ކުޑަކުއްޖަކަށް ޖިންސީ ހާނީއްކަ އެއް ކުރި މީހަކު ޖަލު ބަންދުގައި ހުއްޓާ ދަންޖެހި މަރުވެއްޖެ

ކުޑަކުއްޖަކަށް ގަދަ ކަމުން ޖިންސީ ހާނީއްކަ ކަމުގެ ތުހުމަތުގައި ޝަރީއަތް ނިމެންދެން ބަންދުކޮށްފައި ހުރި މީހަކު ދަންޖެހިގެން މަރުވެއްޖެއެވެ.

މަރުވެފައި އޮއްވާ ފެނުނީ ގ. އެތްތެޔޮމާގެ، ޢަބްދުލް ޣަނީ އިސްމާއިލް އެވެ.

އުމުރުން 62 އަހަރުގެ މި މީހާ މަރުވެފައި ހުއްޓާ ފެނުނީ ހެނދުނު ސައި ހިފައިގެން ދިޔަ ކަރެކްޝަންސްގެ އޮފިސަރަކަށެވެ. އެއީ މީގެ ކުރިން މަގުމަތިން އަންހެނަކަށް ފޮށި، ޖިންސީ ގުޅުން ހިންގަން ދައުވަތުދިން މައްސަލައިގެ ކުށް ސާބިތުވެ ޖަލު ހުކުމެއްވެސް ކޮށްފައިވާ މީހެކެވެ.

ކަރެކްޝަނުން ބުނީ މިއަދު ހެނދުނު 6:52 ގައި އަބްދުލް ޣަނީ އިސްމާއިލްގެ ގޮޅީގައި ދަންޖެހިފައި ހުއްޓާ ފެނުމުން، ވަގުތުން އޭނާ މާފުށީ ހޮސްޕިޓަލަށް ގެންދިޔަ ކަމަށެވެ. އެހެން ނަމަވެސް 7:21 ގައި އަބްދުލް ޣަނީ އިސްމާއިލް ނިޔާވެފައިވާކަމަށް ޑޮކްޓަރު ކަނޑައަޅާފައިވާ ކަމަށްވެސް އެ ސާވިސް އިން ވަނީ ބުނެފައެވެ.

ކަރެކްޝަނުން ބުނީ އަބްދުލް ޣަނީ އިސްމާޢީލް ނިޔާވުމާ ގުޅިގެން އެ ސަރވިސްއިން ވަގުތުން އެކަން އޭނާގެ އާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައިވާ ކަމަށެވެ. އަދި މިކަން އެމްސީއެސްގެ ޕްރޮފެޝަނަލް ސްޓޭންޑަޑް އިންވެސް ތަހުގީގުކުރަން ފަށާފައިވާ ކަމަށް އެ ސާވިސް އިން ބުންޏެވެ.

އަންހެނެއްގެ ކަރުގައި ވަޅި ޖައްސައި ބިރު ދެއްކީ މީހަކުވެސް ޝަރީއަތް ނިމެންދެން ދޫނިދޫ ޖަލުގައި ބަންދު ކޮށްފައިހުއްޓައި ވަނީ ދަންޖެހިގެން މަރުވެފައެވެ.