު، ޔޫއެންގަ އޮތް ސެޝަނެއްގަ ކޯ-ޗެއާ ކުރަން ލިބުނު ކަމަކީ ރާއްޖޭގަ އަޅުގަނޑުމެން ކުރިއަށް ގެންދަން ބޭނުންވާ ޑިޖިޓަލް އިކޮނޮމީ ކުރިއަށް ގެންދިއުން، ޑިޖިޓަލައިޒޭޝަން ފުޅާކުރުން، އަޅުގަނޑުމެންގެ މި މުހިން ސިޔާސަތު ކުރިއަށް ގެންދިއުމުގަ ލިބުނު ވަރަށް މުހިންމު ފުރުސަތެއް،" ރައީސް ވިދާޅުވި އެވެ.

ރައީސް ވިދާޅުވީ އެ ސަމިޓުގައި ގާތްގަނޑަކަށް 190 އެއްހާ ގައުމެއްގެ އިސްވެރިންނާއި އެކިއެކި ބައިނަލްއަގްވާމީ ޖަމިއްޔާތަކުން ބައިވެރިވެވަޑައިގެންފައިވާ ކަމަށެވެ. އެހެންކަމުން ރާއްޖޭގެ އަޑު ދުނިޔެއަށް އިވިގެންދާނެ ކަމަށް ވެސް ވިދާޅުވި އެވެ.

މި ސަމިޓްގައި ވާހަކަ ދައްކަވަމުން ރައީސް ވަނީ ޑިޖިޓަލް އިގްތިސޯދީ ވެއްޓެއްގައި ޒުވާނުން ބާރުވެރިކުރުވާނެ ހަރަކާތްތަކެއް ފެށުމަށް ގޮވާލައްވާފަ އެވެ. އަދި ދޭސީ އީޖާދުތަކަށް ބާރުދީ، އިގްތިސޯދު ސިންދަފާތުކުރުމަށްޓަކައި ބޭނުންވާ ޑިޖިޓަލް ހުނަރު އާލާކޮށް، ތާޒާކުރުމުގެ ދާއިރާ އިތުރަށް ފުޅާކުރުމުގެ މުހިންމު ކަން ރައީސް ވަނީ ފާހަގަކުރައްވާފަ އެވެ.